म्याद सकियो, सडक उस्तै

लामोसाँघु–जिरी खण्ड
सडकको जीर्ण अवस्थाकै कारण सर्वसाधारण सिन्धुली खुर्कोट हुँदै मन्थली मार्ग प्रयोग गर्न बाध्य
राजेन्द्र मानन्धर

दोलखा — दोलखाको ‘लाइफ लाइन’ मानिँदै आएको लामोसाँघु–जिरी सडकलाई १० दिनभित्र सुधार्ने प्रतिबद्धताको अवधि सकियो तर सडकको अवस्था नाजुक नै छ ।

लामोसाँघु–जिरी सडक बिग्रिएपछि वैकल्पिक मार्ग प्रयोग गर्दा नेपालथोक माम्तीनजिक सास्ती खेप्दै यात्रु । तस्बिर : राजेन्द्र

स्तरोन्नति गर्ने क्रममा अधकल्चो छाडिएको उक्त सडकमा साना सवारीसाधन चल्न सक्दैन । ठूला सवारीसाधन पनि हिलो र खाल्डाखुल्डीले ठाउँठाउँमा फस्छ । एक वर्षअघि नै निर्माण सम्पन्न भइसक्नुपर्ने सडक ठेकेदारको लापरबाहीले ढिलासुस्ती भएपछि दोलखा सदरमुकाम चरिकोटमा भदौ ८ गते प्रदेशसभा सांसदहरूले बैठक राखेका थिए । उक्त बैठकमा ठेकेदारहरूले १० दिनभित्र यातायात सजिलै चल्न सक्ने बनाउने लिखित प्रतिबद्धता गरेका थिए ।

उक्त सडक बिग्रिएर समयमै उद्धार हुन नसक्दा बिरामीको मृत्युसमेत भएको छ । साताको एकपटक हेलिकप्टरबाट बिरामी ओसार्दा ठूलो आर्थिक भार थपिएको छ । ढुवानी रोकिँदा माथिल्लो तामाकोसी आयोजना बेलैमा सम्पन्न हुन नसक्दा लागत बढदै गएको छ ।
दोलखा जिल्लावासीहरू लामो वैकल्पिक मार्ग सिन्धुली खुर्कोट हुँदै मन्थली मार्ग प्रयोग गर्न बाध्य छन् । उक्त मार्गमा पनि पानी परेपछि ठाउँठाउँमा अवरोध हुने गरेको छ ।

Yamaha

तोकिएको समयमा नसुधारेर ठेकेदारले प्रदेश र संघीय सांसदलाई समेत जिल्याएको छ । पटकपटक ठेकेदार कम्पनीले उक्त सडकको कामका बारेमा विभिन्न बहाना झिक्दै ढिलासुस्ती गर्दै आएको छ । निर्माण कम्पनीको एकतर्फी लापरबाहीले सडक निर्माणमा ढिलाइ भइरहेको दाबी आयोजनाको छ ।

संघीय सरकारका संसद्, प्रदेश सरकारका मन्त्री र माननीयहरूको उपस्थितिमा जेजस्तो उपाय प्रयोग गरेर भए पनि सडकको अवस्था सुधार गर्न निर्देशन गरिएको थियो । निर्माण कम्पनीले १० दिनभित्र सडक सुधार्न लिखित प्रतिबद्धता गरेको विषयलाई सामाजिक सञ्जालहरूमा नेताहरूलाई ठेकेदारले फेरि जिल्याए भनेर प्रतिक्रिया लेखेका थिए । ठीक त्यस्तै हुने गरी फेरि पनि निर्माण कम्पनीले सडकको हालतलाई उस्तै राखेका छन् ।

चार दशकअघि स्विस सरकारले निर्माण गरेको लामोसाँघु–जिरी सडक चौडा बढाउन भारतीय एक्जिम बैंकले लगानी गरिरहेको छ । उक्त सडक खण्डको खाडीचौरदेखि मुढेसम्मको २५ किलोमिटर निर्माणको जिम्मा लिएको सुनौलो खिम्ती कालोसूची र मुद्दामालामा फसेपछि सडकको अवस्था नाजुक हुँदै गएको हो । सुनौलो खिम्तीका साझेदार कम्पनीहरू भारतको सीमाञ्चल र नेपालको गौरीपार्वती छन् । मुढेदेखि चरिकोटसम्मको सडक निर्माणको काम सुनौलो खिम्ती, शंकर माली र भारतको सकिल हैदरले लिएका छन् ।

सुनौलो खिम्तीले काम गर्न नसक्ने जनाउँदै हात झिकेपछि अन्य ठेकेदारले कामको जिम्मा लिएका छन् । उनीहरू पनि विभिन्न बहानाबाजी गर्दै कामलाई पछि सार्दै छन् । आयोजना प्रमुख केदार नेपालका अनुसार १० दिनभित्र सडक सुधारेर यातायात सञ्चालन हुन नसक्नुमा नियमित वर्षा कारण बनेको छ ।

Esewa Pasal

प्रकाशित : भाद्र २०, २०७५ ०७:३१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सेयरले बढे नागरिकता लिने

नागरिकता लिनकै लागि रातभर टँुडिखेलमा बसेको बताउँछन्
राजेन्द्र मानन्धर

दोलखा — दोलखाको सिंगटी इलाका प्रशासनले गत आर्थिक वर्षमा २१ सय नागरिकता बाँडेकोमा यस वर्ष एक महिनामै त्यति संख्यालाई नागरिकता दिएको छ । मासिक सरदर पाँच सय जनालाई नागरिकता दिने चरिकोटस्थित जिल्ला प्रशासनले एक महिनामै ४५ सयलाई नागरिकता दिन भ्याएको छ ।

बिहान ६ बजेदेखि राति ९ बजेसम्म काम गर्दा त्यति संख्यालाई नागरिकता दिन सकेको प्रमुख जिल्ला अधिकारी सागरमणि पाठकले बताए । ‘राति नौ बजेसम्म बस्यो, बिहान ६ बजे कार्यालय आउँदा पनि टुँडिखेलभरि मान्छे भइसक्थे,’ प्रजिअ पाठकले भने । माथिल्लो तामाकोसी जलविद्युत् आयोजनाले दोलखालीलाई दिने सेयर आवेदन खुला गरेपछि जिल्ला प्रशासन र इलाका प्रशासनमा नागरिकता लिनेको चाप बढेको हो ।


दोलखाको चरिकोट र सिंगटीस्थित प्रशासनबाट मात्रै नागरिकता वितरण हुन्छ । चरिकोटस्थित टुँडिखेल अघि प्रशासन कार्यालय छ । नागरिकता लिनकै लागि कतिपयले टँुडिखेलमा रातभर बसेको बताउँछन् । भोलिपल्ट चाँडो पालो आउने आशमा प्रशासनवरपर रात कटाएको बुलुङका जितबहादुर श्रेष्ठले सुनाए । प्रजिअ पाठकका अनुसार सकेसम्म आवेदन गरेको दिनमै नागरिकता दिइन्छ । नभ्याएकालाई भोलिपल्ट ६ बजेबाटै सेवा दिने गरिएको छ ।


चरिकोटस्थित जिल्ला प्रशासन कार्यालयले गत आर्थिक वर्षभरिमा ६ हजार ६ सय ४० व्यक्तिलाई नागरिकता वितरण गरेको थियो । यस वर्ष साउन १६ देखि हालसम्म महिना दिनमा चार हजार पाँच सय जनालाई नागरिकता दिइसकेको छ । हराएको र च्यातिएको समस्या देखाउँदै महिना दिनमा अर्को आठ सय ५० जनाले प्रतिलिपि पनि लिए ।


सिंगटी इलाका प्रशासनले उक्त कार्यालायवाट एक महिलाको अवधिमा दुई हजार नागरिकता वितरण गरिसकेको छ । त्यहाँबाट गत आर्थिक वर्षभरिमा दुई हजार एक सय ११ वितरण गरिएको थियो । तामाकोसीले सयेर आवेदन गर्न यहीँ भदौ २१ गतेलाई अन्तिम दिन तोकेकोको छ ।


आवेदनको म्याद सकिन लागेसँगै नागरिकता लिनेको चाप पनि कम हुँदै गएको प्रशासनका कर्मचारी बताउँछन् । २० वर्ष उमेरसम्मकाले जन्मदर्ताको प्रमाणपत्र भए पनि सेयर फारम दर्ता गर्न पाउने व्यवस्था छ । जन्मदर्ता पेस गर्नेलाई तत्काल नागरिकता बनाएर पेस गर्नुपर्ने सूचनामा भनिएको छ ।

प्रकाशित : भाद्र १५, २०७५ १२:५१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT