पसलबाट अवैध दुई किलो सुन र चार किलो चाँदी बरामद

रमेशकुमार पौडेल

चितवन — नारायणगढको एक सुनचाँदी पसलबाट प्रहरीले दुई किलो ७६ ग्राम सुन र चार किलो ६ सय १७ ग्राम चाँदी बरामद गरेको छ । 

चितवन प्रहरीले मंगलबार बरामद गरेको दुई किलो सुन र चार किलो चाँदी बुधबार बिहान जिल्ला प्रहरी कार्यालयमा सार्वजनिक गरिदै । तस्बिर : रमेशकुमार पौडेल/कान्तिपुर

अवैध रुपमा किनेर बेच्न राखेको आरोपमा मंगलबार दिउँसो चितवन प्रहरीले नारायणगढ पुतलीबजारमा रहेको न्यू गणेश सुनचाँदी पसलका सञ्चालकलाई पक्राउ गरेको हो । प्रहरीले सुन चाँदीका साथै १२ लाख रुपैयाँ नगद पनि नियन्त्रणमा लिएको छ ।

Yamaha

जिल्ला प्रहरी कार्यालयका प्रवक्ता, प्रहरी नायब उपरीक्षक (डिएसपी) प्रभुप्रसाद ढकालका अनुसार पक्राउ पर्नेमा भारत महाराष्ट्रको साङ्ली जिल्ला आटपढे घर भएका २७ वर्षीय राजेन्द्र शिवाजी पाटिल छन् । प्रदेश–३ प्रहरी कार्यालय हेटौंडाको अनुसन्धान समूहले दिएको विशेष सूचनाका आधारमा सुन र चाँदी बरामद भएको चितवन जिल्ला प्रहरी कार्यालयका प्रमुख, प्रहरी उपरीक्षक (एसपी) सुशिलसिंह राठौरले बताए ।

प्रदेश प्रहरी कार्यालयका प्रहरी निरीक्षक रोशन थापाको टोली चितवनको टोलीसँग मिलेर गिरफ्तार गर्न गएको थियो । ‘रसुवा नाका हुँदै चीनबाट नेपाल भित्रिने अवैध सुन चितवनमा पनि बढी नै खपत हुने गरेको सूचनाका आधारमा हामीले अनुसन्धान अगाडि बढाएका थियौं,’ प्रहरी निरीक्षक रोशन थापाले भने ।

बरामद सुनमध्ये एउटा बिस्कुट जस्तो टुक्रा नै एक किलोको छ । अरु साना टुक्राहरु छन् । चाँदीको पनि टुक्राहरु छन् । बरामद भएको सुन र चाँदीको बजार मुल्य एक करोड पर्ने प्रहरीको भनाइ छ । नगद १२ लाख सुन बेचेर राखेको प्रारम्भिक बयानबाट खुल्न आएको डिएसपी ढकालले बताए । पाटिलले एकजना भारतीयले नै आफुलाई सुन बेचेको बयान दिएको ढकालको भनाइ छ । पाटिललाई कारवाहीको लागि राजश्व अनुसन्धान विभाग ललितपुर पठाइने छ ।

Esewa Pasal

प्रकाशित : भाद्र २०, २०७५ १०:३०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

राजमार्गमा चिरा बढ्दै

रमेशकुमार पौडेल

चितवन — नारायणगढ–मुग्लिन सडकको १७ किलो भन्ने ठाउँमा सडकमा परेको चिरा फराकिलो हुँदै गएको छ ।

त्यहाँ ७० मिटर लम्बाइसम्म आधा सडक भासिएको छ । नयाँ निर्माणका कारणले नभएर पुरानो भूबनोटका कारण १७ किलोमा समस्या आएको आयोजानका अधिकारीहरू बताउँछन् । लगभग २० वर्ष पहिले रक एङरिङ गरेर सडक फराकिलो बनाएको ठाउँमा अहिले चिरा परेको नारायणगढ–मुग्लिन सडक आयोजनाका सूचना अधिकारी इन्जिनियर शिव खनालले बताए ।

असार २७ गते १७ किलो भन्ने ठाउँमा सडक चिरा परेको थियो । दिनप्रति दिन सडक भासिँदै गएर एक मिटरभन्दा बढी खाल्डो परेरको खनालले बताए ।

‘यो ठाउँमा पनि तत्कालै मर्मतको काम सुरु हुन सक्दैन । वर्षा साम्य भएपछि नियन्त्रणको विषयमा अध्ययन हुन्छ र त्यहीअनुसार काम सुरु हुन्छ,’ खनालले भने ।

एक महिनादेखि पहिरो खसेन
पानी पर्दा पहिरो खसेर घण्टौं बाटो बन्द हुने नारायणगढ–मुग्लिन सडकमा पछिल्लो झरीमा यस्तो समस्या खासै बल्झेन । सूचना अधिकारी खनालका अनुसार साउन २१ गते घुमाउनेमा बिहान सवा ६ बजे पहिरो जाँदा लगभग तीन घण्टा बाटो बन्द भएको थियो । त्यो दिनयता ठूला पहिरोहरू नझरेको उनले बताए ।

‘यो बीचमा झरी नपरेको हैन । तर पहिलाको जस्तो पहिरो खासै गएन,’ सूचना अधिकारी खनालले भने । चितवन जिल्ला ट्राफिक प्रहरी कार्यालयका प्रमुख रहेका प्रहरी निरीक्षक वेदप्रसाद गौतम शुक्रबार सानो पहिरोले सेतीदोभानमा केही बेर गाडी रोकिए पनि ठूलो पहिरो अचेल नगएको बताउँछन् ।

नारायणगढ–मुग्लिन सडक खण्डमा जेठ २८ यता साउन ३ गतेसम्म १४ पटक पहिरो गएको जिल्ला ट्राफिक प्रहरी कार्यालयले जनाएको छ । जसका कारण ७६ घण्टा बाटो बन्द भएको थियो । असार २० मा टोपेखोलामा पहिरो जाँदा लगातार १३ घण्टा बाटो रोकिएको थियो । जुन यो वर्षको अहिलेसम्मको लामो समय हो । अघिल्लो वर्ष लगातार ४३ घण्टासम्म बाटो बन्द भएको थियो ।

नारायणगढ–मुग्लिन सडकलाई एसियाली मापदण्डअनुरूपको दुई लेनको फराकिलो सडक बनाउन ठाउँठाउँमा पहाड काटिएको छ । पहाड काटेको ठाउँमा पटक पटक पहिरो जान्न्छ । पानी नपरे पनि सुक्खा पहिरो खसेर दु:ख दिने गरेको छ । पानी पर्दा समस्या झनै विकराल हुने गरेको छ ।

अघिल्लो वर्ष २९ ठाउँमा पहिरो गएको थियो । यो वर्ष ६ ठाउँमा ठूलो पहिरो गएको सूचना अधिकारी खनालले जानकारी दिए । पहिरो नियन्त्रणका लागि गत वर्ष १४ करोड रुपैयाँ खर्च भएको थियो । यो वर्ष पहिरो सक्रिय रहेको ठाउँमा दसैंपछि अध्ययन गरेर नियन्त्रणका योजनाहरू ल्याउने इन्जिनियर खनालले बताए । दुई वर्षभित्र काम सक्ने गरेर ०७२ सालको वैशाखबाट निर्माण सुरु भएको थियो । तर समयमा काम सक्न गाह्रो भएको थियो ।

प्रकाशित : भाद्र २०, २०७५ ०८:५०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT