किशोरी बलात्कार र हत्या प्रकरण : अझै पत्ता लागेन दोषी, प्रहरी भन्छ- अनुसन्धानमै छौं

चित्रांग थापा, भवानी भट्ट

कञ्चनपुर — कञ्चनपुरको भीमदत्त नगरपालिका–२ उल्टाखामकी १३ वर्षीया किशोरी निर्मला पन्तको बलात्कारपछि हत्या भएको ४२ दिन पुगिसक्यो । प्रहरीले घटनाको अनुसन्धान सुरु गरेको झण्डै डेढ महिना बितिसक्दा पनि घटनामा संलग्न दोषीको पहिचान हुन भने सकेको छैन् ।

शनिबार निर्मलाकी आमासँग भेटदै मन्त्री बिना मगर । तस्बिर : भवानी भट्ट/कान्तिपुर

प्रहरी अनुसन्धानमा जति ढिलो हुँदै गएको छ, पीडित परिवार र स्थानीयमा विभिन्न आशंका बढ्न थालेको छ । यही घटनाको अनुसन्धानको माग गर्दै चर्केको आन्दोलनमा प्रहरीले गोली चलाउँदा एक जनाको मृत्युसमेत भएको थियो । तत्पश्चात् प्रहरीले पुन: प्रारम्भिक चरणबाट अनुसन्धान सुरु गरेको बताए पनि हालसम्म वास्तविक दोषी पत्ता लाग्न नसक्दा पीडित परिवार र स्थानीयमा अनेक शंकाहरु उब्जिएका छन् ।

Yamaha

घटना भएकै दिनदेखि सदरमुकाम महेन्द्रनगरदेखि गाउँघरका चोक र घरघरमा निर्मला हत्याकै चर्चा हुने गरेको छ । पीडित परिवारदेखि जनप्रतिनिधि र सर्वसाधारणलेसमेत घट्नाको अनुसन्धानलाई निकै चासोको साथ लिएका छन् । पीडित परिवार अझै पनि घट्नाको वास्तविकता बाहिर आउनेमा विश्वस्त हुन सकेको छैन् । भेट्न आउने मन्त्री, सांसद र स्थानीय तहका जनप्रतिनिधिहरुसमक्ष उनीहरुले फेरी पुरानै तरिकाको अनुसन्धान हुने हो कि भनेर आशंका व्यक्त गरिरहेका छन् ।

‘घटना भएको डेढ महिनासम्म प्रहरी अनुसन्धानमै छौं भनिरहेको छ,’ निर्मलाकी आमा दुर्गादेवीले भनिन्, ‘फेरी पनि पहिले सार्वजनिक गरिएकालाई नै दोषी देखाउने खेल भइरहेको छ कि?’ उनले अहिले पनि प्रहरीले अनुसन्धानमा खासै प्रगति नभएको भनिरहेकाले शंका बढेको बताइन् ।

के भन्छन् जनप्रतिनिधिहरु ?
जनप्रतिनिधिहरुले पनि अनुसन्धानको सत्यतथ्यका साथै छिटो छरितो हुनुपर्ने माग गरेका छन् । उनीहरुले बलात्कारपछि हत्या जस्तो जघन्य अपराधको अनुसन्धानमा कुनै पनि कमजोरी हुन नहुने भन्दै प्रहरी प्रशासनलाई सचेत गरेका छन् ।

‘अनुसन्धानमा भइरहेको ढिलाईले जनतामा निराशा बढेको छ,’ कांग्रेसका केन्द्रिय सदस्य रमेश लेखकले भने, ‘चाँडो अनुसन्धान गरेर वास्तविक अपराधी सार्वजनिक गरिनुपर्छ ।’ उनले प्रधानमन्त्री केपी ओली र नेकपाका अध्यक्ष पुष्पकमल दाहालसँगसमेत भेटेर घटनाको अनुसन्धान चाँडो गर्न आग्रह गरिएको बताए । ‘अध्यक्ष प्रचण्डले मैरै सामुन्ने गृहमन्त्रीलाई बोलाएर निर्देशन दिनुभएको छ,’ उनले भने ।

‘अहिले प्रहरीले गरिरहेको अनुसन्धानलाई सघाउनुपर्ने सबैको दायित्व हो,’ कञ्चनपुर क्षेत्र नं. ३ बाट निर्वाचित प्रतिनिधिसभा सदस्य डा. दीपक प्रकाश भट्टले भने, ‘अनुसन्धानमा सघाउनुका साथै कमिकमजोरी औंल्याउने काम पनि गरिराख्नु पर्छ ।’ उनले कञ्चनपुर प्रहरीसँगै उच्चस्तरीय छानबिन समितिलेसमेत काम गरिरहेकाले तोकिएको समयावधिसम्म काम गर्ने वातावरण निर्माण गर्न आग्रह गरेका छन् ।

‘यो घटनाले पुरै देशको ध्यान तानेको छ,’ सांसद भट्टले भने, ‘आन्दोलनमा उठेका प्रश्नलाईसमेत सम्बोधन हुनेगरी सरकारले उच्चस्तरीय टोली पठाएको छ । टोलीको प्रतिवेदनमा पनि घटनाबारे कुरा आउला । अहिलेको अवस्था भनेको छानविन टोलीको प्रतिवेदन र प्रहरी अनुसन्धानलाई पर्खनु हो ।’

भीमदत्त नगरपालिकाका प्रमुख सुरेन्द्र विष्टले सबुत प्रमाणसहित वास्तविक दोषी चांँडो पत्ता लगाउनुपर्ने बताए । ‘प्रहरीले वास्तविक अपराधी पत्ता लगाउन स्वतन्त्र ढंगले अनुसन्धान गर्नुपर्छ,’ उनले भने, ‘अनुसन्धानका नाममा निर्दोष मान्छे फस्नु हँुदैन र दोषी उम्किनु हुँदैन ।’ उनले प्रहरीले गरिरहेको अनुसन्धानमा स्थानीयले पनि आवश्यक सहयोग गर्नुपर्ने बताए ।

कञ्चनपुर प्रहरी प्रमुख एसपी डिल्लिराज बिष्ट नेतृत्वको टोलीले घटनाको २४औं दिन भदौ ४ गते घटनाको मुख्य अभियुक्तका रुपमा दिलिपसिंह बिष्टलाइ सार्वजनिक गरेपछि आन्दोलन चर्केको हो । प्रहरीले मानसिकरुपले अस्वस्थ बिष्टलाइ पक्राउ गरी वास्तविक अपराधीलाई उम्काउन खोजेको स्थानीयले आरोप लगाउँदै आन्दोलन झनै चर्काएका थिए । अनुसन्धानकै क्रममा दिलिप बिष्टलाई पक्राउ गर्नुपूर्व प्रहरीले घटनास्थल आसपास बसोवास गर्ने निर्दोष ब्यक्तिहरुलाई पक्राउ गर्ने र कतिपयलाई प्रहरीले यातनासमेत दिन थालेपछि कञ्चनपुर प्रहरी बिरुद्ध जनआक्रोश चर्केको हो ।

अनुसन्धानमै छौं : प्रहरी
घटनाका विषयमा जिल्ला प्रहरी कार्यालयले हालसम्म खासै प्रगति नभएको जनाएको छ । जिल्ला प्रहरी कार्यालयका एसपी कुबेर कडायतले अनुसन्धान चलिरहेपनि प्रगति हुन नसकेको बताए । ‘हामी अनुसन्धानमै छौं, तत्काल केहि भन्न सकिने अवस्था छैन,’ उनले भने, ‘विगतका भन्दा अनुसन्धान पनि अलि सहज बन्दै गएको छ ।’ उनले भदौ ७ र ८ को घटनापछि अनुसन्धान गर्न केहि असहज भएपनि अवस्था सामान्य बन्दै गएको बताए ।

‘अहिले पनि सुचना पाउन निकै समस्या भईरहेको छ,’ एसपी कडायतले भने, ‘घट्नास्थल, पीडित वा बम परिवारको घरमा जांँदा भीड मात्रै पछि लाग्छ ।’ उनले स्थानीयले शंका गरेका बम दिदी बहिनी रोशनी र बबिताको बयान लिने काम सकिएको बताए । स्थानीयको दबाबपछि भदौ ७ मा उनीहरुलाई पक्राउ गरी पहिलो पटक ६ दिन र दोस्रो पटक ७ दिनको म्याद थप गरेर अनुसन्धान गरिरहेको छ । यसअघि प्रहरीले सार्वजनिक गरेका भीमदत्त नगरपालिका १९ बागफाँटाका दिलिप विष्टलाई स्वास्थ्य परीक्षणका लागि काठमाण्डौ लगिएको छ । उनलाई शिक्षण अस्पतालमा भर्ना गरिएको एसपी कडायतले बताए ।

एसपी कडायतले हालसम्म गरिएको सोधपुछ तथा अनुसन्धानका क्रममा सामाजिक सञ्जाल तथा स्थानीयस्तरमा व्यापक हल्ला गरिएका निलम्बित एसपी डिल्ली विष्टका छोरा किरन र महेन्द्रनगरकै अर्का युवक आयुष विष्टको संलग्नता हालसम्म नदेखिएको बताए । प्रारम्भिक अनुसन्धानमा संलग्नता नदेखिएपनि उनीहरुलाई निगरानीमा भने राखिएको उनले जानकारी दिए । उनीहरु दुवैजना अहिले महेन्द्रनगरमै रहेको एसपी कडायतले बताए ।

घटनाकै अनुसन्धानका लागि एसएसपी ठाकुर प्रसाद ज्ञवालीको नेतृत्वमा दोस्रो पटक प्रहरीको केन्द्रीय अनुसन्धान ब्युरो (सिआईबी)को टोली आएको छ । यसअघि निर्मलाको शव भेटिएको दोस्रो दिन साउन १२ मा डिएसपी अंगुर जिसीको नेतृत्वमा तीन सदस्यीय अनुसन्धान टोली यहाँ आएको थियो । ‘अहिले आएको हाम्रो सहयोगका लागि हो,’ एसपी कडायतले भने, ‘उक्त टीम पनि अनुसन्धानमै खटिएको छ ।’

भदौ ४ मा प्रहरीले मुख्य अभियुक्तकारुपमा भीमदत्त नगरपालिका १९ बागफाँटाका ४१ वर्षीय दिलिप विष्टलाई सार्वजनिक गएपछि स्थानीयले आक्रोशित भई आन्दोलन चर्काएका थिए । सिआइबीको अनुसन्धान पनि शंकास्पद भएपछि उक्त टोली फिर्ता भएको हो । मानसिक अवस्था ठिक नभएका ब्यक्तिलाई प्रहरीले सार्वजनिक गरेपछि एक सातासम्म महेन्द्रनगर तनावग्रस्त हुन पुग्यो । प्रहरीले गोली चलाउदा एक जना बालकको मृत्यु समेत भयो ।

उक्त घटनापछि गृह मन्त्रालयले तत्कालिन एसपी डिल्ली विष्टलाई केन्द्रमा तान्नुका साथै निलम्बनसमेत गरेको छ । यसैगरि प्रमुख जिल्ला अधिकारी कुमारबहादुर खडा, डिएसपी ज्ञानबहादुर सेटी, अनुसन्धान अधिकृत एकिन्द्र खडालाई केन्द्रमा तानेर प्रजिअसहित एसपी र डिएसपीसमेत नयाँ खटाएको छ । यसैगरि घट्नाको छानविनका लागि गृह मन्त्रालयका सह सचिवको नेतृत्वमा उच्चस्तरीय छानविन समिति गठन गरिएको छ । जिल्ला प्रहरी कार्यालयले डिएसपी कृष्णराज ओझालाई अनुसन्धान अधिकृत तोकेको छ ।

‘घट्ना भएको एक महिनापछि अनुसन्धान सुरु गर्दा केहि समस्या हुन्छ’ एसपी कडायतले भने, ‘घट्नास्थल देख्ने व्यक्तिले राम्ररी अनुसन्धान गर्न सक्छ, नदेख्नेलाई केहि समय लाग्छ ।’


खानेपानी मन्त्री विना मगर निर्मलाकि आमा दुर्गालाई दोषी पत्ता लगाएरै छाड्ने आश्वासन दिँदै । तस्बिर : भवानी भट्ट/कान्तिपुर

प्रकाशित : भाद्र २०, २०७५ १८:१८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सांसदले भने– राजधानी र नाम तोकौं 

राजधानी र नाम तोक्न ढिलाइप्रति सांसद असन्तुष्ट
लीलावल्लभ घिमिरे

विराटनगर — सरकारले प्रदेशको स्थायी राजधानी र नामांकन गर्न ढिलो गरेको भन्दै मंगलबारको प्रदेशसभा बैठकमा सदस्यले असन्तुष्टि पोखेका छन् । बैठकको विशेष समयमा बोल्दै उनीहरुले राजधानी र नाम तत्काल तोक्न माग गरे ।  

कांग्रेस संसदीय दलका प्रमुख सचेतक केदार कार्कीले सरकार गठन भएको ८ महिना पुग्न लाग्दापनि प्रदेशको स्थायी राजधानी र नामाङकनलाई प्रदेशसभा बैठकमा प्रदेश नगराको भन्दै विरोध गरे । ०७४ साल माघ ७ मा प्रदेशसभाका ९३ सदस्यले सपथ ग्रहण गरेका थिए भने फागुन ३ मा ५ सदस्य मन्त्री मण्डल गठन भएको थियो ।

‘हामी सबैलाई ढाँट्ने काम भयो,’ सचेतक कार्कीले भने, ‘मुख्यमन्त्री र अन्य मन्त्रीले स्थायी राजधानी र नामाङकनलाई साउनमा नै आउँछ भने पनि हालसम्म चासो नै छैन ।’ मुख्यमन्त्री र मन्त्रीहरु नेकपाको पार्टी एकिकरणमा लागेका कारण प्रदेशका महत्वपूण कामहरु समेत ओझेलमा परेको वताए । सरकार हावाको तालमा कुदी रहेको र जनतालाई हावाकै पोका मात्र वाढ्ने गरेको आरोप कार्कीको थियो ।

‘प्रदेश सरकारले गरेको एउटा निर्णय समेत कार्यान्यन हुन सक्दैन भने हामी कुन धरातलमा छौं भन्ने प्रश्न उठेको छ,’ कार्कीले भने, ‘प्रदेश सरकारले सार्वजनिक विदा दियो तर त्यसको कार्यान्यन हामी सदस्यले मात्र गरे जस्तो देखियो ।’ केन्द्रीय सरकारसंग राम्रो समन्वय नगरी विदा घोषणा गर्दा समस्या आएको भन्दै कार्कीले प्रदेश मातहतका कार्यालय मात्र बन्द हुँदा जनताले अनावश्यक दु:ख पाएको कार्कीको भनाइ थियो । संघ मातहतकै अदालत विदा हुन र अन्य कार्यालय विदा नहुनुको कारण कार्कीले मागेका थिए ।

यसैगरी सदनको शुन्य समयमा बोल्दै सदस्य सावित्राकुमारी रेग्मीले कोशी अञ्चल अस्पतालको स्तरोन्नती गर्न माग गरिन् । ‘दैनिक १२ सयभन्दा वढि विरामी उपचारका लागि आउने कोशी अञ्चल अस्पताल भौतिक रुपमा थलिएको छ,’ उनले भनिन्, ‘४० बर्ष अघिको आवश्यकता अनुसार बनाएका भौतिक संरचनाले हालको आवश्यकतालाई पुर्ती गर्न सक्दैन ।’

अर्की सदस्य सुनीताकुमारी चौधरीले असोज १६ मा थारुको पर्व सिरुवाका अवसरमा सार्वजनिक विदा दिन माग गरिन् ।

विपद् व्यवस्थापन विधेयक पारित
बैठकले विपद् व्यवस्थापन विधेयक पारित गरेको छ । विधेयकमा प्रदेशस्तरीय छुट्टै ‘विपद् व्यवस्थापन कोष’ स्थापना गर्ने अधिकार छ । आन्तरिक मामिला तथा कानुन मन्त्रालयले तयार पारेको उक्त विधेयकमा प्रदेशस्तरीय विपद् व्यवस्थापनका लागि छुट्टै कोष स्थापना गर्ने, विपद् संंकटग्रस्त क्षेत्रको घोषणा, विपद् व्यवस्थापन समिति, विशेषज्ञ समिति गठन लगाएतलाई समेटीएको छ ।

यसैगरी सदनमा पेस भएको ‘प्रदेशको कर तथा गैरकर राजश्व लगाउने र उठाउने सम्बन्धमा ब्यवस्था गर्न बनेको विधेयक’ को सामान्य छलफलमा उठेका प्रश्नको उत्तर दिदै आर्थिक मामिला तथा योजना मन्त्री इन्द्रवहादुर आङबोले जनताले इमान्दारीता पूर्वक कर तिर्दा मात्र बिकास सम्भव भएको वताए । प्रदेश अन्तर्गत कुनैपनि निकायमा लागेका दोहोरो कर खारेज हुने भन्दै मन्त्री आङले हाल आफ्नो मन्त्रालयले प्रदेश १ का १३७ वटा नै स्थानीय तहले बनाएका ऐनको अध्ययन गर्ने काम भइरहेको बताए ।


प्रकाशित : भाद्र २०, २०७५ १८:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT