पूर्व युवराज्ञी हिमानीकाे ट्रष्टले बनाएको विद्यालय भवन पूर्व रानी कोमलद्वारा हस्तान्तरण

धेरैपछि हिमानी र पारस एकै मञ्चमा
हरिराम उप्रेती

पालुङटार(गोरखा) — पूर्व राजपरिवारका सदस्य बिहीबार एकै मञ्चमा देखिए । पालुङटार नगरपालिका–५ ठाँटीपोखरीस्थित भवानी माविको विद्यालय भवन उद्घाटन कार्यक्रममा पूर्व रानी कोमल शाह, पूर्व युवराज पारस शाह र पूर्व युवराज्ञी हिमानी शाह सरिक भए । 

लामो समयदेखि सार्वजनिक स्थलमासँगै नदेखिएका पूर्व युवराज पारस र पूर्व युवराज्ञी हिमानीले सँगै तस्बिर समेत खिचाए । ‘हिमानी र पारस एकै मञ्चमा देखिनु ऐतिहासीक क्षण नै हो ।
पछिल्लो समय हामीले उहाँहरुलाई सँगै विरलै देखेका छौँ,’ पारिवारीक स्रोतले भन्यो, ‘हिमानी र कोमल बुधबार काठमाडौबाट सँगै आउनुभयो, मुग्लीनमा बास बसेर आज यहाँ आइपुगेका हौँ ।’

Yamaha

पारस भने फिस्टेल एयरको हेलिकप्टरबाट बिहीबार बिहान पालुङ्टार उत्रिएका थिए । पूर्व राजपरिवारका सदस्यहरुले स्थानीयहरु भेटघाट पनि गरे । स्थानीयहरुले धर्म र राष्ट्र जोगाउन भूमिका खेलिदीन आग्रह गरेका थिए ।

२०७२ वैशाख १२ को भूकम्पले भत्काएको भवानी माविको विद्यालय भवन हिमानी ट्रस्ट र बुद्घिष्ट अर्गनाइजेशनले संयुक्त रुपमा निर्माण गरेको हो । २०७३ मंसिर १९ गते ट्रस्टकी अध्यक्ष हिमानीले शिलन्यास गरेको भवनको उद्घाटन बिहीबार ट्रस्टकी संरक्षक पूर्व रानी कोमल शाहले गरिन् । भवन निरिक्षण गरेपनि पुर्वराजपरिवारका सदस्यले मन्तव्य भने राखेनन् ।

शिक्षा, स्वास्थ्य, वातावरण, दैविक प्रकोपमा आफुहरुले काम गर्दै आएको ट्रस्टको सदस्य सचिव श्री मल्लले बताइन् । ‘१४ महिनामा भवन निर्माण सक्ने लक्ष्यका साथ काम गरेका थियौँ, लक्ष्य भन्दा चार महिना अघि एक वर्षमै सकेर हस्तान्तरण गर्दैछौ,’ मल्लले भनिन् ।

११ सय ५० जना विद्यार्थी संख्या रहेको उक्त विद्यालयको २० कोठे भवन भूकम्पले भत्काएको छ । हिमानी ट्रस्टले चार करोड ९५ लाख खर्चेर आठ कोठे भूकम्प प्रतिरोधी सुविधा सम्पन्न विद्यालय निर्माण गरिदिएको विद्यालयका प्रध्यानाध्यापक ओजराज गिरीले बताए ।

‘एउटा विद्यालय भवन निर्माण सकियो, अर्को आठ कोठे भवन पनि उहाँहरुले नै वनाउने सम्झौता भइसकेको छ,’ गिरले भने । हाल विद्यालय भवन अभाव हुदा उत्त विद्यालयको कक्षा टहरोबाट संचालन हुँदै आएको छ । अर्को भवन नवनेसम्म अझै १० वटा कोठा टहरोबाटै संचालन गर्नुपर्ने वाध्यता रहेको गिरीले बताए ।




प्रकाशित : भाद्र २१, २०७५ १६:४७
ADVERTISEMENT
प्रतिक्रिया
पठाउनुहोस्
ADVERTISEMENT

खानेपानीमा सघाउँदै विदेशी स्वयंसेवी

गण्डकी गाउँपालिकाका २७ घरधुरीलाई खानेपानी उपलब्ध गराउन विदेशी स्वयंसेवी खटिँदै
हरिराम उप्रेती

गोरखा — गण्डकी गाउँपालिका ५ दर्बुङको रानीस्वाँरामा विदेशी युवाको समूह दुई महिनादेखि स्वयंसेवीका रूपमा गाउँलेलाई खानेपानी सेवा उपलब्ध गराउन खटेका छन् । उनीहरू २७ घरधुरीका लागि पाइप लाइन खन्न लागिरहेका हुन् ।

गोरखाको गण्डकी गाउँपालिका ५ दुर्बङस्थित रानीस्वारामा खानेपानीका लागि श्रमदान गर्दै विदेशी स्वयंसेवक । तस्बिर : हरिराम

शौचालय निर्माण र सरसफाइसम्बन्धी जनचेतना फैलाउनु तथा खानेपानीको मूल संरक्षण गर्नु स्वयंसेवक टोलीको उद्देश्य छ । गल, साबेल, कोदालो, गैंची लिएर १५ देखि ३० उमेर समूहका विदेशी नागरिक पाइप लाइन खन्न तम्सिएपछि यहाँका स्थानीयमा पनि जाँगर पलाएको छ ।

वर्षौंदेखि खानेपानीको संकट झेल्दै आएका स्थानीय पनि विदेशी टोलीसँगै श्रमदानमा खटेका छन् । खानेपानीका लागि एक गैरसरकारी संस्थाले ६ लाख १२ हजार र वडा कार्यालयले दुई लाख रुपैयाँ छुट्याएका छन् । योजनाका लागि निर्माण सामग्रीको लागतबाहेक ३ लाख ५४ हजार रुपैयाँको श्रमदान गर्नुपर्छ । ‘विदेशीसँगै काम गर्दा हामीलाई पनि जाँगर चलेको छ । उनीहरू समयको एकदमै ख्याल गर्दारहेछन्,’ स्थानीय घनबहादुर थापाले भने ।

समुदायको सहयोगबिना आफूहरूले काम गर्न नसक्ने उक्त स्वयंसेवक टोलीका रामपुकार महराले बताए । ‘हामीलाई यहाँका गाउँलेले पनि सहयोग गर्नुभएको छ । विदेशीहरू पनि यहाँको संस्कार, संस्कृति र माया देखेर खुसी हुनुहुन्छ,’ उनले भने, ‘हामीलाई काम गर्न अझै हौसला थपिएको छ ।’

विभिन्न देशमा रहेका नागरिकले जम्मा गरेको केही रकम बेलायतमा रहेको रैले इन्टरनेसनलमा जम्मा हुन्छ । काठमाडौंमा पनि उक्त संस्थाको शाखा छ । उक्त संस्थाले यहाँ स्वयंसेवक खटाउँदै आएको हो ।

गोरखामा गोरेटो गोरखासँग साझेदारी गरेर गण्डकी गाउँपालिकाको घ्याल्चोक र दुर्बङका जनतालाई खानेपानी उपलब्ध गराउन सन् २०१६ बाट उक्त संस्थाले काम गर्दै आएको छ । हालसम्म उक्त क्षेत्रका ५ सय ६२ घरधुरी खानेपानी सेवाबाट लाभान्वित भएको महराले बताए । यो वर्ष असार २१ बाट विदेशी नागरिक घ्याल्चोक र दुर्बङमा ६ समूह बनाएर खटिएका छन् ।

चालु वर्षमात्र सयभन्दा बढी घरधुरीमा खानेपानी सेवा उपलब्ध गराउने लक्ष्य लिइएको छ । दुर्बङको रानीस्वाँरा, राइथोक र डाँडागाउँ घ्याल्चोकको घ्यामुनटार, डुडे, मजुवा र सुन्दर बस्तीमा स्वयंसेवकले खानेपानी उपलब्ध गराउन श्रमदानमा गरिरहेका छन् । बेलायत, बर्मुडा, जापान र चीनलगायतका विभिन्न देशका स्वयंसेवक श्रमदानमा लागेका हुन् । ‘प्रत्येक समूहमा १४ स्वयंसेवक छन् । उनीहरूलाई आवास र खाने व्यवस्था हामीले गरेका छौं,’ गोरेटो गोरखाका कार्यक्रम संयोजक विनोद पाण्डेले भने, ‘हाल धेरैजसो घरमा धारा जडान भइसकेका छन् ।’

सन् २०१९ बाट कार्यक्षेत्र विस्तार गर्दै जाने योजना रहेको पनि उनले बताए । ‘घ्याल्चोक र दुर्बङका सबै ठाउँमा खानेपानी उपलब्ध गराउने हाम्रो लक्ष्य हो । यहाँ आएको भोलेन्टियरले प्याड बनाउन र लगाउन सिकाउने लगायतका सरसफाइका काम पनि गर्छन्,’ उनले भने ।

रोजगारीको सिलसिलामा युवा समूह विदेशिएका छन् । यहाँका धेरैजसो गाउँमा युवाशक्ति कमै भेटिन्छन् भने गाउँमा वृद्घवृद्घा र केटाकेटी मात्र धेरै छन् ।

प्रकाशित : भाद्र २१, २०७५ ०९:१२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT