बंगलादेशले नेपालबाट ९ हजार मेगावाट विद्युत किन्ने 

कान्तिपुर संवाददाता

काठमाडौँ — बंगलादेशले नेपालबाट ९ हजार मेगावाट विद्युत खरिद गर्ने भएको छ । उसले सन् २०४० भित्र ९ हजार मेगावाट नेपालबाट विद्युत खरिद गर्ने योजना अघि सारेको हो । बंगलादेशको उर्जा मन्त्रालय अन्तर्गतको पावर डिभिजनले सार्वजनिक गरेको योजनामा नेपालबाट २०४० भित्र ९ हजार मेगावाट विद्युत आयात गर्ने उल्लेख छ । 

नेपालका उर्जा, जलस्रोत तथा सिंचाई मन्त्रीबर्षमान पुन अहिले बंगलादेश भ्रमणमा छन्।

ढाकामा बिहीबारबाट सुरु भएको पावर एण्ड इनर्जी वीक सम्मेलनको उद्घाटन समारोहमा बोल्दै बंगलादेशकी प्रधानमन्त्री शेख हसिनाले नेपालबाट विद्युत आयात गर्ने योजना अघि बढेको भन्दै छिट्टै त्यसले मूर्त रुप लिने दाबी गरेकी थिइन्।

‘नेपाल र भुटानबाट विद्युत आयात गर्ने हाम्रो कोशिस जारी छ, नेपालसँग समझदारीमा हस्ताक्षर गरिसकेका छौं,’ उनले भनिन्। बंगलादेश, भारत र भुटानबीच छिट्टै त्रिपक्षीय समझदारीमा हस्ताक्षर हुने समेत उनले बताइन्।

नेपाल र बंगलादेशबीच तीन साता अघि काठमाडौंमा ऊर्जा सहकार्य सम्बन्धी समझदारीपत्रमा हस्ताक्षर भएको थियो। नेपालका उर्जामन्त्री वर्षमान पुन र बंगलादेशका उर्जामन्त्री नसरुल हमिदले उक्त समझदारीमा हस्ताक्षर गरेका थिए।

ढाकामा आयोजित कार्यक्रममा बोल्दै ऊर्जामन्त्री पुनले आगामी १० वर्षमा नेपालले १५ हजार विद्युत उत्पादन गर्ने योजना बनाएको भन्दै आफूहरु बंगलादेशमा विद्युत निर्यात गर्न तयार रहेको धारणा राखेका थिए।

बंगलादेशको ऊर्जा सप्ताहमा सहभागी हुन ढाका पुगेका ऊर्जामन्त्री पुनले शुक्रबार बंगलादेशकी प्रधानमन्त्री शेख हसिनासँग भेटवार्ता गर्नेछन्।

प्रकाशित : भाद्र २१, २०७५ १८:००
प्रतिक्रिया
पठाउनुहोस्

सिंहदरबारका कर्मचारीमा उच्च रक्तचाप र मधुमेहको समस्या बढी

कान्तिपुर संवाददाता

काठमाडौँ — सिंहदरबार भित्र कार्यरत सरकारी कर्मचारीहरुमध्ये धेरैमा उच्च रक्तचाप समस्या रहेको पाइएको छ भने त्यसपछि मधुमेह रहेको देखिएको छ ।

स्वास्थ्य मन्त्रालयले सिंहदरबारस्थिति हेल्थ डेक्समा निजामती सेवा दिवसको अवसरमा बिहीबारदेखी आयोजना गरेको दुई दिने रक्तचाप, मुटुरोग र मधुमेहसँग सम्बन्धित विशेष स्वास्थ्य शिविरमा उपचारार्थ आएकाहरु मध्ये यो समस्या धेरै देखिएको हो ।

करिव ६ हजार ५ सय कर्मचारी रहने सिंहदरबारमा गत वर्ष फागुन १५ गतेदेखी सरकारले हेल्थ डेस्क राखेको छ ।

‘यहाँको समस्या नै उच्च रक्तचाप र मधुमेह हो,’ हेल्थ डेस्क प्रमुख दिपक मुडभरीले भने, ‘आज १८०/१२० रक्तचाप देखिएकाहरुलाई आफूलाई उच्च रक्तचापको समस्या रहेको समेत थाहा थिएन ।’ उनले ६ महिना यता हेल्थ डेस्कमा आउने कर्मचारीहरु मुख्य रुपले उच्च रक्तचापको समस्या लिएर आउने गरेको बताए ।

बिहीबार शिविरमा आएका एक सय २० जना कर्मचारी मध्ये २० जना नयाँ उच्च रक्तचापको कर्मचारीलाई निरन्तर औषधि सेवन गर्नु पर्ने अवस्था देखियो भने १५ जना सुगरका बिरामी ठहर गर्दै चिकित्सकले नियमित रुपमा औषधि सेवन गर्नुपर्ने देखिएको थियो ।

यस शिविरमा वीर अस्पताल, मनमोहन कार्डियोथोरासिक, भास्कुलर एण्ड ट्रान्सप्लान्ट सेन्टरका विशेषज्ञ चिकित्सकहरुको सहभागिता थियो ।

प्रकाशित : भाद्र २१, २०७५ १७:५३
पूरा पढ्नुहोस्
प्रतिक्रिया
पठाउनुहोस्