प्रधानमन्त्री कार्यालयमै कुलपति डेस्क राख्ने तयारी

कान्तिपुर संवाददाता

काठमाडौँ — प्रधानमन्त्री केपी ओलीले विश्वविद्यालयको कुलपति हैसियतमा गर्ने कामको समन्वयका लागि छुट्टै डेस्क राख्ने तयारी गरेका छन् । सबै विश्वविद्यालयका कुलपति प्रधानमन्त्री हुने व्यवस्था छ ।

प्रधानमन्त्री कार्यालयका एक सचिवलाई विश्वविद्यालय हेर्ने गरी जिम्मेवारी तोक्ने तयारी छ ।

‘निर्णय भइसकेको छैन तर प्रधानमन्त्री कुलपति भएकाले विश्वविद्यालयहरूलाई सम्पर्क गर्न सजिलो होस् भनेर कुनै सचिवलाई जिम्मेवारी दिने कि भन्ने कुरा भइरहेको छ,’ प्रधानमन्त्रीका प्रेस सल्लाहकार कुन्दन अर्यालले भने । अहिलेसम्म विश्वविद्यालयका कुलपतिको छुट्टै सचिवालय हुँदैनथ्यो ।

Yamaha

विश्वविद्यालयको दैनिक प्रशासनिक र कार्यकारी काम उपकुलपति, रेक्टर र रजिस्ट्रारमार्फत हुने गर्छ । शिक्षामन्त्री सहकुलपति हुन्छन् । विश्वविद्यालयका काममा विवाद र अव्यवस्था देखिन थालेपछि सम्पर्क समन्वयका लागि प्रधानमन्त्रीले सचिवलाई जिम्मेवारी दिने तयारी गरेका हुन् ।

गत वैशाखमा कुलपतिको अध्यक्षतामा बस्ने त्रिविसभा बैठकबाट अनुचित खालको प्रस्ताव पारित गर्ने तयारी भएपछि प्रधानमन्त्री ओली विश्वविद्यालयका कामबाट झस्किएको उनीनिकट बताउँछन् ।

त्रिविसभा बैठकबाट त्रिवि प्राध्यापक संघका सभापति योगेन्द्रनारायण बडबडियाको ६ सय ७ दिन छुटेको हाजिर अनुमोदन गर्ने प्रस्ताव पेस गर्ने तयारी भएको थियो । उपकुलपति तीर्थ खनियाँले वर्षौंदेखि बिदा स्वीकृत नगराई बिनाहाजिरी बसिरहेका बडबडियाको हाजिर अनुमोदन प्रस्ताव गराउने तयारी गरेको समाचार प्रकाशित भएपछि ओली बैठकमा गएका थिएनन् । कुलपति नगएपछि त्रिविसभा बैठक बस्न सकेको थिएन ।

नेपाल संस्कृत विश्वविद्यालयका उपकुलपति कुलप्रसाद कोइरालाको क्यानडा भ्रमणको विषय पनि पछिल्लो समय विवादित बनेको छ । भ्रमण स्वीकृति नलिई कोइराला क्यानडा जान लागेको भन्दै उनलाई एयरपोर्टबाटै प्रधानमन्त्री निवास बालुवाटार पुर्‍याइएको थियो ।

यसलाई पनि समन्वयको कमजोरीले भएको भन्दै कुलपतिको उपस्थितिमा बस्ने बैठक
वा सम्पर्क र समन्वयका लागि प्रधानमन्त्री कार्यालयमा डेस्क बनाउन लागिएको हो ।

Esewa Pasal

प्रकाशित : भाद्र २२, २०७५ ०७:२७
ADVERTISEMENT
प्रतिक्रिया
पठाउनुहोस्
ADVERTISEMENT

पाइलट पढाउँदै नगरपालिका

हरि गौतम

रुकुम पश्चिम — आठबिसकोट नगरपालिका–५ का ललित भण्डारीसँग पाइलट बन्ने रुचि थियो । विदेश गई लिनुपर्ने पाइलट कोर्सका लागि पैसोको जोहो गर्न भने सकेका थिएनन् । वडा १० का गोविन्द केसीको चाहनालाई पनि आर्थिक अवस्थाले नै रोकेको थियो ।

दुवैको अप्ठेरो फुकाइदियो आठबिसकोट नगरपालिकाले । शैक्षिक कर्जा उपलब्ध हुने भएपछि भण्डारी र केसी दुवै पाइलट कोर्स गर्न फिलिपिन्स उड्ने तयारीमा छन् ।

उनीहरूमात्र होइन, नगरपालिकाले डाक्टर, इन्जिनियर पढ्न चाहने विद्यार्थीका लागि समेत निवेदन माग गरेको छ । ५ जनालाई यसअघि नै नर्स र ओभरसियर अध्ययनको चाँजो मिलाइसकेको छ । दक्ष र प्राविधिक जनशक्ति उत्पादन गर्न शैक्षिक कर्जा दिन थालिएको नगर प्रमुख गोर्खबहादुर केसीले बताए ।

शैक्षिक कर्जा पाउन आवश्यक धितो र त्यसका लागि आवश्यक शैक्षिक योग्यता भएको कागजात पेस गर्नुपर्नेछ । आठबिसकोट बचत तथा ऋण सहकारी संस्थाबाट शैक्षिक कर्जाको व्यवस्था नगरपालिकाले मिलाइदिएको हो । सहकारीबाट लिइएको ऋणको ब्याज नगरपालिकाले तिरिदिनेछ ।

शैक्षिक कर्जा लिएर अध्ययन गरेकाहरूले रोजगारी पाएपछि मात्रै कर्जाको सावाँ र ब्याज तिर्न थाल्नेछन् । आफू, परिवार र आफन्तको नाममा रहेको सम्पत्ति सहकारीमा धितो राखेर शैक्षिक कर्जा दिन थालिएको हो ।

ब्याज तिर्न नगरपालिकाले शैक्षिक कर्जा कोष स्थापना गरेको छ । ‘यो वर्ष कोषमा एक करोड राखिएको छ । उक्त रकम बढाउँदै लगिने केसीले जनाए ।

पाइलट तथा डाक्टर अध्ययन गर्न चाहनेलाई नगरपालिकाको सिफारिसमा सहकारीले ४० देखि ५० लाखसम्मको ऋण उपलब्ध गराउनेछ । त्यतिन्जेलसम्मको ब्याज नगरपालिकाको कोषबाट तिरिनेछ । ‘यसअघि पनि सरकारले दक्ष जनशक्ति उत्पादनका लागि धेरै खर्चेको छ,’ नगर प्रमुख केसीले भने, ‘तर दूरदराजमा काम गर्ने गरी खास जनशक्ति उत्पादन भएन । त्यसैले शैक्षिक ऋण दिएर प्राविधिक शिक्षा अध्ययनका लागि नगरपालिका अघि लागेको हो ।’

अन्तर्राष्ट्रिय बजारमा श्रमिक मात्रै होइन, अध्ययनका लागि पनि पठाउन सकिन्छ भन्ने सन्देशसमेत दिन खोजिएको नगर प्रमुख केसीले बताए । स्वदेश वा विदेश जुन ठाउँमा पनि डाक्टर र इन्जिनियर पढ्न इच्छुकमध्येका एक/एक जनालाई यसै वर्ष शैक्षिक कर्जा दिइनेछ ।

प्रकाशित : भाद्र २२, २०७५ ०७:२६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT