हस्तान्तरण नहुँदै चर्कियो

दुवै छेउका पिलर र सहायक सडक जोगाउन बनाइएका तारजाली पनि भत्किए
पवन यादव

सिमरा — सिमरा–कोल्हवी–रजैया खण्डअन्तर्गत बाराको जितपुर–सिमरा उपमहानगरपालिकास्थित दुधौरा नदीमा निर्माण भएको पक्की पुल हस्तान्तरण नहुँदै चर्किएको छ ।

सिमरा–कोल्हवी–रजैया खण्डअन्तर्गत बाराको जितपुर सिमरा उपमहानगरपालिकास्थित दुधौरा नदीमा निर्माण भएको पक्की पुल । ठेकेदार कम्पनीले पुल हस्तान्तरण गर्नुअगावै भत्किएर जीर्ण बनेको छ । तस्बिर : पवन

उपमहानगरको वडा ४ सिमरा र वडा १४ डुमरवाना जोड्ने पुल हस्तान्तरण नहुँदै बीच भागमा लामो चिरा परेको छ । पुलको दुवै छेउका पिलर र सहायक सडक जोगाउन बनाइएको तारजाली पनि भत्किएको छ । पुलको सहायक सडकमा ठूल्ठूला खाडल परेका छन् । ढलान बांगोटिंगो देखिएको छ । ४ वटा स्पाम पिलर रहेको पुलको लम्बाइ १ सय २ मिटर छ ।

ठेकेदारले गुणस्तरहीन काम गरेकाले पुलको अवस्था जोखिमपूर्ण बनेको स्थानीयको गुनासो छ । रिलाइट/मोना जेभी कन्स्ट्रक्सन वीरगन्जले ५ करोड ८३ लाख ४१ हजार ४ सय २६ रुपैयाँमा ठेक्का सकार गरी पुल बनाएको हो । १ वर्षको म्याद थप भएर २०७० असार ३२ सम्ममा निर्माण सम्पन्न गर्नुपर्ने थियो ।

Yamaha

निर्माणको म्याद गुजारेको झन्डै ५ वर्ष बित्दा पनि अझै निर्माण पूरा नभएको पुल शिलान्यास गरेका एमालेका स्थानीय नेता भरत खड्का बताउँछन् । ‘पुल गुणस्तरीय भएन,’ उनले भने, ‘ठेकेदारले गरेको निर्माण कार्यबाट हामी सन्तुष्ट छैनौं ।’ ठेकेदारले पुल ढलान गरेपछि पर्याप्त पानीले भिजाउन नसक्दा पुल चर्किन थालेको उनले बताए ।

योजना सम्झौतामा भनिएअनुसार ठेकेदारले काम नगर्दा पुलको अवस्था नाजुक बनेको हो । ‘पुल निर्माणको क्रममा निगरानी गर्न स्थानीय जनतालाईसमेत आग्रह गरेका थियौं,’ उनले थपे, ‘तर ठेकेदारको कामलाई पूर्ण रूपले निगरानी गर्न सकिएन ।’ पुलको निर्माण गुण स्तरीय बनाउन सम्बन्धित निकायले पनि चासो नदेखाएको डुमरवानाका भोजराज भट्टराईको भनाइ छ ।

‘जनताले तिरेको करबाट यसरी पुल र सडक निर्माण हुन्छ ?’ उनले भने, ‘जनताकै पैसाबाट निर्माण भएको भौतिक संरचना कसैले बिगार्न पाइँदैन ।’ ठेकेदारले आफ्नो फाइदाका लागि कमसल सामग्री प्रयोग गरी गुणस्तरहीन निर्माण गर्दा अहिले नै समस्या देखा पर्न थालेको उनको जिकिर छ ।

निर्माण अवधि सकिए पनि ठेकेदारले सम्झौताअनुसारको निर्माण पूरा नगर्दा पुल हस्तान्तरण हुन नसकेको डिभिजन सडक कार्यालय हेटौंडाका इन्जिनियर नितेश आचार्य बताउँछन् । ‘निर्माण फाइनल भएकै छैन,’ उनले भने, ‘ठेकेदारले एलडी कार्य ढिलो गरेको देखिन्छ ।’ बिम मर्मत पनि पूरा नगरेको अवस्था रहेको उनको भनाइ छ ।

पुलको ठेक्का लिएका रिलाइट/मोना जेभी कन्स्ट्रक्सनका सञ्चालक मुकेश चौरसियासँग पटक–पटक फोन सम्पर्क गर्दा उनको मोबाइल स्विच्ड अफ भएको जवाफ आयो ।

प्रकाशित : भाद्र २२, २०७५ ०८:०१
ADVERTISEMENT
प्रतिक्रिया
पठाउनुहोस्
ADVERTISEMENT

मितेरी पुल जीर्ण

भूषण यादब

वीरगन्ज — मुलुकको प्रमुख प्रवेशद्वार वीरगन्जलाई रक्सौलसँग जोड्ने मितेरी पुल लामो समयदेखि जीर्ण बनेको छ । झन्डै साढे दुई दशकअघि भारतले निर्माण गरिदिएको उक्त पुल मर्मत सम्भार अभावमा खण्डहर बन्दै गएको हो ।

सिर्सिया खोलामाथि निर्माण गरिएको पुलमा अहिले एक फिटभन्दा बढी गहिरा खाल्डाखुल्डी छन् । सामान्य वर्षामा पनि खाल्डामा पानी जमेर पोखरीजस्तै हुन्छ । जसका कारण पुलको दायाँ र बायाँ पैदल यात्रु आवतजावतका लागि निर्माण गरिएको पेटीमा साइकल, मोटरसाइकल र टेम्पो गुड्ने गरेका छन् ।

पुलमा पटकपटक दुर्घटनासमेत भएको छ । गत भदौ २ गते पुलमा जाम लागेको बेला मोटरसाइकलबाट लड्दा ट्यांकरको ठक्करले बारा बलिरामपुरका विनयराज गुप्ताको मृत्यु भएको थियो ।

पानी जमेका बेला घन्टौँ जाम लाग्ने गरेको छ । एम्बुलेन्स पनि फस्ने गरेको छ । मालवाहक सवारी, इन्धन बोक्ने ट्यांकर, टाँगा, टेम्पो, मोटरसाइकल, साइकलसँगै हजारौँ पैदलयात्रु उक्त पुलबाट आवतजावत गर्छन् । रक्सौलस्थित भारतीय आयल निगमबाट इन्धन लोड गरी ट्यांकरहरू यहीँबाट वीरगन्ज भित्रिने गरेका छन् ।

पर्सा क्षेत्र नम्बर एकका सांसद प्रदीप यादव, वीरगन्ज महानगरपालिका प्रमुख, प्रमुख जिल्ला अधिकारी, महानगरपालिकाका प्रमुख कार्यकारी अधिकृतलगायतले बुधबार बिहान मितेरी पुल अनुगमन निरीक्षण गरेका छन् । अनुगमनमा गएका टोलीलाई पैदल यात्रु, मोटरसाइकल र ट्रक चालकले पुलको जीर्णोद्धार गरिदिन आग्रह गरेका थिए ।

वीरगन्ज र रक्सौलबीच टेम्पो चलाउँदै आएका छपकैया निवासी शम्भु साहले पछिल्लो एक महिनामा टेम्पोको चेम्बर प्लेट तीनपल्ट फेरेको बताए । ‘पानी जमेको बेला कतापट्टि बढी खाल्डो छ भनी अनुमान लगाउनै सकिँदैन,’ उनले भने, ‘जसले गर्दा चेम्बर भुइँमा ठोकिएर फुट्ने गरेको छ ।’ उनका अनुसार एउटै चेम्बरको २ हजार रुपैयाँ पर्छ । ‘अहिले पुल वारि नै यात्रुलाई ओराल्छौँ,’ पुलमै भेटिएका साहले भने, ‘पारि जाने हिम्मत आउँदैन ।’

अनुगमनका क्रममा सांसद यादवले पुल मर्मत सम्भारका लागि तत्काल भौतिक पूर्वाधारमन्त्री रघुवीर महासेठलाई फोनमा सम्पर्क प्रयास गरेका थिए । उनले तत्काल खाल्डाखुल्डी पुर्न महानगर प्रमुख विजय सरावगीलाई आग्रह गरेका थिए ।

हाल खोलाबाट ढुंगा निकाल्ने अनुमति नभए पनि कतैबाट व्यवस्था गरिने आश्वासन उनले दिएका थिए । गत वैशाखमा भौतिक पूर्वाधारमन्त्री महासेठ वीरगन्ज आउँदा मितेरी पुल मर्मत गर्ने आश्वासन दिए पनि हालसम्म केही भएको छैन । पूर्वप्रधानमन्त्री पुष्पकमल दाहाल नेपाल उद्योग वाणिज्य महासंघको कार्यक्रममा वीरगन्ज आएका बेला यहाँका व्यवसायीले पुल मर्मत गराउन ध्यानाकर्षण गराएका थिए ।

प्रकाशित : भाद्र २२, २०७५ ०७:५६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT