चरा ठोकिएपछि निगमको एयरबस ग्राउन्डेड 

सुरज कुँवर

काठमाडौँ — मलेसियाको राजधानी क्वालालामपुरबाट १ सय ५८ यात्रु बोकेर आइपुगेको नेपाल वायु सेवा निगमको एयरबस ३२० (नाइनएन–एकेडब्लु) जहाजमा बिहीबार राति अवतरणका क्रममा चरा ठोकिएपछि ग्राउण्डेड भएको छ ।

नेपाली नाम ‘सगरमाथा’ दिइएको उक्त न्यरोबडी जहाज काठमाडौं उत्रिए लगत्तै दुबई जानुपर्ने तालिका रहेको थियो। तर, उक्त जहाज राति मर्मत गरी उडाउन नसकिने भएपछि १ सय ४३ जना यात्रुहरुलाई शुक्रबार अर्को विमानमा उडाउने तयारी भइरहेको निगमको एक अधिकारीले बताए।

Yamaha

दुबईकालागी राति नै अर्को विमान उडान गर्न नसकेपछि निगमले यात्रुहरुलाई गौशाला आसपासका काबेली, कल्पवृक्ष र राजस्थान नामका तीनवटा होटलमा राखेको थियो।

‘जहाजको बायाँ पखेटाको एयरफ्रेममा चरा ठोकिएको रहेछ,’ स्रोतले भन्यो, ‘पाइलटहरुले थाहै पाएनछन्।’ उक्त विमानका कमाण्डर विजय लामा थिए भने कोपाइलटमा अरविन्द पहाडी र अनुप मानन्धर थिए। ती कर्मचारीका अनुसार, जहाज पार्किङकाबेला इन्जिनियरहरुले निरीक्षण (पोष्ट ल्याण्डिङ्ग चेक) गर्दा पखेटामा प्वाल देखेका थिए। यो विमान साढे ८ बजे काठमाडौंमा अवतरण भएको थियो।

निगमले ०७१ माघमा सगरमाथा र ०७२ बैसाख लुम्बिनी नामका दुईटा न्यरोबडी विमान ल्याएको थियो। हाल निगमसग थप दुईटा वाइडबडी विमान पनि थपिएका छन्। अन्तर्राष्ट्रिय उडानमा एउटा बोइङसहित निगमसँग ५ वटा विमान छन्। यीनले भारत, मलेसिया, थाइल्याण्ड, हङ्गकङ्ग, कतार र दुवईका आठ गन्तव्यमा उडान भर्दै आएका छन्।

यसैबिच निगमका महाप्रबन्धक सुगतरत्न कशांकारले एयरबससँग छलफल गरी बिहीबार राती ग्राउन्डेड भएको विमान मर्मत गरेरमात्रै उडाउनुपर्ने भएकाले यो विमान केहिदिन ग्राउन्डेड हुने बताएका छन्।

निगमको विमान ग्राउन्डेड भएका केही घटनाहरु
निगमसँग भएका दुईटा एयरबस न्यरोबडी विमानमध्ये काठमाडौंमा चरासँग ठोकिएर जहाज ग्राउन्डेड भएको यो दोस्रो घटना हो। यसअघि ०७३ असारमा निगमको ‘लुम्बिनी’ नाम दिइएको न्यारोबडी विमानमा चरा ठोक्किँदा ११ दिन काठमाडौंमै ग्राउन्डेड हुन पुगेको थियो।

क्याप्टेनद्वय रविन्द्रपुरुष ढकाल र प्रदीप राजभण्डारीले हङकङकालागी उडाउन लाग्दा भएको उक्त घटनामपछि मर्मत गर्न कम्तीमा एक करोड खर्च लागेको थियो। विमान मर्मत गर्न एयरबसले आफ्ना इन्जिनियर काठमाडौं पठाएको थियो।

चरासँग ठोकिएको एक महिनापछि उक्त न्यरोबडी विमानको दिल्लीबाट काठमाडौं आउँदा धावनमार्गमा पांग्रा ब्रस्ट भएको थियो। क्याप्टेन विजय लामाले कमाण्ड गरेको विमानले टचडाउनपछिको रोल गरिरहेको बेला पछाडिको बाया पांग्रा ब्रस्ट भएको देखिएपछि विमानस्थलको टावरमा रहेका एयर ट्राफिक कन्ट्रोलरले पाइलटलाई सावधान गराउँदै विमान रोकाएका थिए।

त्यसदिन एक घन्टा विमानस्थल बन्द गर्नुपरेको थियो भने एक दर्जन उडान डाइर्भट भएका थिए। यात्रुलाई पार्किङवेमा नल्याई टेयाक्सीवेमै ओर्लानु परेको थियो।

यसअघि ०७२ असोजमा हङकङबाट काठमाडौंकालागी तय भएको उडानमा क्याटरीङको गाडीले निगमको एयरबसको पछाडीको भागमा ठोकेर प्वाल पारिदिएपछि यो विमान हङकङमा एक साता ग्राउन्डेड भएको थियो।

यात्रु बोर्डिङ गराउनेक्रममा भएको उक्त घटना इन्जिनियरले निरीक्षण (प्रि–टेकअफ इन्सपेक्सन) का क्रममा पत्ता लगाएपछि थाहा पाइएको थियो। निगमका अनुसार, इन्जिनियरले बेलैमा जानकारी नगराएको भए ठुलो दुर्घटना हुनसक्थ्यो। उक्त उडानमा क्याप्टेन विजय लामा नै थिए भने लुम्बिनी नामकै विमानमा यो घटना भएको थियो।

क्याप्टेन लामाले ०७३ कार्तिकमा इन्जिनको काउलिङ्गमा रहने रिर्भसर लक नझिकेरै काठमाडौंबाट दुवईको उडान गरेका थिए। ‘क्याप्टेन लामाले पनि भेउ नै पाएन छन्। उताका विदेशी इन्निनियरले अटोम्यासेज हेरेर थाहा पाएपछी लक झिकियो,’ निगमका एक अधिकारीले भने, ‘यदी काठमाडौं जस्तो सानो धावनमार्ग भइदिएको भए दुर्घटना हुनसक्थ्यो।’ यसमा इन्जिनियरको पनि कमजोरी देखिन्छ।


बिहीबार चरासँग ठोक्किएको विमानमा तीनपटक इन्जिनमा गम्भीर समस्या ब्यहोर्दै कम्तीमा एक सातादेखी दुई महिनासम्म ग्राउन्डेड हुँदै आएको निगमको दोस्रो न्यारोबडी विमान सगरमाथा हो।

निगमका अनुसार, यही विमानको इन्जिनमा समस्या देखिएपछि साउनमा कतारको राजधानी दोहामा करिब दुई साता ग्राउन्डेड भएको थियो। उक्त उडानमा क्याप्टेन गौतम बेनर्जी र कोपाइलट अरविन्द पहाडी थिए।

त्यसअघि जेठमा क्याप्टेन नरबहादुर विश्वकर्मा र कोपाइलट अरविन्द पहाडीले नै दिल्लीकालागी गरेको उडानमा विमानको कम्प्रेसर भेनमा समस्या देखिएपछि एक साता त्यहाँ ग्राउन्डेड भएको थियो।

सबैभन्दा धेरै यो विमान भारतमा दुई महिना थन्किएको थियो। क्याप्टेन श्रवण रिजालले कमाण्ड गरेको विमानको इन्जिन अन्र्तगत टरबाइन कम्प्रेसर तथा भेनमै समस्या आएपछि गत वर्ष (०७४–पुस) मा दिल्लीस्थित इन्दिरा गान्धी अन्तर्राष्ट्रिय विमानस्थलमा ग्राउन्डेड भएको थियो। यी घटनाको छानबिन गर्न पर्यटन मन्त्रालयले सहसचिव सुरेश आचार्यलाई तोकेको थियो। तर, उनको समितिले अहिलेसम्म प्रतिवेदन सार्वजनिक गरेकै छैन।

सगरमाथा नामको यो विमानमा देखिएका यी प्राविधिक घटनाअघि सबैभन्दा पहिले ०७३ भदौं २६ गते आफ्नै टायरबाट उप्किएको चोक्टा उछिट्टीएर पखेटामा हुने फ्ल्याप र अन्य सेन्सर सिस्टम ड्यामेज भएपछि क्याप्टेन सुवर्ण अवालेले काठमाडौंकालागी उडेको २५ मिनेटमै दिल्ली विमानस्थलमा आकस्मिक अवतरण गराएका थिए।

Esewa Pasal

प्रकाशित : भाद्र २२, २०७५ १३:२७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

प्रवासी नेपालीहरुको समस्या चाँडै सम्बोधन हुन्छ : दाहाल

‘पूरक बजेट ल्याएर थप लोकप्रिय कार्यक्रम लागू हुनेछ’
सुरेशराज न्यौपाने

नयाँदिल्ली — पूर्व प्रधानमन्त्री तथा नेकपा अध्यक्ष पुष्पकमल दाहालले नेपाल र भारतबीच पछिल्लो समय विकसित भएको सम्बन्धलाई सदुपयोग गर्न सके वर्षौदेखि जेलिएर रहेका प्रवासी नेपालीका समस्याहरु सहजै समाधान हुने दाबी गरेका छन् । 

भारतको तीन दिने भ्रमणमा रहेका दाहालले शुक्रबार बिहान दिल्लीस्थित नेपाली दूतावासमा प्रवासी नेपालीहरुसँगको भेटमा उक्त कुरा बताएका हुन्।

दाहालसँगको भेटमा दिल्लीस्थित प्रवासी नेपालीहरुका छाता संगठनका प्रतिनिधिहरुले भारतमा भोग्नु परेका समस्याहरुका बारेमा जानकारी गराएका थिए। बैंक खाता, श्रम सुरक्षा, सीमामा हुने लुटपाट जस्ता समस्याहरु यथावत रहेको हुँदा त्यसलाई सम्बोधन गर्नका लागि पहल गरिदिन ती प्रतिनिधिहरुले दाहाललाई आग्रह गरेका थिए।

उनीहरुलाई आश्वस्त पार्दै दाहालले भने, ‘प्रवासी नेपालीहरुका समस्या थुप्रै छन्। सबै समस्या एकैपटक समाधान हुन नसके पनि अहिले दुईदेशबीचको सम्बन्ध जसरी विकास भएको छ, यो अवसरलाई अधिकतम सदुपयोग गर्नुपर्छ भन्नेमा दुवै पक्ष गम्भीर छौं।’

यस विषयमा हिजो साँझ भारतीय सुरक्षा सल्लाहकार (एनएसए) अजित डोभलसँगको डिनर भेटमा पनि छलफल भएको उनले बताए। ‘भारतमा काम गर्ने नेपालीहरुले घर फर्कदाँ कस्तो सन्देश लिएर जान्छन् भन्ने बारेमा पनि सकारात्मक छलफल भयो। नेपालीहरुले भारतबाट जाँदा सकारात्मक सन्देश लैजान सकारात्मक वातावरण बनाउन अहिले परिस्थिति अनुकूल भएकोमा पनि हामीबीच सहमति रह्यो।’ डोभल र दाहालबीच एनएसएकै कार्यालयमा करीब तीन घन्टा ‘वान इन वान’ वार्ता भएको थियो।

त्यसैगरी शुक्रबार अपरान्ह गृहमन्त्री राजनाथ सिंहसँग हुने भेटमा र भोली भारतका प्रधानमन्त्री तथा परराष्ट्रमन्त्रीसँग भेटमा प्रवासीहरु नेपालीहरुका समस्याका बारेमा आफूले छलफल गर्ने उनले बताए।

साथै नेपाल–भारत प्रबुद्ध समूहले दिएको सुझाव प्रतिवेदनको कार्यान्वयनले पनि प्रवामा रहेका नेपालीहरुले वर्षौंदेखि उठाउँदै आएका समस्याहरु सम्बोधनमा अहम् भूमिका खेल्न सक्ने विश्वास व्यक्त गरेका छन्।

नेपाल र भारतबीचका सम्बन्धहरुमाथि प्रबुद्ध समूहमार्फत बौद्धिक विमर्श हुनुलाई आफूले निकै सकारात्मक ढंगले लिएको र सुझाव प्रतिवेदनको कार्यान्वयनबाट प्रवासी नेपालीहरुको चासो र चिन्ता सम्बोधन हुनेमा आफू विश्वस्त रहेको समेत उनले बताए।

‘पूरक बजेट ल्याएर थप लोकप्रिय कार्यक्रम लागू हुनेछ’

तीन दिने भारत भ्रमणमा रहेका नेकपाका अध्यक्ष पुष्पकमल दाहालले पूरक बजेट ल्याएर भएपनि वृद्ध भत्ता वृद्धि सहितका लोकप्रिय कार्यक्रम लागू हुने बताएका छन् ।

वाम गठबन्धनको चुनावी घोषणापत्रमा समावेश गरेको मासिक दुई हजारको वृद्ध भत्तालाई बढाएर पाँच हजार पुर्‍याउने प्रतिबद्धता जनाएको थियो । तर, गत १५ जेठमा अर्थमन्त्री युवराज खतिवडाले चालू आर्थिक वर्षको बजेटमा वृद्ध भत्ता बढाएका थिएनन् ।

‘जनतालाई यो सरकारले केही गर्छ भन्ने विश्वास दिलाउन पनि केही लोकप्रिय कार्यक्रम नल्याइ भएको छैन । यसमा पार्टीमा समझदारी बनिसकेको छ र चाँडै नै निर्णय हुनेछ,’ पूर्वप्रधानमन्त्री तथा सत्ताधारी दल नेकपाका अध्यक्ष दाहालले भने ।

यस वर्षको बजेटबाट वृद्ध भत्ता वृद्धि गर्न सम्भव नभएको हुँदा नेकपाभित्र पूरक बजेटको बहस सुरु भएको हो । तर, आर्थिक मामिलाका जानकारहरुले चालू आर्थिक वर्षको बजेट पूर्णरुपमा कार्यान्वयन नजाँदै लोकप्रिय कार्यक्रम ल्याउने बहानामा पूरक बजेट ल्याउँदा वित्तीय अराजकता निम्तिनेतर्फ सजग रहन सरकारलाई आग्रह गर्दै आएका छन् ।

दाहालले पूरक बजेटका सम्बन्धमा नेकपाको नेतृत्व तहमा समझदारी बनिसकेको समेत खुलासा गरेका छन् । शुक्रबार बिहान नयाँदिल्लीको बारखम्बास्थित नेपाली दूतावासमा पार्टीको प्रवास संगठनका पदाधिकारीहरुले सरकारको कार्यसन्चालनप्रति असन्तुष्टि व्यक्त गरेपछि दाहालले प्रतिक्रिया स्वरुप यस्तो बताएका हुन् ।

दाहालसँगको भेटमा नेकपाका प्रवास संगठनका प्रतिनिधिहरुले दुई तिहाई सरकारको नेतृत्व गरेर पनि प्रभावकारी काम गर्न नसकेको हुँदा ऐतिहासिक अवसर गुम्ने हो कि भन्ने तर्फ सचेत हुन आग्रह गरेका थिए । त्यसको जवाफमा दाहालले जनताले काम गर्नका लागि पर्याप्त अभिमत दिए पनि जनताको भावनाअनुसार कहाँनेर काम गर्न सकेनौँ भनेर समीक्षा भइरहेको जनाए ।

‘वर्तमान सरकारलाई पाँच वर्षसम्म कसैले हल्लाउन सक्दैन । बरु आफूहरुले नै कति काम गर्न सक्छौँ भन्नेमा चिन्ता भने छ,’ उनले भने, ‘जनताको लोकप्रिय मागहरुलाई सम्बोधन गर्ने कुरा होस् वा विकास निर्माणमा कहाँ केन्द्रित हुने ? कर प्रणालीलाई कसरी अगाडि बढाउँदा प्रभावकारी हुन्छ ? एकैपटक गर्दा नकारात्मक सन्देश पो गयो भन्ने हाम्रो विश्लेषण छ ।’

त्यसैगरी सरकारको छ महिनाको कार्यशैलीमाथि पनि गम्भीर समीक्षा भइरहेको र चाँडै नै ठोस निर्णय लिइने दाहालको भनाई थियो । ‘हामी दुई अध्यक्ष र सचिवालयमा पनि समीक्षा सुरु भएको छ । जनतालाई परिवर्तनको अनुभूति गराउन र उनीहरुको माग सम्बोधन गर्न पनि ठोस कदम चाल्नुपर्ने देखिएको छ,’ चाँडै नै सरकार पुर्नगठन हुने समेत संकेत गर्दै उनले भने ।

प्रकाशित : भाद्र २२, २०७५ १३:०८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT