ग्यास बुलेट रक्सौलमा अलपत्र

भूषण यादव

रक्सौल(भारत) — सीमावर्ती भारतीय प्रहरीको ज्यादतीले नेपालका लागि खाना पकाउने एलपीजी ग्यास बोकेर आउने एक सय ७५ बुलेट गाडी तीन दिन देखि अलपत्र परेका छन् ।

रक्सौलभन्दा करिब ११ किलोमिटर दक्षिण गम्हरियामा एलपीजी ग्यास भारतको राष्ट्रिय राजमार्गको दाँया बाँया रोकिएका छन् ।

Yamaha


गत बुधबार रक्सौल थानाका प्रहरीले आइसीपी जाने क्रममा सुरुमा १६ वटा एलपीजी बुलेटका चालकसँग कागजपत्र खोसेको थियो । त्यसपछि अन्य चालकपनि आइसीपीतर्फ आउन मानेका छैनन् । चालकका अनुसार ओभरटेक गरेको आरोपमा प्रहरीले कागजपत्र लिएर थानामा सम्पर्क गर्न भनेको थियो ।

सडकमा गाडी पार्क गरी लगातार तीन दिनसम्म थाना धाउँदा पनि प्रहरीले कागजपत्र नदिएको चालकले गुनासो गरेका छन् । बुधबारपछि आएका एलपीजी बुलेटका गाडीहरु उतै रोकिएका छन् । प्रज्वलनशील पदार्थ बोकेका गाडी ठाउँ पाउने बित्तिकै ओभेरटेक गरेर अगाडि बढने यसअघि सहमति भएको चालक दाबी गर्छन् ।

गत चैतमा नेपालतर्फको आइसीपी सञ्चालनमा आएपछि एलपीजी बुलेट रक्सौल बजार नभई लक्ष्मीपुरबाट बाइपास सडक हुँदै आइसीपी पुग्ने गरेका छन् । यसअघि बजार क्षेत्र भएर जाँदा रक्सौल थानाले प्रति बुलेट तीन सय भारतीय रुपियाँ असुल्दै आएको थियो ।

चैतदेखि बाटो परिवर्तन भएपछि चालकहरुले अतिरिक्त रकम दिन छाडेका थिए । सम्वद्ध स्रोतका अनुसार प्रहरीले पुन: पैसा लिनका लागि अनावश्यक दु:ख दिएको हो । दैनिक करिब ३५ देखि ४० एलपीजी बुलेट जाँचपास हुने नाकामा विगत ३ दिनदेखि एउटा एलपीजी बुलेटपनि नआएको वीरगन्ज भन्सार एजेन्ट संघका अध्यक्ष बालकृष्ण बस्नेतले जनाए ।

नेपाल आयल निगमले वीरगन्जस्थित भारतीय महावाणिज्य दूतावासलाई ध्यानाकषर्ण गराएपछि शुक्रबार अपरान्ह रक्सौल प्रहरी १६ वटा गाडीको कागजात लिएर आफै गम्हरीया पुगेको थियो । चालकहरु बसेका एक लाइन होटलमा प्रहरीले कागजात बुझेर गाडी लिएर जान भनेका थिए ।

चालहरुले आइन्दा दु:ख नदिने लिखित आश्वासन दिए मात्र गाडी अगाडि बढाउने जवाफ दिएका थिए । ‘आइसीपी पुगुन्जेल रक्सौल थाना, हरैया थाना र एसएसबी चेक प्वाइन्ट पर्छ,’ एक चालकले भने, ‘एकजनालाई पैसा दिए तीन ठाउँमै दिनुपर्छ । गत चैत अगाडि रक्सौल बजार भएर गाडीहरु भन्सार पुग्दा प्रहरीले धकेडिया (प्रहरीको पैसा संकलनकर्ता) मार्फत पैसा उठाउने गरेका थिए ।’

नेपाल आयल निगम वीरगन्जका प्रमुख जगदीश यादवले बुधबार रक्सौल प्रहरीले कागजात लिएदेखि बुलेट गाडी नआएको बताए । ‘ओभरटेकको आरोपमा कागजपत्र लिएका थिए,’ उनले भने, ‘अहिले कुरा मिलीसकेको जानकारी पाएका छौँ, बेलुका सम्म एलपीजी गाडी आउँछन् ।’

यसैगरी नेपाली तेल उद्योगका लागि हल्दियाबाट कच्चा तेल बोकेर आउने गाडी पनि कागजपत्र बिना अड्किएका छन् । तेल बोक्ने ५० वटा गाडी गत शनिबारदेखि अलपत्र परेका हुन् । ‘आइसीपी जाने क्रममा प्रहरीले ट्राफिक नियम उल्लघंन गरेको भन्दै कागजपत्र लियो,’ चालक निरन्जन सिंहले भने, ‘कागज पाउने आशमा सुरुमा दिनको चार सय ७२ भारतीय रुपियाँ तिरेर ४ दिन आइसीपीको पार्किङमा गाडी राख्यो, त्यसपछि चलानकै भरमा भन्सारमा गाडी जाँचपास गराई नेपालको उद्योगमा अनलोड गर्‍यो ।’

अनलोड गरेर आएको पनि ३ दिन बितिसक्यो तैपनि प्रहरीले कागजात दिन नमानेको उनले गुनासो गरे । ओभरटेक गरेबापत जरिवाना गरी छाड्नुपर्नेमा विगत एक सातादेखि कागजपत्र लिएर अलपत्र पारेको चालकहरुले गुनासो गरेका छन् । नेपालमा कच्चा तेल अनलोड गरी फर्किएका चालक दिनहुँ थाना धाइरहेका छन् । ‘थाना जाँदा यताबाट सवारी पाउँछ,’ नितेन्द्र सिंहले भने, ‘थानामा कुर्दा कुर्दै राति भइसक्छ, उताबाट पैदल फर्किन्छौँ ।’

प्रकाशित : भाद्र २२, २०७५ १८:२२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

रोकिएन हुन्डी कारोबार

वीरगन्जको रानीघाट, बिर्ता र घडीअर्वा क्षेत्रमा आइतबार छापा मारी अवैध कारोबार गर्नेलाई प्रहरीले नियन्त्रणमा लिएको थियो
भूषण यादव

वीरगन्ज — अवैध वित्तीय कारोबार (हुन्डी) सञ्चालन गरेको आरोपमा दुई भारतीयसहित ५ जनालाई पर्सा प्रहरीले पक्राउ गरेको छ ।

पक्राउ पर्नेमा पर्साको बिन्दवासनी गाउँपालिका ५ प्रसौनी निवासी पवनकुमार गुप्ता, वीरगन्ज महानगरपालिका जेलरोड निवासी अजय मानन्धर, बाराको सिम्रौनगढ नगरपालिका वडा नम्बर १ खजानी निवासी अजय जैसवाल, सीमावर्ती बिहारको मोतीहारी चम्पापुर निवास साबिर मियाँ र रक्सौल निवासी अशोक श्रीवास्तव छन् ।

उनीहरूबाट ५४ लाख ९६ हजार नगद चार थान मोबाइल, डायरी र अन्य कागजात बरामद भएको पर्सा प्रहरीका प्रवक्ता सत्यनारायण थापाले बताए । जिल्ला प्रहरी कार्यालय पर्साले सोमबार पत्रकार सम्मेलन गरी हुन्डी कारोबारमा संलग्न रहेकालाई सार्वजनिक गरेको हो ।

वीरगन्जको रानीघाट, बिर्ता र घडीअर्वा क्षेत्रमा आइतबार छापा मारी अवैध कारोबार गर्नेलाई प्रहरीले नियन्त्रणमा लिएको थियो । थप अनुसन्धानका लागि राजस्व अनुसन्धान विभाग हरिहर भवन पुलचोक ललितपुर पठाउने जिल्ला प्रहरी कार्यालयले जनाएको छ ।

यसैगरी गत असार २४ मा प्रहरीले वीरगन्ज महानगरपालिकाको रानीघाट निवासी महेश केशरीको घरमा छापामारी स्रोत नखुलेको १ करोड १५ लाख रुपैयाँ र विभिन्न कागजात बरामद भएको गरेको थियो ।

अवैध रूपमा वित्तीय कारोबार सञ्चालन भइरहेको सूचनाको आधारमा प्रहरीले हुन्डी कारोबारमा संलग्न रहेको आरोपमा प्रहरीले राहुल केशरीलाई नियन्त्रणमा लिएको थियो । करिब साढे ६ महिनाअगाडि पनि पर्सा प्रहरीले वीरगन्ज महानगरपालिकाको घण्टाघरदेखि बसपार्कजाने लिंकरोडमा रहेको दक्षिणकाली अटो पार्टसमा छापा मारी करिब ५६ लाख रुपैयाँ नगदसहित आधा दर्जन बैंकका तीन दर्जन चेकबुक, मोबाइल र कागजात बरामद गरेको थियो ।

मोटर पार्टसको पसलबाट ठूलो परिमाणमा हुन्डी कारोबार हुँदै आएको सूचना आएपछि प्रहरी आफैं सादा पोसाकमा पैसा पठाउन (पैसा हुन्डी गर्न) का लागि गएको थियो । प्रमाणसहित हुन्डी कारोबारीलाई नियन्त्रणमा लिने उद्देश्यले एक सादा पोसाकका प्रहरीलाई २ लाख रुपैयाँ दिएर उक्त अटो पार्टसको पसलमा पठाइएको थियो । त्यहाँ बसेका एक करोबारीले पैसा हुन्डी गरेबापत १ लाखको ५ हजार रुपैयाँ कमिसन लाग्ने बताएका थिए ।

अवैध कारोबारको प्रमाण जुटेपछि प्रहरीले पसल सञ्चालकसहित ४ जनालाई नियन्त्रण लिएको थियो । करिब साढे २ वर्षअगाडि पनि प्रहरीले वीरगन्जको रेसम कोठीबाट १ करोड ३२ लाख ७८ हजार रुपैयाँसहित हुन्डी कारोबारीलाई नियन्त्रणमा लिएको थियो । पछिल्लो १० महिनामा वीरगन्जबाट १२ जना हुन्डी कारोबारी पक्राउ परिसकेका छन् ।

फस्टाउँदै हुन्डी
मुलुकको प्रमुख व्यापारिक तथा आर्थिक नगर वीरगन्जमा विगत लामो समयदेखि हुन्डी कारोबार फस्टाएको हो । व्यवसायीका अनुसार मुलुकको प्रमुख भन्सार नाकासमेत भएको यहाँ आयातित वस्तुको न्यून मूल्यांकन गरी प्रतीतपत्रमार्फत थोरै रकम पठाउने र ठूलो रकम हुन्डीबाट पठाउने प्रचलन बढी छ ।

ती व्यवसायीले भने, ‘न्यून बीजकीकरण गरी सामान आयात गर्ने व्यवसायीले भन्सारमा घोषणा गर्ने रकम बराबरको प्रतीतपत्र (एलसी) खोलेर बाँकी रकम हुन्डीमार्फत पठाउँछन् ।’ भारतबाट नेपालमा निकासी गर्न रोक लगाइएका खाद्यान्न, मलको पैठारीकर्ताले पनि भुक्तानीका लागि हुन्डीमार्फत रकम पठाउँछन् । अनधिकृत व्यक्तिले पैसाको गैरकानुनी स्थानान्तरण गर्ने व्यापारीलाई थाहा भए पनि विश्वासिलो र सुविधायुक्त भएको तर्क दिने गरेका छन् ।

हप्तामा दुईपटक हुन्डीमार्फत ठूलो रकम दिल्ली पठाउने एक कपडा व्यवसायीले पैसा बुझाएको २ देखि ४ घण्टाभित्रै भनेको ठाउँमा पैसा बिनाझन्झट पुग्ने गरेको बताउँछन् । दुई देशबीच हुन्डीमार्फत समानान्तर बैंककै हाराहारीमा कारोबार भइरहेको छ । सुन, कपडा, खाद्यान्न, मोटर पार्टस, हार्डवेयरका व्यवसायीले पनि हुन्डीमार्फत पैसा पठाउने गरेका छन् ।

बिनाझन्झट र कम समयमा भनेको ठाउँमा पैसा पाइने हुनाले व्यापारीको हुन्डीमा आकर्षण बढेको व्यवसायीको दाबी छ । ‘मुख्य कारोबारीले पैसा पठाउने (ग्राहक) लाई भारतीय १० रुपैयाँ नोटको नम्बर र पैसा दिने व्यक्तिको सम्पर्क नम्बर दिन्छन्,’ एक कारेबारीले भने, ‘ग्राहकले सोही नम्बरमा फोन गरेर नोटको नम्बर भनेपछि उताबाट म्यासेज आएको जवाफ आउँछ । निर्धारित समय र ठाउँमा बोलाएर नोटको नम्बर हेरी रकमको भुक्तानी हुन्छ ।’ नोटमा भएको नम्बरले चेकको काम गर्छ । ‘नोटको स्थानान्तरणले रकम स्थानान्तरण भएको पुष्टि गर्छ,’ ती कारोबारीले सुनाए ।

प्रकाशित : भाद्र २०, २०७५ ०८:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT