रोल्पामा तरुण दलका नगर प्रमुखको गोली हानी हत्या

एक पक्राउ, केही फरार
काशीराम डाँगी

रोल्पा — गोली प्रहार गरी रोल्पा नगरका तरुण दलका अध्यक्ष रोहित पुनको हत्या भएको छ । आइतबार बेलुकी पूर्वी रोल्पाको सुलीचौर बजारभित्रै उनी माथि गोली प्रहार भएको हो ।

गोली प्रहारबाट मारिएका रोहित पुन । तस्बिर : रोहित पुनको फेसबुकबाट । 

गोली लागेर मृत्यु भएका रोहित केही महिनाअघि मात्रै तरुण दल रोल्पा नगरको अध्यक्षमा चयन भएका थिए। सुलीचौरस्थित इलाका प्रहरी कार्यालय नजिकै रहेको तथा भर्खरै संचालनमा ल्याइएको एक स्थानीय रेष्टुरेन्ट भित्रै उनी माथि गोली प्रहार भएको हो। स्थानीयका अनुसार घटना दिउँसो ४ बजे तिरको हो।

Yamaha

घटनापछि हतियारसहित रोल्पा नगरपालिका–१० का देवबहादुर घर्तीलाई अनुसन्धानका लागि नियन्त्रणमा लिइएको जिल्ला प्रहरी प्रमुख प्रहरी नायब उपरीक्षक दीपक खड्काले बताए। घटनापछि फरार रहेका अन्य केही युवाको खोजी थालिएको प्रहरीले जनाएको छ। चिया पिउँदै कुराकानी गर्न भनी बोलाइएपछि मृतक रोहित त्यहाँ पुगेका थिए।

रोल्पा नगरका सदस्य तथा नेविसंघका नेता शेरबहादुर थापाले आफ्ना कार्यकर्तालाई गोली हानेर हत्या गर्दा समेत राज्यले सुइँको नपाउनु दु:खद भएको प्रतिक्रिया दिएका छन्।

स्थानीय प्रत्यक्षदर्शीका अनुसार एउटै टेबुलमै बसेका बेला विवाद उत्पन्न हुँदा मृतक रोहितका साथी देवबहादुरले तीन गोली चलाएका थिए। एउटा गोली रोहितको मुटुमै लागेको थियो। ‘गोली लागेर रोहितको घटनास्थलमै मृत्यु भएको हो,’ प्रत्यक्षदर्शीले भने।

घटनापछि मृतक रोहितको शव सुलिचौरमै रहेको प्राथमिक स्वास्थ्य केन्द्रमा पुर्‍याइएको थियो। स्वास्थ्य केन्द्र प्रमुख डा. प्रकृति भट्टराईले अत्यधिक रक्तश्राव र मुटुमै गोली लागेकाले उनको मृत्यु भएको बताइन्। उक्त केन्द्रमै मृतकको पोष्टमार्टम गरिने प्रहरीले जनाएको छ।

घटनामा कुन र कस्तो प्रकारको हतियार प्रयोग भएको थियो भन्नेबारे प्रहरीले जानकारी दिएको छैन। घटनापछि सुलीचौर बजारमा व्यापक मात्रामा प्रहरी परिचालन गरिएको छ। राप्रपाका जिल्ला अध्यक्ष समेत स्थानीय अमरबहादुर थापाले दिउँसै प्रहरी चौकी नजिकै गोली चलाइएको घटना दु:खद भएको प्रतिक्रिया दिए। उक्त घटनापछि सुलीचौर त्रसित रहेको घटनास्थलमा रहेका सुनील स्मृति गाउँपालिका–४ का वडा अध्यक्ष गञ्जबहादुर महरा क्षत्रीले बताए।

Esewa Pasal

प्रकाशित : भाद्र २४, २०७५ २०:०४
प्रतिक्रिया
पठाउनुहोस्
ADVERTISEMENT

बलात्कृत बालिकाको उपचारमा आर्थिक अभाव

काशीराम डाँगी

रोल्पा — गत भदौ ५ मा आफन्तबाटै बलात्कृत ६ वर्षकी बालिकाको उपचारमा आर्थिक समस्या देखिएको छ । परिवारको आर्थिक अवस्था कमजोर भएकाले बालिकाको उपचारमा पनि समस्या देखिएको हो । उपचारमा सहयोग गर्न स्थानीय प्रशासनले आग्रह गरेको छ । 

रोल्पा नगरपालिकाभित्रैको गाउँका दाई नाता पर्ने १५ वर्षका किशोरद्वारा बलात्कृत बालिकामा अचेत हुने, रुने र कराउने समस्या देखिएको स्वास्थ्यकर्मीले बताएका छन् । पैसा नभएकाले उनको उपचारमा समस्या भएको परिवारको गुनासो छ ।

बालिकाकी आमा र मामा उपचारमा जुटेका छन् । घरको आर्थिक अवस्था कमजोर भएकाले उपचार खर्च जुटाउन पहल गरिएको प्रमुख जिल्ला अधिकारी गञ्जबहादुर एमसीले बताए । ‘बालिकाको परिवारको अवस्था बुझेपछि दातालाई सघाउन आग्रह गरेका छौं । बालिकालाई उनीहरुकै पहलमा अस्पतालमा पुर्‍याइएको छ ।’ प्रजिअ एमसीले भने । घटना सदरमुकाम नजिकै रहेको गाउँको हो ।

स्थानीय प्रशासनका अनुसार जिल्लामा बालबालिका र सामाजिक क्षेत्रमा कार्यरत सेभ द चिल्ड्रेन र हुरेक संस्थालाई बालिकाको उपचारमा आर्थिक सहयोग गर्न अनुरोध गरिएको हो ।

रेडक्रसलाई समेत सहयोग गर्न आग्रह गरिएको छ । प्रजिअ अध्यक्ष रहेको जिल्ला बाल कल्याण समितिको बैंक खातामा साढे चार लाख रकम भएपनि उक्त रकम प्रयोग गर्नेबार माथिल्लो तहबाट निर्देशन नआएकाले सहयोग गर्न नसकिएको प्रशासनले जनाएको छ । ती संस्थाले केही खर्च जुटाएपछि बालिकालाई एम्बुलेन्स मार्फत शनिबार नै अस्पताल पुर्‍याइएको थियो ।

प्रजिअकै अगुवाईमा १७ भदौमा समितिको बैठक आयोजना गरी बालिकाको उपचार गर्न पहल थालिएको थियो । चिकित्सक, सुरक्षा संयन्त्र, जनप्रतिनिधि, अधिकारकर्मी, कानुन व्यवसायी, महिला तथा बालबालिका सेवा केन्द्र प्रमुख लगायतको उपस्थितिमा बैठकले बालिकाको उपचार र सहयोगमा ध्यान दिने निर्णय गरेको थियो । बलात्कृत भएकी बालिकाको करिब ११ दिनपछि प्युठानस्थित अस्पतालमा उपचार गरिएको थियो ।

घटनाबारे कसैलाई नभन्न दबाब दिएकाले बालिकाले उक्त पीडाबारे कसैलाई बताएकी थिइनन् । स्वास्थ्यकर्मी, प्रहरी तथा परिवारको लामो प्रयासपछि बालिकाले रुदै घटना विवरण बताइकी थिइन् । बलात्कृत भएको आशंकापछि रोल्पामा ल्याइएकी बालिकाको पूर्ण स्वास्थ्य जाँच भने रोल्पा अस्पतालमा गरिएको थियो ।

स्वास्थ्यकर्मीले बलात्कार गरिएको लामो समयपछि पनि बालिका मानसिक दबाबमा देखिएकी थिइन् । बालिकाको योनाङ्गमा चोट देखिएको चिकित्सकले जनाए ।

बालिकाको उपचार बुटवलस्थित लुम्बिनी अञ्चल अस्पतालमा थालिएको छ । बालिकाका बुवा वैदेशिक रोजगारीका क्रममा खाडी मुलुक पुगेका छन् । उपचार गर्न उनकी आमा र मामा साथैमा गएका छन् । उक्त घटनापछि गाउँलेहरु त्रसित छन् । अधिकारकर्मी र नागरिक अगुवाले बालिका जोगाउन सचेत हुनु पर्ने सन्देश प्रवाह गरेका छन् ।

बलात्कार गरेको अभियोगमा १५ वर्षका किशोरलाई प्रहरीले गत शुक्रबार नै पक्राउ गरिसकेको थियो । उनलाई पक्राउ गरिएकोबारे रोल्पा अदालतमा जानकारी दिएर थप अनुसन्धान थालिएको प्रहरी नायब उपरीक्षक दीपक खड्काले बताए ।

प्रकाशित : भाद्र १८, २०७५ १४:०१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT