ढुवानी समस्याले औषधि अभाव

राजबहादुर शाही

मुगु — ढुवानी समस्याले जिल्लामा औषधि अभाव भएको छ । सरकारी स्वास्थ्यचौकी र निजी मेडिकलमा औषधि अभाव भएपछि बिरामीको उपचार प्रभावित भएको छ । औषधि अभावका कारण बिरामी उपचारका लागि बाहिर जान बाध्य छन् ।

वर्षाका कारण डेढ महिनादेखि गमगढी–नाग्मा सडक अवरुद्ध भएपछि औषधि ढुवानी गर्न सकिएको छैन । जहाजबाट औषधि ढुवानी गर्दा महँगो पर्ने भएकाले आपूर्ति असहज भएको हो । जहाजबाट औषधि ढुवानी गर्दा प्रतिकिलो १ सय २० रुपैयाँ पर्ने गरेको छ ।

गोदाममा स्टक भएको औषधि सकिएको स्वास्थ्यकर्मीको भनाइ छ । बिरामीको चाप भइरहने जिल्ला अस्पतालमा पनि औषधि सकिँदा उपचारमा समस्या भएको डा. मीना चौलागाईंले बताइन् ।

Yamaha

भिडियो एक्सरेका लागि चाहिने जेल कज सकिएपछि अल्ट्रासाउन्ड सेवा प्रभावित भएको उनको भनाइ छ । क्षेत्रीय मेडिकल स्टोरबाट पठाइएको नि:शुल्क औषधि सकिएको उनले बताइन् ।

जिल्ला अस्पतालका डा. डबल मल्लले वर्षाले सडक मार्ग बन्द हुँदा औषधि चरम अभाव भएको बताए । छायानाथ रारा नगरपालिकाका पिना, रोवा, तुम, कार्कीबाडालगायत स्वास्थ्य केन्द्रमा औषधि नहुँदा बिरामीको उपचार प्रभावकारी हुन सकेको छैन । सदरमुकाम गमगढी बजारमा रहेका ७ वटा मेडिकलमा औषधि सकिएको छ । ‘सडक बन्द छ, त्यसैले औषधि आएन,’ अहेब जयबहादुर मल्लले भने, ‘जहाज पनि नियमित नभएपछि अधिकांश औषधि सकियो ।’ मौसम परिवर्तनका कारण बिरामीको संख्या बढेपछि औषधिको स्टक सकिँदै गएको उनको भनाइ छ ।

रातापानी प्राथमिक स्वास्थ्य केन्द्र तथा सोरु र मुगमकार्मारोङ गाउँपालिकाका तीन दर्जन बढी स्वास्थ्य केन्द्रमा औषधि सकिएपछि बिरामी रित्तो हात फर्कन बाध्य छन् । खत्याड गाउँपालिका जोड्ने कालाकाँडा–गम्था सडक पनि लामो समयदेखि अवरुद्ध हुँदा औषधि अभाव भएको उनले बताए ।

सडक अवरुद्ध हुँदा बिरामी बोक्ने एम्बुलेन्स पनि प्रभावित बनेको छ । जिल्ला अस्पतालले जटिल प्रकारका बिरामीलाई रिफर गरी एम्बुलेन्सद्वारा कर्णाली स्वास्थ्य विज्ञान प्रतिष्ठान, जुम्ला पठाउने गरे पनि सडक बन्द भएकाले सास्ती खेप्नुपरेको छ ।

रिफर गरिएका बिरामी महँगो हवाई भाडा तिरेर सुर्खेत र नेपालगन्ज जान बाध्य छन् । जिल्लामा सडक अवरुद्ध हुँदा औषधि र दैनिक उपभोग्य वस्तुको अभाव भएपछि खुलाउने प्रयास भइरहेको जिल्ला प्रशासन कार्यालयले जनाएको छ ।

सडक डिभिजन कार्यालयबाट स्काभेटर झिकाएर झयारी खोला र पिनामा भत्किएको सडक बनाउने काम भइरहेको सहायक प्रमुख जिल्ला अधिकारी प्रदीप ढकालले बताए ।

प्रकाशित : भाद्र २५, २०७५ ०७:३८
ADVERTISEMENT
प्रतिक्रिया
पठाउनुहोस्
ADVERTISEMENT

बसपार्क अस्तव्यस्त सवारी पार्किङमा समस्या

राजबहादुर शाही

मुगु — छायानाथ रारा नगरपालिकास्थित घुघुने ओडारमा निर्माणाधीन बसपार्क अलपत्र परेको छ । बसपार्क अलपत्र भएपछि जिल्लामा सञ्चालन हुने सवारीसाधन पार्किङ गर्न र यात्रुलाई टिकट काट्न समस्या भएको छ ।

बसपार्क नहुँदा यात्रुले विभिन्न सास्ती बेहोर्नुपरेको छ । बसपार्क नभएपछि कहाँबाट गाडी चढ्ने भन्ने अन्योल हुने गरेको यात्रुको गुनासो छ । यस वर्ष कुनै पनि निकायले रकम नछुटयाउँदा बसपार्क अलपत्र परेको हो ।

बसपार्कको ४० प्रतिशत कामसमेत भएको छैन । बसपार्क निर्माणका लागि ११ जनाले नि:शुल्क जग्गादान गरेका थिए । घुघुने ओडारको १३ रोपनी क्षेत्रफलमा बसपार्क निर्माण सुरु गरिएको थियो ।

गत आर्थिक वर्षमा बसपार्क निर्माणका लागि नगरपालिकाले २० लाख र सांसद क्षेत्र विकास कोषबाट २० लाख रकम विनियोजन गरिएको थियो ।निर्माणका लागि नगरपालिका र कर्णाली प्रदेश सरकारले एक रुपैयाँ पनि विनियोजन नगरेको बसपार्क निर्माण समितिका अध्यक्ष पदमराज मल्लले बताए । गत वर्षको बजेटले जग्गा सम्याउने, पर्खाल निर्माणका लागि ढुंगा, बालुवा ढुवानी गर्ने काममात्र भएको उनको भनाइ छ ।

त्यस्तै एकातर्फको पर्खाल निर्माणको काम सकिएको छ । अधुरो बसपार्क सम्पन्न गर्न नगरपालिकासँग बजेट प्रस्ताव गर्दा स्वीकृति नभएको मल्लले जनाए । ‘बसपार्क अलपत्र भएपछि मालबाहक गाडी, जिप, टयाक्टरलगायतका सवारीसाधन सडकमै पार्किङ गर्ने गरिएको छ,’ उनले भने, ‘सडकमा पार्किङ गर्दा बटुवालाई समेत आवतजावतमा समस्या परेको छ ।’

उनले सडकमै पार्किङ गरिएपछि विद्यालय जाने बालबालिकालाई सबैभन्दा बढी असर परेको जनाए । नगरबाट थोरै पैसा छुटयाउँदा नपुग्ने भएकाले सहरी विकास मन्त्रालयमा बसपार्क निर्माणका लागि बजेटको कुरा भइरहेको नगरपालिका प्रमुख हरिजंग शाहीले बताए ।

‘बजेट पर्याप्त भयो भने एक वर्षभित्रै काम सकिने अवस्था छ,’ उनले भने, ‘थोरै बजेटले सामान्य काममात्र हुने भएकाले नगरपालिकाले यस वर्ष बजेट विनियोजन नगरेको हो ।’ २०६९ सालमा मुगु राष्ट्रिय सडक सञ्जालमा जोडिए पनि अहिलेसम्म बसपार्क निर्माण नहुँदा समस्या भएको यातायात व्यवसायीको भनाइ छ ।

न्युरोड सडकको छेउमा काठको टहरो बनाएर यातायात कम्पनीले यात्रुलाई टिकट वितरण गर्ने गरेका छन् । बसपार्क अभावमा यातायातका साधन सडकमै रोक्नुपर्ने बाध्यता भएको छायानाथ यातायात प्रालिका नेताप्रसाद चौलागाईंले बताए । सडकमा गाडी रोक्दा ट्राफिक व्यवस्थापनमा समस्या भएको छ ।

प्रकाशित : भाद्र २४, २०७५ १०:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT