गाउँपालिकाविरुद्ध जनप्रतिनिधि नै आन्दोलित

अध्यक्षले एकलौटी गरेको गाउँसभा बहिष्कार गरी तालाबन्दी
अर्जुन राजवंशी

बनियानी, झापा — कचनकवल गाउँपालिकाका जनप्रतिनिधि गाउँपालिकाविरुद्ध आन्दोलित भएका छन् । उनीहरूले गाउँसभा बहिष्कारदेखि तालाबन्दीसमेत गरेका छन् । गाउँपालिका अध्यक्ष अन्जार आलमले एकलौटी ढंगले गाउँसभा गर्न लागेको भन्दै जनप्रतिनिधि आन्दोलित बनेका हुन् ।

भदौ २३ र २४ गतेका लागि आहान गरेको दोस्रो गाउँसभा आन्दोलनका कारण अन्योल बनेको छ ।

अध्यक्षले बहुमतको दम्भमा जबरजस्ती गाउँसभा गर्न लागेको भन्दै १४ जनप्रतिनिधिले शनिबार टायर बाल्नुका साथै प्रमुख अतिथिलाई सभास्थल प्रवेश गर्नै नदिएर सभा बिथोलेका थिए । अध्यक्ष आलमले जबरजस्ती सभा उद्घाटन भएको घोषणा गर्न खोज्दा माइक्रोफोन खोसाखोस गर्ने क्रममा लागेर
वडा सदस्य लक्ष्मी सुब्बा घाइते भएकी छन् ।

Yamaha

जनप्रतिनिधिहरू आइतबार बिहानैदेखि प्रदर्शनमा उत्रिएका थिए । उनीहरूले गाउँसभा बस्ने वडा ६ स्थित सामुदायिक भवनको मूल गेटमै ताला लगाएका छन् । नाराबाजी गर्दै गएको जनप्रतिनिधिको टोलीले गाउँपालिका कार्यालयमा पनि तालाबन्दी गर्न खोजेपछि सुरक्षाकर्मीले कडा सुरक्षा दिएको थियो ।

अध्यक्षले नीति, नियमविपरीत गाउँपालिका चलाउन खोजेकाले आफूहरू आन्दोलनमा उत्रिनुपरेको वडा ६ का अध्यक्ष कुलबहादुर कार्कीले बताए । उनले आफूहरूलाई जानकारी नै नदिई गाउँसभा गर्न लागेकाले विरोधमा उत्रिनुपरेको बताए । अध्यक्षले आफू निकटकालाई बढी र अन्यलाई थोरै बजेट विनियोजन गर्ने गरेको उनको आरोप छ ।

‘म वडाध्यक्ष तर, दोस्रो गाउँसभाबाट आव ०७५/७६ का लागि पारित गराउन लागेको बजेटबारे केही जानकारी छैन । कति बजेट ल्याउन लागेको हो । कुन कुन शीर्षकमा कति विनियोजन गरियो, केही जानकारी छैन । अध्यक्षले एकलौटी ल्याएको बजेट पारित गर्न सकिन्छ ?’ उनले भने ।

वडा २ का सदस्य धनबहादुर गुरुङले जानकारी र पर्याप्त छलफल नै नभएको बजेट पेलेर पारित गराउन खोजेको आरोप लगाए । उनले अध्यक्षको अनुकूलतामा गाउँसभाबाट बजेट पारित गराउन लागेकाले आफूहरू विरोधमा उत्रिन बाध्य भएको बताए । बहुमतको दम्भ देखाउँदै अध्यक्षले बजेट विनियोजनमा असमानता गरेको आरोप उनको छ ।

‘निर्देशिकाअनुसार असार १० गतेभित्र बजेट ल्याउनुपर्ने थियो तर अहिलेसम्म नल्याई करोडौं रुपैयाँको चलखेल गरिएको छ,’ वडा १ का सदस्य उमाशंकर गणेशले भने, ‘अध्यक्षले साउनमा मात्र अनियमित तरिकाले ६०३ टिपर मिक्स गिटी झारेका छन् । त्यो खर्च अध्यक्षले अब ल्याउन लागेको बजेटबाट पारित गराउन खोज्दै छन् । त्यो कसरी मान्य हुन्छ ?’

गाउँपालिकाविरुद्ध वडाध्यक्षहरू २ का मेखप्रसाद भट्टराई, ४ का प्रमानन्द राजवंशी, ६ का कुलबहादुर कार्की र ७ का भरत राजवंशी छन् । वडा सदस्यहरू उमाशंकार गणेश, सुनिता नेपाली, रञ्जित सुब्बा, मनमाया भट्टराई, चन्द्रशंकर अधिकारी, धनबहादुर गुरुङ, प्रतिमा बोगटी, आयुब मिया, मुस्तकीमा खातुन र निर्मला पाण्डे छन् ।

आन्दोलित जनप्रतिनिधि कांग्रेस र तत्कालीन एमालेबाट निर्वाचित हुन् । गाउँपालिकामा अध्यक्ष, उपाध्यक्षसहित बहुमत सदस्य राप्रपाका छन् । जनप्रतिनिधिको आन्दोलनलाई कांग्रेस र नेकपाको स्थानीय समिमिले समर्थन गरेको छ । कांग्रेस नेता भूमि राजवंशीले अध्यक्ष आलम नीति, नियमभन्दा फरक ढंगले अघि बढ्न खोजेकाले सचेत गराउन सडकमा उत्रिएको बताए ।

आलमले जनप्रतिनिधिले लगाएको आरोपको खण्डन गरे । उनले पूर्वनिर्धारित कार्यक्रमअन्तर्गत नै गाउँसभा गर्न लागेको बताए । आफूले कानुनविपरीत कुनै काम नगरेको उनको दाबी छ । उनले जनप्रतिनिधि तथा गाउँवासीको कुने माग वा समस्या भए, आफू छलफलबाट समाधान गर्न तयार रहेको बताए ।

उनले भने, ‘ममाथि लगाइएका सबै आरोप झूट हुन् । मैले सबै वडालाई समान रूपमा हेरेको छु र,’ उनले भने, ‘त्यहीअनुसार व्यवहार पनि गरिरहेको छु ।’ तर, सीमित व्यक्तिको उक्साहटमा जनप्रतिनिधि विरोध उत्रिनु राम्रो नभएको उनी बताउँछन् । समस्या समाधानका लागि आन्दोलनरत पक्ष र गाउँपालिका पक्षबीच आइतबार बेलुका वार्ता भएको थियो ।

प्रकाशित : भाद्र २५, २०७५ ०७:३९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

ढुवानी समस्याले औषधि अभाव

राजबहादुर शाही

मुगु — ढुवानी समस्याले जिल्लामा औषधि अभाव भएको छ । सरकारी स्वास्थ्यचौकी र निजी मेडिकलमा औषधि अभाव भएपछि बिरामीको उपचार प्रभावित भएको छ । औषधि अभावका कारण बिरामी उपचारका लागि बाहिर जान बाध्य छन् ।

वर्षाका कारण डेढ महिनादेखि गमगढी–नाग्मा सडक अवरुद्ध भएपछि औषधि ढुवानी गर्न सकिएको छैन । जहाजबाट औषधि ढुवानी गर्दा महँगो पर्ने भएकाले आपूर्ति असहज भएको हो । जहाजबाट औषधि ढुवानी गर्दा प्रतिकिलो १ सय २० रुपैयाँ पर्ने गरेको छ ।

गोदाममा स्टक भएको औषधि सकिएको स्वास्थ्यकर्मीको भनाइ छ । बिरामीको चाप भइरहने जिल्ला अस्पतालमा पनि औषधि सकिँदा उपचारमा समस्या भएको डा. मीना चौलागाईंले बताइन् ।

भिडियो एक्सरेका लागि चाहिने जेल कज सकिएपछि अल्ट्रासाउन्ड सेवा प्रभावित भएको उनको भनाइ छ । क्षेत्रीय मेडिकल स्टोरबाट पठाइएको नि:शुल्क औषधि सकिएको उनले बताइन् ।

जिल्ला अस्पतालका डा. डबल मल्लले वर्षाले सडक मार्ग बन्द हुँदा औषधि चरम अभाव भएको बताए । छायानाथ रारा नगरपालिकाका पिना, रोवा, तुम, कार्कीबाडालगायत स्वास्थ्य केन्द्रमा औषधि नहुँदा बिरामीको उपचार प्रभावकारी हुन सकेको छैन । सदरमुकाम गमगढी बजारमा रहेका ७ वटा मेडिकलमा औषधि सकिएको छ । ‘सडक बन्द छ, त्यसैले औषधि आएन,’ अहेब जयबहादुर मल्लले भने, ‘जहाज पनि नियमित नभएपछि अधिकांश औषधि सकियो ।’ मौसम परिवर्तनका कारण बिरामीको संख्या बढेपछि औषधिको स्टक सकिँदै गएको उनको भनाइ छ ।

रातापानी प्राथमिक स्वास्थ्य केन्द्र तथा सोरु र मुगमकार्मारोङ गाउँपालिकाका तीन दर्जन बढी स्वास्थ्य केन्द्रमा औषधि सकिएपछि बिरामी रित्तो हात फर्कन बाध्य छन् । खत्याड गाउँपालिका जोड्ने कालाकाँडा–गम्था सडक पनि लामो समयदेखि अवरुद्ध हुँदा औषधि अभाव भएको उनले बताए ।

सडक अवरुद्ध हुँदा बिरामी बोक्ने एम्बुलेन्स पनि प्रभावित बनेको छ । जिल्ला अस्पतालले जटिल प्रकारका बिरामीलाई रिफर गरी एम्बुलेन्सद्वारा कर्णाली स्वास्थ्य विज्ञान प्रतिष्ठान, जुम्ला पठाउने गरे पनि सडक बन्द भएकाले सास्ती खेप्नुपरेको छ ।

रिफर गरिएका बिरामी महँगो हवाई भाडा तिरेर सुर्खेत र नेपालगन्ज जान बाध्य छन् । जिल्लामा सडक अवरुद्ध हुँदा औषधि र दैनिक उपभोग्य वस्तुको अभाव भएपछि खुलाउने प्रयास भइरहेको जिल्ला प्रशासन कार्यालयले जनाएको छ ।

सडक डिभिजन कार्यालयबाट स्काभेटर झिकाएर झयारी खोला र पिनामा भत्किएको सडक बनाउने काम भइरहेको सहायक प्रमुख जिल्ला अधिकारी प्रदीप ढकालले बताए ।

प्रकाशित : भाद्र २५, २०७५ ०७:३८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT