गाउँपालिकाविरुद्ध जनप्रतिनिधि नै आन्दोलित

अध्यक्षले एकलौटी गरेको गाउँसभा बहिष्कार गरी तालाबन्दी
अर्जुन राजवंशी

बनियानी, झापा — कचनकवल गाउँपालिकाका जनप्रतिनिधि गाउँपालिकाविरुद्ध आन्दोलित भएका छन् । उनीहरूले गाउँसभा बहिष्कारदेखि तालाबन्दीसमेत गरेका छन् । गाउँपालिका अध्यक्ष अन्जार आलमले एकलौटी ढंगले गाउँसभा गर्न लागेको भन्दै जनप्रतिनिधि आन्दोलित बनेका हुन् ।

भदौ २३ र २४ गतेका लागि आहान गरेको दोस्रो गाउँसभा आन्दोलनका कारण अन्योल बनेको छ ।

अध्यक्षले बहुमतको दम्भमा जबरजस्ती गाउँसभा गर्न लागेको भन्दै १४ जनप्रतिनिधिले शनिबार टायर बाल्नुका साथै प्रमुख अतिथिलाई सभास्थल प्रवेश गर्नै नदिएर सभा बिथोलेका थिए । अध्यक्ष आलमले जबरजस्ती सभा उद्घाटन भएको घोषणा गर्न खोज्दा माइक्रोफोन खोसाखोस गर्ने क्रममा लागेर
वडा सदस्य लक्ष्मी सुब्बा घाइते भएकी छन् ।

Yamaha

जनप्रतिनिधिहरू आइतबार बिहानैदेखि प्रदर्शनमा उत्रिएका थिए । उनीहरूले गाउँसभा बस्ने वडा ६ स्थित सामुदायिक भवनको मूल गेटमै ताला लगाएका छन् । नाराबाजी गर्दै गएको जनप्रतिनिधिको टोलीले गाउँपालिका कार्यालयमा पनि तालाबन्दी गर्न खोजेपछि सुरक्षाकर्मीले कडा सुरक्षा दिएको थियो ।

अध्यक्षले नीति, नियमविपरीत गाउँपालिका चलाउन खोजेकाले आफूहरू आन्दोलनमा उत्रिनुपरेको वडा ६ का अध्यक्ष कुलबहादुर कार्कीले बताए । उनले आफूहरूलाई जानकारी नै नदिई गाउँसभा गर्न लागेकाले विरोधमा उत्रिनुपरेको बताए । अध्यक्षले आफू निकटकालाई बढी र अन्यलाई थोरै बजेट विनियोजन गर्ने गरेको उनको आरोप छ ।

‘म वडाध्यक्ष तर, दोस्रो गाउँसभाबाट आव ०७५/७६ का लागि पारित गराउन लागेको बजेटबारे केही जानकारी छैन । कति बजेट ल्याउन लागेको हो । कुन कुन शीर्षकमा कति विनियोजन गरियो, केही जानकारी छैन । अध्यक्षले एकलौटी ल्याएको बजेट पारित गर्न सकिन्छ ?’ उनले भने ।

वडा २ का सदस्य धनबहादुर गुरुङले जानकारी र पर्याप्त छलफल नै नभएको बजेट पेलेर पारित गराउन खोजेको आरोप लगाए । उनले अध्यक्षको अनुकूलतामा गाउँसभाबाट बजेट पारित गराउन लागेकाले आफूहरू विरोधमा उत्रिन बाध्य भएको बताए । बहुमतको दम्भ देखाउँदै अध्यक्षले बजेट विनियोजनमा असमानता गरेको आरोप उनको छ ।

‘निर्देशिकाअनुसार असार १० गतेभित्र बजेट ल्याउनुपर्ने थियो तर अहिलेसम्म नल्याई करोडौं रुपैयाँको चलखेल गरिएको छ,’ वडा १ का सदस्य उमाशंकर गणेशले भने, ‘अध्यक्षले साउनमा मात्र अनियमित तरिकाले ६०३ टिपर मिक्स गिटी झारेका छन् । त्यो खर्च अध्यक्षले अब ल्याउन लागेको बजेटबाट पारित गराउन खोज्दै छन् । त्यो कसरी मान्य हुन्छ ?’

गाउँपालिकाविरुद्ध वडाध्यक्षहरू २ का मेखप्रसाद भट्टराई, ४ का प्रमानन्द राजवंशी, ६ का कुलबहादुर कार्की र ७ का भरत राजवंशी छन् । वडा सदस्यहरू उमाशंकार गणेश, सुनिता नेपाली, रञ्जित सुब्बा, मनमाया भट्टराई, चन्द्रशंकर अधिकारी, धनबहादुर गुरुङ, प्रतिमा बोगटी, आयुब मिया, मुस्तकीमा खातुन र निर्मला पाण्डे छन् ।

आन्दोलित जनप्रतिनिधि कांग्रेस र तत्कालीन एमालेबाट निर्वाचित हुन् । गाउँपालिकामा अध्यक्ष, उपाध्यक्षसहित बहुमत सदस्य राप्रपाका छन् । जनप्रतिनिधिको आन्दोलनलाई कांग्रेस र नेकपाको स्थानीय समिमिले समर्थन गरेको छ । कांग्रेस नेता भूमि राजवंशीले अध्यक्ष आलम नीति, नियमभन्दा फरक ढंगले अघि बढ्न खोजेकाले सचेत गराउन सडकमा उत्रिएको बताए ।

आलमले जनप्रतिनिधिले लगाएको आरोपको खण्डन गरे । उनले पूर्वनिर्धारित कार्यक्रमअन्तर्गत नै गाउँसभा गर्न लागेको बताए । आफूले कानुनविपरीत कुनै काम नगरेको उनको दाबी छ । उनले जनप्रतिनिधि तथा गाउँवासीको कुने माग वा समस्या भए, आफू छलफलबाट समाधान गर्न तयार रहेको बताए ।

उनले भने, ‘ममाथि लगाइएका सबै आरोप झूट हुन् । मैले सबै वडालाई समान रूपमा हेरेको छु र,’ उनले भने, ‘त्यहीअनुसार व्यवहार पनि गरिरहेको छु ।’ तर, सीमित व्यक्तिको उक्साहटमा जनप्रतिनिधि विरोध उत्रिनु राम्रो नभएको उनी बताउँछन् । समस्या समाधानका लागि आन्दोलनरत पक्ष र गाउँपालिका पक्षबीच आइतबार बेलुका वार्ता भएको थियो ।

Esewa Pasal

प्रकाशित : भाद्र २५, २०७५ ०७:३९
प्रतिक्रिया
पठाउनुहोस्

खोलाभन्दा सानो पुल !

अर्जुन राजवंशी

दमक — हुलाकी राजमार्गअन्तर्गत झापा गाउँपालिका २ स्थित सानोमाई खोलामा निर्माणाधीन पुलको लम्बाइ सानो भएको स्थानीयले बताएका छन् । खोलाले धार परिवर्तन गरेकाले पुलको लम्बाइ निकै सानो भएको हो । 

झापाको झापा गाउँपालिका २ स्थित सानोमाइ खोलामा निर्माणाधीन पुल । तस्बिर : अर्जुन

उनीहरूले पुलको लम्बाई बढाउन माग गरेका छन् । उनीहरूले लम्बाई नबढाए निर्माणाधीन पुलको प्रयोगविहिन हुने बताएका छन् । खोलामा ११ मिटर चौडाइ र ५२.४ मिटर लम्बाइको पुल निर्माणाधीन छ । पुल निर्माणको काम गत असार मसान्तमै सकिनुपर्ने थियो । तर, ठेकेदार कम्पनीले ढिलाइ गर्दा हालसम्म ५० प्रतिशत मात्रै काम सम्पन्न भएको छ । स्थानीयले खोलाले धार निकै परिवर्तन गरेकाले अहिले निर्माण भइरहेकै जति पश्चिमपट्टि पुल थप्नुपर्ने माग गरेका छन् ।

‘अहिलेकै अवस्थामा हो भने यो पुलको कुनै काम छैन,’ स्थानीय मोहनकुमार चौलागाईंले भने, ‘पुल निर्माण गर्ने निकायले तत्काल अध्ययन गरेर पुलको लम्बाइ बढाउनुपर्छ ।’ उनले खोलाको साइजभन्दा पुलको लम्बाइ सानो भएको बताए । उनले निर्माणाधीन अवस्थामै रहेकाले पश्चिमपट्टि स्पेन थपेर पुलको लम्बाइ बढाउनुपर्ने बताए । झापा गाउँपालिका २ का वडाध्यक्ष नेत्रबहादुर खडकाले पुलको लम्बाइ थप्नेबारे मौखिक रूपमा जानकारी गराएको बताए । उनले पुलको लम्बाइ थप नभए जनता लाभान्वित हुन नसक्ने अवस्था रहेको बताए ।

‘सर्भे गर्दा खोलाको धार ठिकै ठाउँमा थियो । तर, ०७२ साउनको बाढीले खोला पूरै पश्चिम सरेको छ,’ खडकाले भने, ‘तटबन्ध गरेर पनि यति लामो खोलाको धार सोझ्याउन गाह्रो हुन्छ । भविष्यमा फेरि पनि खतरा कायमै रहने भएकाले अहिले नै पुलको लम्बाइ बढायौं भने दीर्घकालीन रूपमा समस्या समाधान हुन्छ ।’ उनले पुलको लम्बाइ बढाउने विषयमा सम्बन्धित निकायमा थप कुरा राख्ने तयारी गरिरहेको बताए ।

हुलाकी राजमार्ग निर्देशनालय योजना कार्यालयअन्तर्गत जिल्लामा रहेको कार्यालयका अनुसार उक्त पुल लामा/बान्टी जेभीले ठेक्का लिएको हो । ०७५ असार मसान्तभित्र निर्माण सम्पन्न गर्ने गरी ५ करोड ९७ लाख ९९ हजार रुपैयाँमा ठेक्का सम्झौता भएको छ । कार्यालयका सब–इन्जिनियर सुरेन्द्र यादवले सर्बेअनुसारै काम भइरहेकाले तत्कालै पुलको लम्बाइ थप्ने अवस्था नरहेको बताए । उनले खोलाले धार परिवर्तन गर्ने क्रम चलिरहने हुँदा स्थायी तटबन्ध गरेर खोला सोझ्याउनुपर्ने बताए । ‘सुरुमा जहाँ पुल आवश्यक थियो । सर्भेअनुसार त्यही पुल निर्माण भइरहेको छ । अहिले खोला पश्चिमतिर गएको छ । तटबन्ध गरेर खोलाको धार परिवर्तन गर्नुपर्छ,’ उनले भने ।

उनले स्थानीयको माग पनि जायज भएको बताए । उनले भने, ‘स्थानीयको माग पनि जायज नै छ । अहिलेकै अवस्थामा भन्नुपर्दा पुलको लम्बाइ बढाउनुको विकल्प छैन । तर, यो कामका लागि फेरि ठूलै प्रक्रिया गर्नुपर्ने हुन्छ ।’ हाल सानोमाई खोलामा बासको पुल बनाएर स्थानीय बासिन्दा आवतजावत गरिरहेका छन् । खोला पारि ७ वटा बस्ती छन् ।

उक्त बस्तीका बासिन्दाका लागि झापा बजार मुख्य बजार हो । खोलामा पुल नभए पारिका बासिन्दा बन्धकजस्तै बन्ने अवस्था छ । खोला पारि जुडो प्राथमिक विद्यालय पनि छ । ‘पुलको लम्बाइ नबढाए खोला पारिको जुडो प्रावि र ७ बस्ती सबै डुबान र कटानको उच्च जोखिममा पर्छ,’ वडाध्यक्ष खडकाले भने ।

प्रकाशित : भाद्र २१, २०७५ २०:१६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT