कृत्रिम खुट्टाले खुसी दियो

माधव ढुंगाना

भैरहवा — खुट्टा गुमाएर निराश बनेका मुलुकभरका ६२ जनाको ओठमा मुस्कान छाएको छ । खर्च गरेर कृत्रिम खुट्टा जोड्न नसक्ने उनीहरू नि:शुल्क मिल्ने खबरले उनीहरू हौसिएका छन् । यहाँ आएर उनीहरूले खुट्टाको नापो पनि प्राविधिकलाई दिइसकेका छन् ।

रूपन्देहीको भैरहवा र बुटवलस्थित मारवाडी युवा मञ्चले नि:शुल्क कृत्रिम खुट्टा उपलब्ध गराउने भएपछि उनीहरूको मुहार हँसिलो बनेको छ । भैरहवास्थित मारवाडी सेवा भवनमा यस्ता व्यक्तिको खुट्टाको नापजाँचका साथै अन्य प्राविधिक तयारी पूरा भएको छ । मञ्चको मूलमन्त्र ‘सेवा नै धर्म हो’ भन्ने रहेको छ ।

विभिन्न कारणले खुट्टा गुमाएकालाई नि:शुल्क कृत्रिम खुट्टा उपलब्ध गराउन लागिएको हो । त्यसका लागि सम्बन्धित व्यक्तिको दर्ता र विशेषज्ञद्वारा नापजाँच पूरा गरिएको कार्यक्रमका संयोजक अरुण अग्रवालले बताए । उनका अनुसार ५० जनालाई नि:शुल्क कृत्रिम खुट्टा उपलब्ध गराउने लक्ष्य थियो । तर, मुलुकका विभिन्न स्थानबाट नापजाँचमा १ सय ५ यस्ता व्यक्ति आए ।

Yamaha

‘नपाजाँच भएकालाई दसैंअघि नै उपलब्ध गराउने तयारीमा छौं,’ अग्रवालले भने, ‘यसपटकको दसैं सबैले दुवै खुट्टाले टेकेर हर्सोल्लाससाथ मनाउने वातावरण बनाउनेछांै ।’ मञ्च र मारवाडी सेवा समिति काठमाडौंको सहयोगमा कृत्रिम खुट्टा वितरण गर्न लागिएको हो । कृत्रिम खुट्टा घुँडादेखि मुनि, घुँडाभन्दा माथि र कम्मरसम्म गरी तीन किसिमका छन् । यसको निर्माण लागत घुँडाभन्दा मुनिको ३७ हजार, घुँडाभन्दा माथिको ६७ हजार र कम्मरसम्मको १ लाख १७ हजार रुपैयाँ रहेको छ ।

समितिले मुलुकभर अहिलेसम्म २ हजार २ सयभन्दा धेरैलाई यस्ता खुट्टा वितरण गरिसकेको छ । नि:शुल्क उपलब्ध हुने जानकारी पाएपछि जुम्लाको कनकसुन्दरी गाउँपालिका ८ का ३५ वर्षीय भक्तबहादुर रोकाय पनि यहाँ आएका छन् । पाल्पा मदन पोखराका दीर्घबहादुर कार्की मधुमेहका कारण एक वर्षअघि गुमाएको खुट्टा जोड्नका लागि छोराका साथमा आएका छन् ।

प्रकाशित : भाद्र २५, २०७५ ०७:३८
ADVERTISEMENT
ADVERTISEMENT
प्रतिक्रिया
पठाउनुहोस्

‘बीपी प्रतिष्ठान उत्कृष्ट’

कान्तिपुर संवाददाता

सुनसरी — नेपालका लागि भारतीय राजदूत मञ्जिवसिंह पुरीले बीपी कोइराला स्वास्थ्य विज्ञान प्रतिष्ठानले उत्पादन गरेको चिकित्सक नेपाल र भारतमा मात्र नभएर संसारमै उत्कृष्ट मानिएको बताएका छन् ।

विश्वेश्वरप्रसाद कोइरालाको १०४ औं जन्मजयन्ती तथा स्वास्थ्य विज्ञान प्रतिष्ठानको २५ औं स्थापना दिवसमा पुरीले भने, ‘यहाँ अध्ययन गरेका चिकित्सकको माग विश्वमै मान्यता पाउने भएकाले प्रतिष्ठानको विकासमा भारत सरकारले जहिले जतिखेर पनि सहयोग गर्न तयार छ ।’

उनले बीपी प्रतिष्ठानमा नेपालीले मात्र नभएर सिमानामा जोडिएका भारतीय नागरिकले पनि उपचार सेवासुविधा लिन पाएकामा खुसी व्यक्त गर्दै प्रतिष्ठानबाट उत्पादन भएका चिकित्सकको केही हिस्सा भारतको समेत भएको स्पष्ट पारे ।

उनले बीपी प्रतिष्ठान नेपाल र भारतबीचको सहकार्यको प्रतीकको गहना भएको उल्लेख गर्दै भारतले नेपाललाई असल निकट छिमेकीका रूपमा सदैव ग्रहण गर्दै आएको बताए । उनले नेपाल र भारतको सम्बन्ध सरकारी स्तरबाट मात्र नभएर जनस्तरदेखि नै प्रगाढ रहेको बताए ।

प्रतिष्ठानका उपकुलपति प्रा.डा. राजकुमार रौनियारले ०५० सालमा आजकै दिन बीपीको जन्मदिन पारेर स्थापना भएको प्रतिष्ठानले २५ वर्षे अवधिमा धेरै सुविधा थप गरेको बताए । उनले हालसम्म प्रतिष्ठानले ४ हजार १ सय चिकित्सक उत्पादन गरिसकेको बताए । उनले विगतमा ४० बिरामीलाई लक्षित गरी निर्माण गरेको प्रतिष्ठानमा हाल दैनिक ४ हजारभन्दा बढीको उपचार हुने जनाए ।

समारोहमा चिकित्सा क्षेत्रमा लामो समयदेखि योगदान पुर्‍याउने प्रा.डा. सुन्दरमणि दीक्षित, डा. मनोहरप्रसाद गुप्ता, प्रतिष्ठानका पूर्वउपकुलपति लोकविक्रम थापा र पूर्वरजिस्ट्रार नन्दबहादुर थापालगायतलाई सम्मान गरिएको थियो ।

प्रकाशित : भाद्र २५, २०७५ ०७:३५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT