कानुन पढ्दै आमा–छोरा

कलेन्द्र सेजुवाल

सुर्खेत — घरव्यवहार र घरेलु हिंसाको मारले रोकिएको पढाइ १४ वर्षपछि सुरु ३४ वर्षीया कमला रेग्मीले ०६१ मा एसएलसी पास गरेकी हुन् । उच्च शिक्षा अध्ययनका लागि उनी सोही वर्ष अमरज्योति मावि भर्ना भइन् । तर, घरव्यवहार र घरेलु हिंसाको मारले पढाइ अधुरै रह्यो ।

कक्षा ११ मा कानुन विषय अध्ययनरत आमा–छोरा कमला र सुशान्त रेग्मी । तस्बिर : कलेन्द्र

उनको जीवनमा करिब दशकअघि बन्द भएको शिक्षाको ढोका बल्ल खुलेको छ । कक्षा ११ र १२ मा सुर्खेतमा कानुन विषय पढाइ हुन थालेपछि उनी उत्साह बोकेर पुन: भर्ना भएकी छन् । आफू मात्र होइन, एसएलसी पास भएकै वर्ष जन्मिएको छोरा सुशान्तलाई पनि सहपाठीका रूपमा कानुन अध्ययनमा डोर्‍याएकी छन् कमलाले ।

वीरेन्द्रनगर, पिपिराका कमला र १४ वर्षीय छोरा सुशान्त वीरेन्द्रनगरस्थित एडभान्स बेटर स्कुलमा कक्षा ११ मा कानुन अध्ययन गरिरहेका छन् । ‘म कानुन पढेर आफूजस्तै हिंसा खेपेका र अन्यायमा परेका महिलाको पक्षमा वकालत गर्न चाहन्छु,’ कमलाको यस्तो जवाफ सुनेपछि सँगै बसेका छोराले भने, ‘म भविष्यमा न्यायाधीश बनेर पीडितलाई न्याय दिन्छु ।’

Yamaha

आमाछोराको सपना फरकफरक भए पनि उनीहरूको कानुन प्रेरणा भने कमलाले खेपेको हिंसा नै हो । बिहेलगत्तै कमलाले जुन किसिमको हिंसा खेपिन्, त्यसले उनलाई जीवनप्रति निकै निराश बनायो । उनको मनमा ‘पढेर के काम ?’ भन्ने निराशाले डेरा जमायो । ‘अहिले सुर्खेतमै कानुन विषय आएको थाहा पाएपछि मैले पढाइलाई फेरि जोडेँ,’ उनले भनिन्, ‘यो पढेपछि अन्यायमा परेका महिलालाई कानुनी सहायता गर्ने र भविष्यमा स्वरोजगार हुने योजना बनाएकी छु ।’

आमाछोरा सँगसँगै पढेको लाभ निकै छ । कक्षाकोठामै अभिभावक हुँदा सुशान्त ढुक्क छन् । उनको ध्यान पढाइबाहेक अन्यत्र जाँदैन । ‘कापीकलम किन्ने, भर्नालगायत शुल्क कहिले तिर्ने, कसरी तिर्ने भन्ने ‘टेन्सन’ नै छैन,’ उनी भन्छन्, ‘ममी सँगै भएपछि मलाई पढाइबाहेक अन्यत्र ध्यान दिनै पर्दैन ।’

कमलालाई पनि सजिलो छ । कहिलेकाहीँ घरव्यवहारले पढाइ छुट्यो भने के गर्ने भन्ने चिन्ता हुँदैन । साताअघि छोरी (सुशान्तको बहिनी) बिरामी पर्दा कमला दुई दिन गयल भइन् । शिक्षक गीता कोइरालालाई चिन्ता लाग्यो अब कमलालाई छुटेको पाठ कसरी पढाउने ? ‘म यहीबारे सोचिरहेकी थिएँ, उनले (कमलाले) त स्कुलमा पढाइ भएको सबै नोट छोराले दिइसक्यो पो भनिन्,’ कोइरालाले भनिन्, ‘आमाछोरा सँगसँगै पढ्दाको फाइदा योभन्दा बढी के हुन सक्छ र ?’

साउन ३१ । यो दिन कमला– सुशान आमाछोराको जीवनमा विशेष थियो । उनीहरू पहिलोपटक एउटै कक्षामा एउटै विषय सँगसँगै पढ्दै थिए । कक्षाकोठाभित्र पस्नेबित्तिकै आमाछोरा पहिलो बेन्चमा सँगै बसे ।दोस्रो दिन ? फरक थियो । सुशान्त आमासँग होइन, अर्कै केटा साथी बनाएर उनैसँग बस्न पुगे ।

आमा पनि के कम, उनी छात्राको लाइनमा पुगेर केटी साथीसँगै लहसिइन् तर अहिले पनि आमाछोरा सँगैसँगै स्कुल जान्छन् । एउटै कोठामा, तर फरकफरक बेन्चमा बसेर पढ्छन् । फर्किंदा भने सँगसँगै फर्किन्छन् । कमला भन्छिन्, ‘हामी आमाछोराको गन्तव्य एउटै हो, कानुन पढेर सामाजिक न्यायमा योगदान दिने ।’

प्रकाशित : भाद्र २५, २०७५ ०७:३९
प्रतिक्रिया
पठाउनुहोस्
ADVERTISEMENT
ADVERTISEMENT

अल्टिच्युड हेलिकप्टर दुर्घटना: छानबिन गर्न समिति

कान्तिपुर संवाददाता

काठमाडौँ — अल्टिच्युड एयरको हेलिकप्टर दुर्घटनामा मृत्यु भएका पाइलटसहित ६ जनाको शव आइतबार राजधानी ल्याइएको छ । अल्टिच्युडका निर्देशक सीताराम सापकोटाका अनुसार दुर्घटनास्थल नुवाकोटको बुर्सङचेतबाट नेपाली सेना, प्रहरी, उद्धारकर्ताहरूले शनिबार राति नै शव बोकेर सडकसम्म पुर्‍याएका थिए ।

उद्धारमा गएको अल्टिच्युडकै हेलिकप्टरबाट लिइएको दुर्घटनाग्रस्त हेलिकप्टरको तस्बिर ।

गाडीमा सदरमुकाम विदुर ल्याइएका शव आइतबार बिहानै हेलिकप्टरमार्फत शिक्षण अस्पताल महाराजगन्ज ल्याएको थियो । मृतकको शव सोमबार आफन्तजनलाई बुझाइने सापकोटाले बताए ।

उनका अनुसार दुर्घटनामा मृत्यु हुने यात्रुका परिवारले २० हजार अमेरिकी डलर र चालकका परिवारले १ लाख अमेरिकी डलर बिमाबापत क्षतिपूर्ति पाउनेछन् । यसैबीच पर्यटन मन्त्रालयले घटनाको छानबिन गर्न सहसचिव बुद्धिसागर लामिछानेको संयोजकत्वमा ३ सदस्यीय समिति बनाएको छ ।

मनास्लु हिमाल आरोहण गर्न जाने १० जना चिनियाँ आरोहीको चार्टर उडान सकेर फर्किंदै गर्दा अल्टिच्युड एयरका वरिष्ठ क्याप्टेन निश्चल केसीले उडाएको हेलिकप्टर नुवाकोटको बुर्सङचेतस्थित करिब ५५ सय फिट उचाइको मैलुङपाखा जंगलमा दुर्घटनामा परेको थियो ।

उक्त घटनामा पाइलटसहित ७ जना सवारमध्ये ६ जनाको मृत्यु भएको थियो । घटनामा गोरखा ल्होकी आनी डोल्मा डिकी बाँच्न सफल भएकी थिइन् भने हेलिकप्टरका क्याप्टेन केसी, मनास्लु हिमाल आरोहण गर्न नसकेर फर्किएका ६८ वर्षीय जापानी नागरिक हिरोमी कमात्सु, रामेछापका ४० वर्षीय डिल्लीबहादुर गुरुङ, दोलखाका ३७ वर्षीय हीरा शेर्पा, सिन्धुपाल्चोकका २२ वर्षीय सुनील तामाङको घटनास्थलमै मृत्यु भएको थियो । यी सबै मनास्लु आरोहण अभियानमा संलग्न पर्यटनकर्मी थिए । यीबाहेक गोरखा सामागाउँस्थित साम्दोका स्थानीय छोवाङ नोर्बुको पनि मृत्यु भएको थियो ।

यो हेलिकप्टर शनिबार बिहान काठमाडौंबाट चार जना चिनियाँ नागरिक र एक नेपाली गाइड लिएर उत्तरी गोरखाको चुमनुब्री गाउँपालिका वडा नम्बर १ स्थित सामागाउँमा बिहान साढे ७ बजे पुगेको थियो । स्थानीय प्रहरीका अनुसार उक्त चार्टर हेलिकप्टर त्यहाँबाट ७ बजेर ४० मिनेटमा काठमाडौंका लागि फर्किएको थियो ।

फर्कंदा यसमा ५ नेपाली र एक जापानीसहित ६ यात्रु थिए । बिहान ८ बजेर २० मिनेटमा काठमाडौंमा अवतरण गर्नुपर्ने हेलिकप्टर ८ बजेर ५ मिनेटपछि सम्र्पकविहीन भएको थियो । करिब ६ घण्टापछि दुर्घटनास्थल पहिचान भएको थियो ।

प्रकाशित : भाद्र २५, २०७५ ०७:३९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT