अरुलाई रोक्ने मन्त्री पण्डित आफैं विदेश सयर गर्दै 

कान्तिपुर संवाददाता

काठमाडौं — जनप्रतिनिधिहरुलाई विदेश भ्रमणमा रोक लगाएका संघीय मामिला तथा सामान्य प्रशासन मन्त्री लालबाबु पण्डित आफै विदेश सयर गर्दैछन् । चीनको सिचुवान प्रान्तको छेन्दुमा १ देखि ५ असोजसम्म हुने ‘१७ औं वेस्ट्रन चाइना इन्टरनेशनल फेयर’ मा भाग लिन मन्त्री पण्डित भदौ ३१ मा पत्नी विमला महत, सहसचिव केदारप्रसाद पनेरु र स्वकीय सचिव मनोज राईलाई लिएर भ्रमणमा जान लागेका हुन् ।



Yamaha

यसअघि महानगरपालिका, उपमहानगरपालिका, नगरपालिका र गाउँपालिकाका प्रमुख तथा उपप्रमुख विदेश भ्रमणमा जान खोज्दा मन्त्री पण्डितले उनीहरुलाई अनुमति दिएका थिएनन्।

यो पढ्नुहोस् : मन्त्रालयले रोक्यो जनप्रतिनिधिको विदेश भ्रमण

आयोजकहरुकै खर्चमा विदेश भ्रमण गर्न खोजेका जनप्रतिनिधिलाई विदेश जान रोकेका मन्त्री पण्डित आफू आयोजककै खर्चमा चीन जान लागेको स्रोतले बतायो। मन्त्री पण्डितका स्वकीय सचिव मनोज राईको भ्रमण खर्च भने अर्थ मन्त्रालयले व्यहोर्नेछ। अर्थले भदौ २० मा राईको खर्च व्यहोर्ने सहमति दिएको हो।

सामान्य प्रशासन स्रोतबाट कान्तिपुरलाई प्राप्त पत्र अनुसार चिनियाँ कम्युनिष्ट पार्टी सिचुवान प्रान्तका सेक्रेटरी तथा डेपुटी सेक्रेटरीका तर्फबाट भएको निमन्त्रणा बेइजिङस्थित् नेपाली दूतावासबाट आएको हो।

यसअघि मोरक्कोको माराकेसको कार्यक्रममा भने मन्त्री पण्डित सहभागी भएका थिएनन्। त्यतिबेला उनले विदेश भ्रमण आफ्नो प्राथमिकताको विषय नभएको दाबी गरेका थिए।

छेन्दुमा हुने फेयरमा विश्वबाट हजारौं व्यक्तिहरु सहभागी हुनेछन्। सन् २००० देखि सुरु भएको यो फेयरमा धेरै मुलुकबाट उच्च अधिकारी सहभागी हुने पत्रमा उल्लेख छ।

चीनका राष्ट्रपति सि चिनफिङको समाजवादी विचारधाराबाट अभिप्रेरित यो फेयरले विकासको नयाँ सोच र गुणात्मक विकास प्राप्त गर्ने लक्ष्य राखेको छ।

प्रकाशित : भाद्र २६, २०७५ १४:२२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

झापामा एक व्यवसायीको हत्या 

अर्जुन राजवंशी

दमक — दमकका एक व्यवसायीको हत्या भएको छ । दमक नगरपालिका ६ मा रेडिमेट कपडाको व्यापार गर्दै आएका ३८ वर्षीय खेमराज पौडेलको हत्या भएको हो । 

कमल गाउँपालिका–६ मंगलबारे घर भएका पौडेलको शव मंगलबार बिहान गौरीगञ्ज–६ देवीगञ्जस्थित नेपाल–भारत सीमा नजिक भेटिएको थियो। बिहान ७ बजेतिर गाईवस्तु बाँध्न गएकाहरुले खेतको पैनीमा शव देखेपछि प्रहरीलाई खबर गरेका थिए।

पौडेलको हत्यामा संलग्न रहेको आशंकामा गौरीगञ्ज–६ का कपडा व्यापारी २८ वर्षीय सद्दाम हुसेनलाई पक्राउ गरेको इलाका प्रहरी कार्यालय गौरीगञ्जका प्रहरी निरीक्षक टेकेन्द्र पौडेलले जानकारी दिए।

पौडेलको घाँटी, छाती, पाखुरा गरी शरीरको विभिन्न भागमा गहिरो चोट रहेको प्रहरी निरीक्षक पौडेलले बताए।

प्रहरीका अनुसार व्यापारी पौडेल सोमबार बेलुकादेखि बेपत्ता थिए। सोमबार बेलुका ५ बजेतिर पसल बन्द गरेर श्रीमती दीपासँगै ग्राहकसँग पैसा उठाउन दमकबाट गौरीगञ्ज झरेका थिए।

घटनामा संलग्न रहेको आशंकामा थप केही व्यक्तिलाई सोधपुछ गर्ने कार्य भइरहेको प्रहरीले जनाएको छ। शवलाई पोष्टमार्टमका लागि धरान पठाइएको छ।

प्रकाशित : भाद्र २६, २०७५ १३:५१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT