किशोरी हत्या प्रकरण : अनुसन्धान जहाँको त्यहीँ, तीन टोली खटिए पनि प्रगति देखिएन

भवानी भट्ट

कञ्चनपुर — निर्मला पन्तको बलात्कारपछि हत्या घटना अनुसन्धानमा खटिएको प्रहरी टोली अझै अलमलमै देखिन्छ । तत्कालीन एसपी डिल्ली विष्टसहितका अधिकारीलाई काठमाडौं झिकाएपछि आएका नयाँ एसपी कुबेर कडायतको टोलीले पनि अनुसन्धानमा खासै प्रगति गर्न सकेको छैन । 

जिल्लामा हाजिर भएको दोस्रो दिन प्रारम्भिक चरणबाटै अनुसन्धान सुरु गरेको जानकारी दिएका एसपी कडायतले अनुसन्धानमा खासै प्रगति हुन नसकेको बताए । भदौ ८ गते जिल्ला प्रशासन कार्यालयमा आयोजित सर्वपक्षीय छलफलमा उनले ‘अनुसन्धान गर्ने माहोल बनाइदिए प्रहरीले काम गरेर देखाउने’ बताएका थिए तर उनले भनेजस्तो प्रगति नदेखिएको नागरिक समाजका अगुवा बताउँछन् ।

Yamaha

‘दुई जनाको रगतको नमुना डीएनए परीक्षणका लागि पठाएका छौं,’ उनले भने, ‘हामी अनुसन्धानमै छौं, देखिने उपलब्धि भएको छैन ।’ कडायतका अनुसार तत्कालीन एसपी विष्टका छोरा किरण र आयुष विष्टको डीएनए परीक्षणका लागि नमुना पठाइएको हो । ‘उनीहरूलाई हामीले निगरानीमा राखेका छौं,’ उनले भने, ‘थप कोही शंकास्पद देखिए उनीहरूको पनि नमुना संकलन गरिनेछ ।’ उनीहरूसँगै तत्कालीन एसपी विष्टको पनि डीएनए परीक्षणका लागि नमुना लिइएको छ ।

घटना अनुसन्धानमा जिल्ला प्रहरी कार्यालयको टोलीसँगै केन्द्रीय अनुसन्धान ब्युरो (सीआईबी) र प्रहरी हेडक्वार्टरको टोलीसमेत खटिएको छ । सीआईबीको टोली दुई सातादेखि यहीँ छ । हेडक्वार्टरको टोली भर्खरै आएको हो । ‘जति टोली आए पनि अनुसन्धान जिल्ला प्रहरी कार्यालयले नै गर्ने हो,’ कडायतले भने, ‘अन्य टोली हामीलाई सघाउन आएका हुन् ।’

प्रहरीले अहिले पनि शंकास्पद व्यक्तिहरूलाई सोधपुछ गर्ने र सूचना संकलनकै काम गरिरहेको छ । करिब डेढ सय बढीसँग आवश्यक सोधपुछ गरिसकिएको एसपी कडायतले जानकारी दिए । प्रहरीले यसअघि सार्वजनिक गरिएका दिलीप विष्टलाई दुई दिनअघि डीएनए रिपोर्ट मेल नभएर छाडेपछि अनुसन्धान साँघुरिँदै गएको बताए पनि अपराधी नजिक भने पुग्न नसकेको स्रोतले जनाएको छ । नयाँ एसपी र डीएसपी आएको २३ दिन भइसक्यो तर अनुसन्धानमा प्रगति देखिएको छैन ।

नागरिक समाजको बैठकले बिहीबार घटना अनुसन्धानका लागि दबाबमूलक कार्यक्रम गर्ने निर्णय गरेको छ । ज्ञापनपत्र दिने, छलफल तथा अन्तक्रिया गर्ने र भेटघाट गरेर दबाब दिनेलगायत कार्यक्रम गरेको छ । यसैगरी घटना भएकै दिनदेखि आन्दोलनमा उत्रिएका महिला पुन: आन्दोलित बनेका छन् । उनीहरूले तीजका दिनदेखि आन्दोलन सुरु गरेका हुन् ।

बिहीबारदेखि नै नेविसंघले पनि घटना अनुसन्धान माग गर्दै आन्दोलन सुरु गरेको छ । शुक्रबार जिल्लाका सरकारी कार्यालय बन्द गराउने क्रममा प्रहरीको कुटाइबाट ४ जना घाइते भएका छन् जसमध्ये लोकेन्द्र भण्डारी गम्भीर घाइते छन् । टाउकामा चोट लागेका उनको महेन्द्रनगरमा उपचार हुन नसकेपछि धनगढी रिफर गरिएको संघका निवर्तमान उपाध्यक्ष केशव जोशीले बताए । उनका अनुसार विक्रम बुढा, सरोज रोकाया र नरेन्द्र साउद पनि घाइते भएका छन् ।

प्रकाशित : भाद्र २९, २०७५ २०:२५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सुन तस्करी र हत्या मुद्दा : एसएसपी लोहनीलाई सादा तारेखमा छाड्न आदेश

माधव घिमिरे, विनोद भण्डारी

विराटनगर — संगठित अपराध, सुन तस्करी र सनम शाक्य हत्या मुद्दाका अभियुक्तमध्येका निलम्बित एसएसपी दिवेश लोहनीलाई उच्च अदालतले सादा तारेखमा छाड्न आदेश दिएको छ । न्यायाधीश नरेन्द्रनाथ कर्ण र तारंगा सुवेदीको इजलाशले शुक्रबार उनलाई छाड्ने आदेश दिएको हो ।

तत्काल प्राप्त प्रमाणका आधारमा जिल्ला अदालतले पुर्पक्षका लागि थुनामा राख्न दिएको आदेश ठहर नहुने देखिएको भन्दै सादा तारेखमा छाडेर मुद्दा कारबाही अघि बढाउने आदेश भएको रजिष्ट्रार नारायणप्रसाद रेग्मीले बताए ।

लोहनीका तर्फबाट वरिष्ठ अधिवक्ता सुशील पन्त र अधिवक्ताहरु देवेन्द्र कोइराला र रामचन्द्र सुवेदीले इजलाशसमक्ष बहस गरेका थिए । सरकारका तर्फबाट जिल्ला न्यायाधिवक्ताहरु पुण्यप्रसाद पाठक, गोपालप्रसाद रिजाल र राजेन्द्रसिंह भण्डारीले बहस प्रस्तुत गरेका थिए ।

यो प्रकरणमा एसएसपी लोहनीलाई गत बैशाख १६ गते सरकारद्वारा गठित उच्चस्तरीय छानबिन समितिले पक्राउ गरेको थियो । उनलाई जिल्ला अदालतको आदेशपछि सुनसरीको झुम्कास्थित क्षेत्रीय कारागारमा राखिएको छ ।

जिल्ला अदालतले तत्काल देखिएको प्रमाणका आधारमा दोषी देखिएको भन्दै लोहनीसहितका अभियुक्तलाई पुपक्र्षका लागि थुनामा राख्ने आदेश दिएको थियो । जिल्लाको यो आदेश बेरितको भएको भन्दै उनका कानुन व्यवसायीले उच्च अदालतमा त्यसबेला प्रचलित मुलुकी ऐन अदालती बन्दोबस्तको १७ नम्बर बमोजिम बदरको आदेश माग गर्दै निवेदन दिएका थिए ।

यसअघि उच्च अदालत विराटनगरले अभियुक्तमध्ये ६ जनालाई थुनामा राख्ने आदेश दिइसकेको छ । जिल्ला अदालत मोरङले यसअघि गरेको आदेश सदर गर्दै उच्चले यस्तो आदेश दिएको हो । न्यायाधीश थिरबहादुर कार्की र हरिप्रसाद भण्डारीको इजलाशले बिहीबार डिएसपी सञ्जयबहादुर राउतलाई थुनामा राख्ने आदेश सदर गरेको थियो ।

यस्तै अभियुक्तहरु तुलाराम थारु र लाक्पा शेर्पालाई पनि थुनामा राख्ने जिल्लाको आदेश सदर भएको थियो । यसैगरी यो मुद्दामा अरु तीन अभियुक्तलाई थुनामा राख्न मातहत अदालतले दिएको आदेश बेरितको नभएको भन्दै उच्च अदालतले सदर गरेको थियो । अभियुक्तहरु पु्ण्यप्रसाद लामा, सम्बिर तोलाङगे र राजन कुमारको हकमा उच्च अदालतले जिल्लाकै सदर गर्दै आदेश बेरितको नभएको ठहर्‍याएको हो ।

अभियुक्तहरुमध्ये डिआइजीद्वय गोविन्द निरौला र श्याम खत्री, एसपी विकासराज खनाल, डिएसपी प्रजित केसी, सइ बालकृष्ण सञ्जेललगायतका तर्फबाट पनि कानुन व्यवसायीहरुले उच्च अदालतमा निवेदन दिएका छन् । ती निवेदनमा सुनुबाइ हुन बाँकी रहेको अदालतले जनाएको छ ।

यो प्रकरणमा सरकारी वकिलको कार्यालयले बैशाख तेस्रो साता मुख्य कारोबारी गोरे भनिने चूडामणि उप्रेतीसहित ६३ जनाविरुद्ध जिल्ला अदालत मोरङमा मुद्दा दर्ता गरेको थियो ।

सरकारी वकिलको कार्यालयले उनीहरुविरुद्ध आपराधिक समुह स्थापना गरी सञ्चालन गरेको, सुनको अवैध कारोबार गरेको, अपहरण, शरीर बन्धक र कर्तब्य ज्यान मुद्दामा उनीहरु विरुद्ध अभियोगपत्र दर्ता गरेको थियो । यो मुद्दामा १७ अर्ब १ करोड ८० लाख ७१ हजार ४ सय १३ रुपैया ९० पैसा विगो माग दाबी गरिएको छ ।

३३ मध्ये ३१ जनालाई जिल्ला अदालत मोरङका न्यायाधीश शर्माको इजलाशले पुर्पक्षका थुनामा राख्ने आदेश दिएको थियो । एकजनालाई धरौटी र अर्का एकजनालाई सादा तारेखमा छाड्ने आदेश भएको थियो ।




प्रकाशित : भाद्र २९, २०७५ २०:११
पूरा पढ्नुहोस्
प्रतिक्रिया
पठाउनुहोस्
ADVERTISEMENT