'पर्यटक भिसाको सेटिङ'बारे छानबिन सुरु
काठमाडौँ — पर्यटक भिसाको सेटिङमा संग्लन भएको आशंकमा त्रिभुवन अन्तर्राष्ट्रिय विमानस्थलस्थित अध्यागमन कार्यलयले दुई अध्यागमन अधिकृतलाई अनुसन्धानका निम्ती भन्दै जिम्मेवारी मुक्त गरेको छ ।
गत बिहीबार कान्तिपुरमा ‘पर्यटक भिसाको सेटिङ’ शिर्षकमा दुबई लगायतका खाडी देशमा काम खोजीदिने आश्वासन दिँदै पर्यटक भिषामा नेपालीलाई पठाउने गिरोहमा अध्यागमन अधिकृतहरुको समेत संग्लनता रहेको समाचार प्रकाशित भएको थियो ।
विमानस्थलस्थित अध्यागमन प्रमुख राजेश पौडेलका अनुसार समाचार छापिएलगत्तै त्यसमा उल्लेखित तथ्य, सेटिङमा पर्यटक भिसामा प्रस्थान अनुमती दिने अध्यागमन अधिकृत, अनुमती दिनाको कारणबारे बुझ्न समिती गठन गरिएको हो ।
उनका अनुसार बरिष्ठ अध्यागमन अधिकृत कल्पना घिमिरेको नेतृत्वमा गठित समितीले समाचारमा उल्लेख गरिएका महिलाहरुले कसरी प्रस्थान अनुमती पाए, त्यसको आधार के थियो भन्ने लगायतका विषयमा अनुसन्धान गर्नेछ । अध्यागमन प्रमुख पौडेलका अनुसार तीन दिनको समयसीमा रहेको समितीले सम्भवत: आईतबार प्रतिवेदन बुझाउनेछ ।
प्रकाशित : आश्विन ५, २०७५ १७:२८