२१.१२°C काठमाडौं
संघीय संसद्ले पायो पूर्णता
काठमाडौँ — संसदीय समितिको नेतृत्व चयन भएसँगै संघीय संसद्ले सात महिनापछि पूर्णता पाएको छ । संसदीय सुनुवाइ समितिमा लक्ष्मणलाल कर्ण र राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिको सभापतिमा नीरादेवी जैरु आइतबार निर्विरोध निर्वाचित भएकी छन् ।
यी दुवै संघीय संसदको संयुक्त समिति हुन् । महाअभियोग समितिबाहेक अब सबै समितिसमेत गठन भइसकेका छन् । यो समिति आवश्यक पर्दा मात्रै गठन हुन्छ । प्रतिनिधिसभाको १० वटा र राष्ट्रिय सभाका ४ वटा विषयगत समितिको नेतृत्व यसअघि नै चयन भइसकेको छ । प्रतिनिधिसभा र राष्ट्रिय सभा गरी १४ वटा विषयगत र दुई संयुक्त समितिमध्ये आठवटाको नेतृत्व महिलाले पाएका छन् ।
नेकपा संसदीय दलका उपनेता सुवासचन्द्र नेम्वाङले संसद्ले पूर्णता पाएको बताए । ‘संसदको रिफ्लेक्सन हुने ठाउँ नै मिनी संसद् हो । यसले नेतृत्व पाएसँगै अब संसद् पनि प्रभावकारी हुनेछ ।’ समितिकै कारण सरकारलाई पारदर्शी र जवाफदेही बनाउन सहयोग पुग्ने उनले बताए । नेतृत्व चयन भएसँगै संसदीय समितिसमेत क्रियाशील हुने उनले जानकारी दिए । राष्ट्रिय सभा सांसद राधेश्याम अधिकारीले समितिले नेतृत्व पाएसँगै संघीय संसदको संरचनाले पूर्णता पाएको बताए ।
अनुगमन समिति गठन भएर नेतृत्व पाएपछि संविधानको ३ सय ८ वटै धारा कार्यान्वयन भए/नभएको निगरानीसमेत हुने भएको छ । यो समितिलाई संविधान कार्यान्वयन गराउने समितिका रूपमा समेत लिने गरिन्छ ।
