प्रधानमन्त्रीको प्रश्न, 'नेपाल यही सात महिनामा गरिब भएको हो ?'
काठमाडौँ — प्रधानमन्त्री केपी ओलीले सरकारले गति नलिइरहेकोबारे भइरहेका टीकाटिप्पणीप्रति आपत्ति जनाएका छन् । उनले सरकारले सही दिशा पक्रिइरहेको राम्रो काम गरिरहेको उनले दाबी गरे । ‘अहिलेको बजेटले साउन र भदौमा काम गर्न पायो, बजेट नै राम्ररी निकास हुन पाएको छैन त्यो भएन र यो भएन ?’
संयुक्त राष्ट्रसंघको महासभामा भाग लिएर बिहीबार स्वदेश फर्केका प्रधानमन्त्री ओलीले त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा भने, ‘मानौं नेपाल गरिब यो सात महिनामा भएको हो ? नेपालका बाटाघाटा यही सात महिनामा बनेनन्, पहिले त पिच नै पिच थिए ?’
ओलीले आफू नेतृत्वको सरकार पाँच वर्षसम्म चल्ने बताए । उनले भने, ‘यो सरकार पाँच वर्षसम्म चल्छ । चुनाव गराउँछ र यो भन्दा बलियो भएर आउँछ ।’ नेकपाकै नेताले सरकारको आलोचना गरेकोप्रति इंगित गर्दै उनले अस्थायी कुरा र हल्लाका पछाडि नकुद्न आग्रहसमेत गरे ।
‘हावा चल्यो, हावामा पात बह्यो भने त्यस्तो राजनीतिको पछाडि कुद्ने होइन’ ओलीले भने, ‘मान्छेलाई कहिलेकाहीं चित्त बुझेको हुँदैन । कवितात्मक ढंगले, लयात्मक ढंगले केही कुरा भनिहाल्यो भने त्यसैलाई समातेर एकदम कुद्नुपर्ने केही पनि छैन ।’ उनले कुनै दृष्टिकोण, नीति, देशलाई दिशा दिने र जनताका यथार्थ समस्या सम्झिने राजनीति नगर्न आग्रह पनि गरे ।
प्रधानमन्त्री ओली अमेरिका रहँदा सत्तारुढ नेकपाकै वरिष्ठ नेता माधव नेपालले संसद् बैठकमा सरकारको कामकारबाहीप्रति असन्तुष्टि जनाएका थिए ।
ओली नेतृत्वको टोली गत असोज ६ गते न्यूयोर्क प्रस्थान गरेको थियो ।
प्रकाशित : आश्विन १८, २०७५ १८:२९