चिनीको मूल्यवृद्धिमा अख्तियारलाई अनुसन्धान गर्न लगाउन संसदीय उप–समितिको सुझाव

राजु चौधरी

काठमाडौँ — संसदको सार्वजनिक लेखा समितिले गठन गरेको उप–समितिले चिनीको मूल्यमा छानबिन गर्न अख्तियार दुरुपयोग अनुसन्धान आयोगलाई सिफारिस गर्न सुझाव दिएको छ । लेखराज भट्टको संयोजकत्वमा बनेको उप–समितिले बिहीबार लेखा समितिका सभापति भरत शाहलाई अध्ययन प्रतिवेदन बुझाउँदै उक्त सुझाब दिएको हो ।

साथै समितिले सरकारले चिनीमा लगाएको परिमाणत्मक बन्देजको कोटा खारेज गर्न पनि निर्देशन दिनुपर्ने सुझाब दिएको छ। अर्थ मन्त्रालयमार्फत सरकारलाई वार्षिक एक लाख मेट्रिक टन मात्रै चिनी आयात गर्न पाउने व्यवस्था खारेज गर्नुपर्ने सुझाब दिएको हो।

Yamaha

मन्त्रीपरिषदले स्वदेशी उद्योलाई प्रवद्र्धन गर्न भन्दै वार्षिक एक लाख मेट्रिक टन मात्रै चिनी आयात गर्न पाउने निर्णय गत महिना गरेको थियो। निर्णय लगत्तै बजारमा चिनीको भाउ ह्वातै बढेको छ। यसबारे छानविन गर्दै लेखा समितिले उप समिति गठन गरेको थियो।

प्रकाशित : आश्विन २५, २०७५ १३:४९
ADVERTISEMENT
प्रतिक्रिया
पठाउनुहोस्
ADVERTISEMENT

बिदामा के गर्ने ?

कञ्चन अधिकारी

काठमाडौँ — दसैंमा लामो बिदा हुन्छ । कार्यालय, स्कुल, कलेज सबै बन्द हुन्छन् । कार्यालयहरू कम्तीमा चार दिन बन्द रहनेछन् । प्राय: शिक्षणसंस्थाले तिहारसम्मै बिदा दिन्छन् ।

यो लामो फुर्सदलाई कसरी सदुपयोग गर्ने ? कतिले योजना बनाइसकेका होलान् । धेरैलाई अन्योल पनि होला ।निम्न तरिका उपयुक्त हुन सक्छन् :

हाइकिङ वा ट्रेकिङ
हाइकिङका लागि टाढा धाउनै पर्दैन । आफ्नो गाउँठाउँबाट नजिकै जाँदा हुन्छ । कम्तीमा ४ देखि ६ घण्टा हिँड्न सकिने ठाउँलाई हाइकिङ रुट बनाउनुपर्छ । हाइकिङ एक्लैभन्दा समूहमा रमाइलो हुन्छ । त्यसैले मन मिल्ने साथी बटुल्नुपर्छ । दसैंका बेला पसल बन्द हुन सक्ने भएकाले खाना र खाजा आफैं बोक्नुपर्छ ।

ट्रेकिङ पनि उपयुक्त विकल्प हो । यसका लागि बिदाको ४ दिन र अरू दुई दिन थपेर छोटो तर सजिलो रुटमा जान सकिन्छ । अन्नपूर्ण आधारशिविर, पाथीभरा मन्दिर, लाङटाङ, गोसाइँकुण्ड, खप्तड, रारा, कन्याम, मनाङ, कालिञ्चोक, सैलुङलगायत काठमाडौंनजिकका गन्तव्य हुन् । ट्रेकिङमा पनि एक्लैभन्दा समूहमै जानु उपयुक्त हुन्छ । यी गन्तव्यमा पर्यटनको मौसम सुरु भइसकेकाले खाने, बस्ने ठाउँको चिन्ता गर्नुपर्दैन । गोसाइँकुण्ड, सैलुङ र पाथीभरामा भने बास र खानेकुराको जोहो गरेरै जानु उपयुक्त हुन्छ ।

फोटोग्राफी
चाडबाडमा राम्रो देखिने र फोटो खिच्ने रहर सबैको हुन्छ । अहिले प्राय: मानिसका हातमा नयाँनयाँ फिचरका क्यामरा छन् । मोबाइलबाटै पनि खिच्न सकिन्छ । मोबाइल फोटोग्राफीदेखि डीएसएलआर फोटोग्राफीसम्म अपनाउन सकिन्छ ।

सामान्य नियम र आफ्नै क्यामेराको विशेषता थाहा नहुँदा उत्कृष्ट फोटो खिच्न सकिएको हुन्न । यो बिदालाई क्यामरा र फोटोग्राफीका तौरतरिका बुझ्ने अवसरका रूपमा पनि उपयोग गर्न सकिन्छ । इन्टरनेटबाट पनि क्यामरा चलाउने तरिका सिकिन्छ । इन्टरनेट सर्च इन्जिन वा यू–ट्युबमा गएर खोज्न सकिन्छ । कुन ठाउँमा कुन मोडमा राखेर खिच्ने, कम्पोजिसन कसरी गर्ने भन्ने ज्ञानले फोटो अझै उत्कृष्ट हुन सक्छ ।

भिडियोग्राफी
मोबाइल र क्यामरा मानिसका साथबाट नछुट्ने साधन भइसके । क्यामेरा नभए पनि मोबाइल प्रायसँग छ । कम्पनीहरूले मोबाइलमै उत्कृष्ट फोटो तथा भिडियो खिच्न सक्ने क्षमता राखिसके । फोरके भिडियो खिच्ने मोबाइलसम्म आइसकेका छन् । हामी भिडियो खिच्छौं तर सदुपयोग गर्न जान्दैनौं । त्यसलाई राम्ररी सम्पादन गर्न पनि जान्दैनौं । मोबाइलबाट ल्यापटप वा कम्प्युटरमा राखेर एडिट गर्न गाह्रो लाग्छ । त्यसैले बिदामा भिडियोग्राफी र सम्पादन सिकेर आफ्नो सीपलाई पूर्णता दिन सकिन्छ ।

यसका लागि पनि यू–ट्युब वा सर्च इन्जिन उपयुक्त हुन सक्छन् । मोबाइलमै भिडियो सम्पादन गर्ने अनेकौं एप्लिकेसन हुन्छन् । सम्पादित भिडियो यू–ट्युब वा क्लाउड स्टोरेजमा राख्न सकिन्छ ।

भ्लगिङ
कुनै जमाना थियो, दैनिकी डायरीमा लेख्ने अनि सँगालेर राख्ने । प्रविधिको फड्कोसँगै एनालग डायरीलाई डिजिटल डायरी अर्थात् ब्लगले विस्थापित गरेको छ । ब्लगलाई अब भ्लगले विस्थापित गर्दै छ । भ्लग भनेको भिडियोमार्फत तयार पारिने ब्लग हो । दसैंमा आफूलाई मनपर्ने ठाउँ वा विषयबारे भ्लगिङ गर्न सकिन्छ । यसो गर्दा आफूले खिचेका भिडियो जति उत्कृष्ट भयो त्यति राम्रो । नेपाल र विदेशका केही चर्चित भ्लगर र उनीहरूका कामबारे जानकारी लिएर भ्लगिङ गर्न सकिन्छ ।

भ्लगिङबाट फुर्सदको सदुपयोग मात्र होइन, आम्दानी पनि गर्न सकिन्छ । आफूले बनाएको भिडियो यू–ट्युबमा राखेर पैसा कमाउन सकिन्छ । नयाँ भ्लगिङ गर्दै हुनुहुन्छ भने तत्काल आम्दानी भइहाल्दैन । आफ्नो च्यानलको सब्स्क्राइबर भने बढाउन सकिन्छ ।

बायोडाटा बनाउने
बायोडाटा राम्रो नभएकैले जागिर नपाएको गुनासो धेरैको हुन्छ । त्यसैले जागिर खोजीमा रहेकाका लागि बायोडाटा बनाउने वा अद्यावधिक गर्ने उपयुक्त मौका हुन सक्छ दसैं बिदा । बायोडाटा बनाउने तरिका धेरै छन् । विश्वमा चलेका प्रमुख तरिकाबारे गुगल सर्च इन्जिनमा खोज्न सकिन्छ । आफ्नो शिक्षा, पेसा, रुचिजस्ता विषयअनुसार बायोडाटा तयार पार्नुपर्छ । जब अप्लाई गर्दा राम्रो बायोडाटा पेस गर्नुपर्छ । त्यसो भए मात्रै सर्टलिस्ट गर्नेहरू प्रभावित हुन्छन् ।

खाना बनाउन सिक्ने
खाना बनाउन कसलाई आउँदैन होला र ? तर हामीले घरमा खाइरहेको भन्दा फरक परिकार बनाउने कला सिक्न यो बिदा उपयुक्त हुन सक्छ । दसैंमा पारिवारिक जमघट हुने भएकाले पनि नयाँ/नयाँ परिकारको महत्व हुन्छ । चाडबाडमा सामग्री पनि पर्याप्त हुन्छन् । नयाँ स्वादका परिकारबारे घरपरिवारकै अनुभवीबाट सिक्न सकिन्छ । फेसबुकमा रहेका फुडसम्बन्धी पेज वा यू–ट्युब पनि हेर्न सकिन्छ ।

पेन्टिङ
पेन्टिङ सिर्जनशील काम हो । यो काम न भीडभाडमा गर्न सकिन्छ न हतारमा । यसका लागि पनि दसैंबिदा उपयुक्त हुन सक्छ । धेरै हतार र तनाब नहुने भएकाले उत्कृष्ट सिर्जनाको माहोल हुन्छ । पेन्टिङका लागि घरमै बस्नुपर्छ भन्ने छैन, बाहिर निस्केर पनि गर्न सकिन्छ । यस बेला सहरबजारमा त्यति भीडभाड हुन्न । प्राय: पसल बन्द हुने भएकाले आवश्यक सामग्री भने पहिल्यै जोहो गर्नुपर्छ ।

प्रकाशित : आश्विन २५, २०७५ १३:४६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT