गौतमलाई सांसद बनाउने प्रस्तावले नेकपाको एकता प्रक्रियामा असर

प्रकाश सिलवाल/रासस

काठमाडौँ — नेपाल कम्युनिष्ट पार्टीका नेता वामदेव गौतमलाई उपनिर्वाचनबाट प्रतिनिधिसभामा ल्याउने पहलसँगै पार्टीका नियमित कार्यसूची प्रभावित भएको छ ।

उपनिर्वाचनमा गौतमलाई अघि सार्ने तयारीपछि पार्टीभित्र र बाहिरबाट व्यापक टीकाटिप्पणी व्यक्त भएपछि उक्त विषयमा नेकपाको सचिवालय अनिर्णित भएको छ भने शीर्ष नेताबीच आपसी आशङ्कासमेत पैदा भएको छ ।

Yamaha

काठमाडौँ निर्वाचन क्षेत्र नं ७ का नेकपाका सांसद रामवीर मानन्धरले नेता गौतमका लागि ठाउँ खाली गर्न आफूले राजीनामा दिन तयार रहेकाले स्वीकृतिका लागि नेतृत्वलाई दिएको पत्र पार्टीको यही असोज २२ गतेको सचिवालय बैठकमा एकाएक प्रस्तुत भएपछि अन्य नियमित कार्यसूची प्रभावित भएको थियो । पार्टी एकतालाई तल्लो कमिटीसम्म विस्तार गर्नुपर्ने र सरकार सञ्चालन तथा समन्वयलाई कसरी प्रभावकारी बनाउने भन्ने विषयमा छलफल केन्द्रित भएका बेला उपनिर्वाचनको सन्दर्भले विषयान्तर गरेको देखिन्छ ।

पार्टीका अध्यक्ष पुष्पकमल दाहालले मानन्धरको पत्र सचिवालय बैठकमा प्रस्तुत गरेपछि मात्र अध्यक्ष एवं प्रधानमन्त्री केपी ओलीले उक्त विषयमा जानकार भए । उक्त दिनका अन्य कार्यसूचीमा कुनै निर्णय हुन सकेन । उक्त दिन अर्को बैठकको कार्यसूची र स्थायी कमिटी बैठकको मिति तय गर्ने विषयमा छलफल भई यही असोज २४ गतेका लागि तोकिएको प्रवक्ता नारायणकाजी श्रेष्ठले जानकारी दिएका थिए । प्रवक्ता श्रेष्ठले पत्रकारलाई दिएको जानकारीमा मानन्धरको पत्रबारे उल्लेख थिएन । सचिवालयको बैठक पुनः यही असोज २७ गतेका लागि सरेको छ ।

उपनिर्वाचनका विषयमा अध्यक्ष ओली र दाहालबीच बुधबार भएको भेटवार्तामा समीक्षा भएको थियो । त्यस दिन अपराह्न पाथीभारा सद्भावनादूत परिचयपत्र वितरण कार्यक्रममा अध्यक्ष दाहालले पार्टीले हार्ने गरी उपनिर्वाचन नगर्ने स्पष्ट पारेका थिए ।

यही असोज ५ गतेको सचिवालय बैठकले पार्टीका प्रदेश कमिटीका इञ्चार्ज, सहइञ्चार्ज, अध्यक्ष र सचिवको जिम्मेवारी तोकेकामा वरिष्ठ नेता माधवकुमार नेपालले प्रस्तुत गरेको असन्तुष्टिका विषयमा पनि सचिवालयको बैठकमा छलफल हुन बाँकी छ ।

मध्यमार्गी नेता सक्रिय

नेकपाका सचिवालय सदस्य तथा उपप्रधानमन्त्री ईश्वर पोखरेलले पार्टीलाई एकताबद्ध र सुदृढ बनाएर लान आह्वान गर्दै हाल देखिएको विवादका विषयमा अध्यक्ष, वरिष्ठ नेता नेपाल, नेता गौतम र अन्य नेतासँग अलग अलग अनौपचारिक भेटवार्ता गरेका छन् । नेता पोखरेलले भने, 'उपचुनावको विषयमा पार्टीको बैठकमा औपचारिक कार्यसूची बनाई छलफल नै भएको छैन । मानन्धरको पत्र आएको छ । त्यसमा हाल कुनै निर्णय भएको छैन ।'

उनले भने, 'पार्टीको साङ्गठनिक जीवनलाई व्यवस्थित बनाएर एकताको सन्देश देशव्यापी लैजानु अहिलेको आवश्यकता हो । पार्टीको संरचना क्रियाशील नहुँदा पनि साङ्गठनिक स्थितिमा अस्तव्यस्ता देखिएको छ, यो चाँडै सँग्लिएर जान्छ ।'

प्रतिनिधिसभाको गत वर्षको निर्वाचनमा बर्दिया क्षेत्र नं १ बाट नेपाली काङ्ग्रेसका सञ्जयकुमार गौतमसँग पराजित भएका नेता वामदेवले पार्टी एकता, शान्ति प्रक्रिया र राष्ट्रिय राजनीतिमा भूमिका खेल्ने भएकाले प्रतिनिधिसभामा उपनिर्वाचनबाट पनि ल्याउन पहल हुँदै आएको छ । उनलाई यसअघि बाँके, प्यूठान, दैलेख, डोल्पालगायत जिल्लाका सांसदलाई राजीनामा गराई उपनिर्वाचनमा विजयी गराउने पहल गरिएको थियो ।

प्रकाशित : आश्विन २५, २०७५ १७:३५
ADVERTISEMENT
प्रतिक्रिया
पठाउनुहोस्
ADVERTISEMENT

बेलायतबाट नेपालको स्वास्थ्य सेवामा सुधारको आशा 

नवीन पोखरेल

लण्डन — उपप्रधानमन्त्री तथा स्वास्थ्यमन्त्री उपेन्द्र यादवले नेपालको स्वास्थ्य लगायत पूर्वाधार विकासमा बेलायतले पुर्याएको सहयोगको प्रशंसा गरेका छन् ।

लण्डनस्थित नेपाली दूतावासद्वारा बुधबार आयोजित‘नेपाल-ब्रिटेन हेल्थ कोअपरेशन’नामक कार्यक्रममा बोल्दै उनले आगामी दिनमा पनि बेलायत सरकारबाट यस्तै सहयोग प्राप्त भइरहने आशा व्यक्त गरे। मन्त्री यादवले नेपालको संविधानले स्वास्थ्यलाई जनताको मौलिक अधिकार मानेको बताउँदै सरकार सबै जनतालाई गुणस्तरीय सेवा पुर्याउन प्रतिबद्ध रहेको बताए।

वन तथा वातावरण मन्त्री शक्तिबहादुर बस्नेतले सरकार वातावरण संरक्षण गरेर दिगो विकासका लागि प्रतिबद्ध रहेको बताए । उनले भूकम्पपछिको पुर्ननिर्माणमा बेलायत लगायत मित्र राष्ट्रहरुले गरेको सहयोगको प्रशंसा पनि गरे ।

बेलायतका लागि नेपाली राजदूत डा. दुर्गा बहादुर सुवेदीले नेपाल तथा बेलायतबीच रहेको २०० वर्षभन्दा लामो समय बहुआयामिक सम्बन्ध रहेको बताए । उनले बेलायतमा रहेका एकलाख भन्दा बढी नेपालीहरुले दुई देशबीचको जनस्तरीय सम्बन्धलाई अरु बलियो बनाएको जनाए। उनले बेलायतमा कार्यरत नेपाली चिकित्सक तथा नर्सहरुको सेवाको ब्रिटिश सरकार तथा जनताले निकै प्रशंसा गर्ने गरेको पनि बताए ।

उक्त कार्यक्रममा नेपाली तथा ब्रिटिश चिकित्सकहरुले नेपालको स्वास्थ्य सेवामा सुधार ल्याउन दुई देशबीचको सहयोगलाई अरु सुदृढ बनाउनुपर्ने कुरामा जोड दिएका छन् ।

नेप्लीज डक्टर्स एसोसियसन यूकेका अध्यक्ष डा. सविन जोशीले बेलायत लगायत संसारभरी काम गरिरहेका नेपाली चिकित्सकहरु नेपालमा गएर अनुसन्धान तथा सीप स्थानान्तरण गर्न तयार रहेको बताए। तर यसका लागि स्वास्थ्य मन्त्रालयमा एउटा छुट्टै डेस्क खडा गरी समन्वय गर्नुपर्ने सुझाव उनको छ। उनले चिकित्सा सेवामा संलग्न चिकित्सक तथा नीति निर्माताहरुको स्वार्थ बाझिने घटनाहरुलाई कडाइका साथ नियन्त्रण गर्नुपर्ने बताए ।

'कुनै निजी मेडिकल कलेजमा शेयर भएको चिकित्सकलाई नेपाल मेडिकल काउन्सिलको बोर्डमा ल्याइनुहुँदैन । त्यस्तै निजी क्लिनिकमा बिरामी जाँच्ने चिकित्सकहरुले कर तिर्नुपर्छ,' उनले भने ।

ब्रिटेन नेपाल मेडिकल ट्रष्टकी सहअध्यक्ष डा. जिलियन होल्डसवर्थले गएको ५० वर्षमा नेपालमा स्वास्थ्य क्षेत्रमा उल्लेख्य प्रगति भएको बताइन्। उनले ५० वर्ष अघि स्थलमार्ग हुँदै नेपालको यात्रामा गएका ब्रिटिश डक्टर तथा नर्सहरुको टोलीले पूर्वी नेपालमा क्षयरोगीहरुको उपचार गर्नमा महत्वपूर्ण भूमिका निर्वाह गरेकेा स्मरण गरिन्। उनले अहिले पनि ट्रष्टले नेपालमा क्यान्सर रोगको उपचारलाई विश्वस्तरको तुल्याउन नेपाली चिकित्सकहरुलाई बेलायतमा तालिम दिलाउने काम गरिरहेको बताइन्।

अर्को कल्याणकारी संस्था हेल्थ एक्सचेन्ज नेपालका अध्यक्ष डा जेरेमी वार्डले आफ्नो संस्थाले नेपालमा शिशु उपचार, मधुमेह रोगको उपचारमा संलग्न नेपाली स्वास्थ्यकर्मीहरुलाई तालिम दिने लगायतका कामहरु गरिरहेको बताए। उनले दुईदेशका स्वास्थ्यकर्मीहरुले एकअर्काबाट निकै सिक्न सक्ने धारणा पनि व्यक्त गरे।

नेप्लिज नर्सिङ एसोसिएसन यूकेकी अध्यक्ष प्रसुना कँडेलले बेलायतमा कार्यरत झण्डै ३ हजार नेपाली नर्सहरुले बेलायतको स्वास्थ्य सेवामा मात्र होइन, भूकम्पपछि नेपाल गएर पनि सेवा पुरयाएको सम्झना गरिन् ।

कार्यक्रममा बेलायतस्थित नेपाली चिकित्सकहरु, नर्सहरु तथा ब्रिटिश चिकित्सकहरुको उल्लेख्य उपस्थिति थियो। एउटा अन्तर्राष्ट्रिय सम्मेलनमा भाग लिन लण्डन आएका सर्वोच्च अदालतका न्यायाधीश डा आनन्दमोहन भट्टराई पनि कार्यक्रममा अतिथिको रुपमा उपस्थित थिए ।

प्रकाशित : आश्विन २५, २०७५ १७:२१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT