विमानस्थलको सफ्टवेयरमा बारम्बार समस्या, रेकर्ड नै नराखी यात्रुलाई प्रस्थान अनुमति

कान्तिपुर संवाददाता

काठमाडौँ — त्रिभुवन अन्तर्राष्ट्रिय विमानस्थलस्थित अध्यागमन कार्यालयको सफ्टवेयर बारम्बार बिग्रिएपछि अध्यागमन अधिकारीहरूले रेकर्ड नै नराखी यात्रुलाई प्रस्थान अनुमति दिएका छन् ।

त्रिभुवन विमानस्थल । तस्बिरः कान्तिपुर

गत सोमबार दिउँसो एक बजे करिब एक घन्टासम्म नेपालबाट विदेश जाने यात्रुको रेकर्ड राख्ने इमी सफ्टवेयरले काम गरेको थिएन।

Yamaha

यात्रुको लामो लाइनमा रहेका बेला अचानक पीआरएम अर्थात् पासपोर्ट रिडेबल मेसिनमार्फत इमी सफ्टवेयरमा डाटा इन्ट्री गर्ने काम बन्द भएको थियो। यात्रुको चाप र त्यही बेला सफ्टवेयरमा खराबी आएपछि अध्यागमन अधिकारीले सामान्य जाँच र पासपोर्ट पढेर प्रस्थान अनुमति दिएका थिए।

एक अध्यागमन अधिकृतका अनुसार सफ्टवेयर बारम्बार ह्याङ हुने समस्या नौलो होइन। उनका अनुसार हरेक साता कुनै न कुनै समय सफ्टवेयरले काम गर्न छाड्छ। प्राविधिक समस्याका कारण यस्तो बेला नेपालबाट विदेश जाने यात्रुको जानकारी राख्न नसकिने ती अधिकृतले बताए।

‘पाँच/छ वटा पासपोर्ट स्क्यान गर्ने बित्तिकै सफ्टवेयर ह्याङ भइहाल्छ’, उनले भने। सुरक्षाका हिसाबले संवेदनशील अध्यागमनमा देश छाडनेको विवरण अद्यावधिक नहुँदा सुरक्षा चुनौती बढन सक्छ। विमानस्थल सुरक्षामा खटिएका एक उच्च सुरक्षा अधिकारीका अनुसार सफ्टवेयरमा समस्या आएका बेला देशभित्रै कुनै अपराध गरेका वा शंकास्पद सूचीमा रहेकाहरू पनि खुसुक्क देश छाडने खतरा हुन्छ।

विमानस्थल अध्यागमनमा यात्रुको रेकर्ड राख्ने काममा समस्या उत्पन्न भएपनि सन् २०१४ अगस्टदेखि अध्यागमन विभागले इमी अर्थात इमिग्रेसन सफ्टवेयर प्रयोगमा ल्याइरहेको छ। तर प्रयोगमा आएको केही महिनादेखि नै सफ्टवेयरमा बारम्बार समस्या आउने गरेको विमानस्थलका अध्यागमनका अधिकृतहरू बताउँछन्।

विमानस्थल अध्यागमनका प्रमुख अधिकृत राजेश पौडेलसँग पनि सफ्टवेयरमा बारम्बार समस्या हुने गरेको अनुभव छ। पासपोर्टमा उल्लेखित डाटा खिच्ने, प्रस्थान र आगमनको समयसहितको रेकर्ड राख्ने सफ्टवेयरमै समस्या आएपछि अध्यागमनका डेस्क अधिकृतहरू समस्यामा पर्ने गरेका छन्।

प्रमुख अधिकृत पौडेलले भने,‘सफ्टवेयर बिग्रेका बेला के गर्ने? सेवा रोकौं क्षमतामा प्रश्न उठने, बिनाप्रविधिको सेवा दिँदा कर्मचारी आशंकाको घेरामा पर्ने सम्भावना हुने।’अधिकृत पौडेलले सफ्टवेयरको समस्याबारे अध्यागमन विभागमा बारम्बार कुरा राखे पनि समस्या समाधान नभएको सुनाए। उनले भने, ‘सफ्टवेयर बिग्रेका बेला अनधिकृत काम हुने खतरा सधैं रहने भयो तर के गर्ने उपाय छैन।’

प्रकाशित : आश्विन २५, २०७५ १९:०२
प्रतिक्रिया
पठाउनुहोस्
ADVERTISEMENT
ADVERTISEMENT

चार घण्टादेखि राजमार्ग अवरुद्ध, पानी खाना नपाएको यात्रुको गुनासो

नारायण शर्मा

काठमाडौँ — महेन्द्र राजमार्गअन्तर्गत नवलपरासीको दाउन्ने खण्ड चार घण्टादेखि अवरुद्ध भएको छ । दाउन्नेको घिउ खोलानजिक बिहीबार अपराह्न पराल बोकेको ट्रक पल्टिएपछि सडक जाम भएको हो ।

दसैंका लागि पूर्व–पश्चिम हिँडेका हजारौं यात्रु अलपत्र परेका छन्। घटनास्थलमा प्रहरी छैनन्। गाडी चालकहरुले आफूखुसी उछिन्न खोज्दा दोहोरो जाम परेको प्रहरीले जनाएको छ।

दाउन्ने पूर्वतर्फका गाडीको लाम अरुणखोलाको जंगलसम्म र पश्चिमतर्फ चिसापानीसम्मको सडक खण्डमा जाम छ। प्रहरीका अनुसार अरुणखोला र चिसापानीसम्मको दूरी करिब २० किलोमिटर छ। गाडी जाममा परेपछि यात्रुहरु जंगल क्षेत्रमा टहलिएर बसेका छन्। उनीहरुले पानीसमेत खाना नपाएको गुनासो गरिरहेका छन्।

जाम कतिखेर खुल्ने भन्ने एकीन छैन। जिल्ला ट्राफिक प्रहरी कार्यालयले भने पल्टिएको गाडी उठाउन होङ्सी सिमेन्टबाट क्रेन मगाइएको जनाएको छ।

प्रकाशित : आश्विन २५, २०७५ १८:२९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT