सुत्केरीलाई रातो भाले

रमेशचन्द्र अधिकारी

धनकुटा — पाख्रिबास नगरपालिकाले दुई महिनाअघि थालेको ‘वडाध्यक्षसँग कर्णधार’ कार्यक्रम प्रभावकारी बन्दै गएको छ । नगरभित्र जन्मिएका नाबालकको स्वास्थ्य जाँच, जन्म दर्ता तथा सुत्केरीको जाँच, पोषणयुक्त खानेकुरा वितरणका लागि कार्यक्रम थालिएको हो ।

धनकुटाको पाख्रिबास नगरपालिका २ का सुत्केरी महिलालाई शुक्रबार रातो भालेसहित पोषणयुक्त खानेकुरा वितरण गर्दै वडाध्यक्ष तथा कर्मचारी । तस्बिर : रमेश

नगर प्रमुख विर्षबहादुर राईका अनुसार १० वडा रहेको पाख्रिबासका प्रत्येक वडाध्यक्षले सुत्केरी महिलालाई घरैमा गएर भेट गर्दै आएका छन्। जसमध्ये पाख्रिबासका सबै वडामा हालसम्म ३६ सुत्केरीलाई वडाध्यक्षले भेट गरिसकेका छन्। स्वास्थ्यकर्मी, जन्मदर्ता गर्ने कर्मचारी, जनप्रतिनिधि, स्वयम्सेविका सहित सुत्केरीको घरमा जाने गरेको पाख्रिबास नगरपालिका-२ का वडा सचिव ठगेन्द्रप्रसाद अधिकारीले जानकारी दिए।

Yamaha

उक्त वडामा मात्र दुई महिनामा हालसम्म ९ जना सुत्केरी भएको उनले बताए। आमा र बच्चाको स्वास्थ्य परीक्षण सहित साथमा अनिवार्य रातो भाले पनि लगिने गरिएको उपप्रमुख देवकला तिम्सिनाले बताइन्। ‘यसक्रममा अधिकतम स्थानीय स्रोतसाधन प्रयोग गरिन्छ’, उनले भनिन्, ‘कुखुरा, दाल, घिउ लगायतका स्थानीय उत्पादनका वस्तु वितरण गरिन्छ।’

यसक्रममा स्वास्थ्यकर्मीले नाबालकको स्वास्थ्य जाँच र तौल लिने गरेका छन्। नाबालक र सुत्केरीको संरक्षण गर्ने उद्देश्यले थालिएको उक्त कार्य पछिल्लो समय प्रभावकारी बन्दै गएको तिम्सिनाको भनाइ छ। नवजात शिशु तथा सुत्केरीलाई कुपोषण तथा रक्तअल्पताको अवस्थाबाट मुक्त गर्न अभियान सार्थक हुने दावी गरिएको छ।

पछिल्लो समय आफ्ना टोलवस्तीमा सुत्केरी हुना साथ स्थानीयले जनप्रतिनिधिलाई तत्काल खबर गर्न थालेको वडा २ का अध्यक्ष तोर्णबहादुर खपाङ्गीले बताए। खबर पाउनासाथ जनप्रतिनिधि भने रातो भाले, पोषणयुक्त खानेकुरा र जन्म दर्ताका लागि सुत्केरीकै घरमा पुग्ने गरेको उनले बताए। बच्चालाई हुर्काउन आवश्यक आमाको दूधका लागि समेत पोसिलो खाना जरुरी रहेकाले नगरपालिकाले रातो भालेका साथमा अन्य पोषणयुक्त खानेकुरा वितरण गर्दै आएको छ।

.अस्पताल वा दक्ष स्वास्थ्यकर्मीमार्फत सुत्केरी गराउने चलन बिस्तारै बढदै गए पनि पोषणयुक्त खानेकुराको अभावमा सुत्केरी र नवजातको अवस्था दयनीय पाइएपछि जनप्रतिनिधिसँग कर्णधार कार्यक्रम थालिएको नगर प्रमुख राईले बताए। सुत्केरीका लागि नगरपालिकाले रातो भाले सहित ५ हजार रुपैयाँसम्मका सामग्री खरिद गर्दै आएको छ।

नगरपालिकाले वार्षिक ६ सय सुत्केरी हुन सक्ने अनुमान गरेर बजेट विनियोजन गरेको छ। स्वास्थ्य संस्थामा सुत्केरी गराउने र बढिमा दुई सन्तान भएकालाई यो अभियानमा प्राथमिकतामा राखेको प्रमुख राईले बताए। परिवार नियोजनप्रति चासो जाने र स्वास्थ्य संस्थामा सुत्केरी गराउन् भन्ने उद्देश्यले यसो गरिएको उनको तर्क छ। तर दुईभन्दा बढी सन्तान हुनेलाई पनि वञ्चित नगरिने उनले बताए।

प्रकाशित : आश्विन २६, २०७५ १८:३३
प्रतिक्रिया
पठाउनुहोस्
ADVERTISEMENT

चुनावको लफडा सकियो अब ध्यान विकासतर्फ : दाहाल

कान्तिपुर संवाददाता

काठमाडौँ — नेकपाका अध्यक्ष पुष्पकमल दाहालले अब पार्टीका नेता बामदेव गौतम चुनाव उठ्ने विषय समाप्त भएको बताएका छन् । ‘बामदेवजी नै लड्दिनँ भन्नुभयो अब यो विषयको लफडा सकियो,’ शुक्रबार राजधानीको आलापोटमा आयोजित कार्यक्रममा अध्यक्ष दाहालले भने, ‘अब हामी मुलुकको विकासकै लागि सक्रिय हुने हो ।’ 

गौतमलाई सांसद बनाएर प्रतिनिधिसभामा लैजान मुख्य जोडबल गर्ने अध्यक्ष दाहाल पनि हुन् । चुनावका लागि सिट खाली गराउने लगायतमा भूमिका खेल्ने अध्यक्ष दाहालले सर्वत्र विरोधपछि गौतम आफै पछि हटेकाले यो विषय अब सकिएको उल्लेख गरे । गत सोमबारको पार्टी सचिवालय बैठकमा काठमाडौं ७ का सांसद रामवीर मानन्धरले राजीनामा दिने र गौतम उपचुनावका लागि त्यहाँबाट उठ्ने योजना दाहालले अघि सारेका थिए ।
त्यही योजनाअनुसार सांसदबाट राजीनामाका लागि मानन्धरको स्वीकृति पत्र सचिवालयमा पेस भएको थियो । तर, उक्त विषय बाहिर आउनेवित्तिकै पार्टीभित्र र बाहिर तीव्र आलोचना भयो । गौतम आफैंले नेताहरुसँगको छलफलबाट अब चुनावमा नउठ्ने मनस्थिति बनाए । त्यसपछि शुक्रबार गौतमको विषयमा अध्यक्ष दाहालले सार्वजनिक मञ्चबाट थप स्पष्टीकरण दिएका हुन् ।

‘जहाँसम्म चर्चा चल्यो रामवीरको राजीनामा, बामदेव चुनाव लड्ने, केके हो केके यसमा तपाईहरु टेन्सन नलिनुस् । पार्टी छ, पार्टीले निर्णय गर्छ । अब अहिले त्यो लफडातिर हामी लाग्दैनौं,’ अध्यक्ष दाहालले भने, ‘बामदेवजीले म लड्लिनँ भन्नुभयो कुरा सक्कियो ।’

अध्यक्ष दाहालले सरकारका कामकारबाहीको बचाउ पनि गरेका छन् । शुक्रबारै पाटनमा भएको अर्को कार्यक्रममा दाहालले सरकारले हालसम्म गरेको उपलब्धिहरुको प्रशंसा गरे । उनले यो सरकारले नै विकास र समृद्धि ल्याउने भएकाले भरोसा गर्न आग्रह गरे । अस्थिरताको अन्त्यका लागि आफूहरुले पार्टी एकता गरेको उल्लेख गर्दै दाहालले अब विकास सुशासन दिने दाबी गरे । ‘यदि हामीले त्यसो गर्न सकेनौं भने, बहुमतको सरकार, पार्टी एकता, हिजो दुई पार्टी नभए अर्कोले गर्छ भन्ने हुन्थ्यो भने अब त्यो अवस्था रहँदैन,’ दाहालले भने, ‘देशभर जनताको ठूलो भरोसा र विश्वास छ ।’

सरकारका पछिल्ला कामकारबाहीप्रति भइरहेका टीकाटिप्पणीमाथि पनि अध्यक्ष दाहालले अब समीक्षा गरेर अघि बढ्ने प्रतिबद्धता जनाए । सात महिनाको समयमा सरकारले चीन र भारतसँगको सम्बन्ध सुधार उलेख्य सम्झौता गरेको दाहालको भनाइ थियो । उनले दैनिक जीवनसँग जोडिनेको जनताका समस्यामा विशेष ख्याल गर्दै अघि बढने प्रतिबद्धता पनि जनाए ।

प्रकाशित : आश्विन २६, २०७५ १७:५५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT