प्रयोगमा आएन टेलिमेडिसिन सेवा

अस्पतालका अनुसार बाढीपछि उपकरणमा खराबी आउँदा प्रयोगविहीन बनेको हो ।

२०७० असारमा महाकालीमा आएको बाढीले टेलिमेडिसिन राखेको कोठा जलमग्न बनेको थियो । त्यस बेलादेखि बन्द रहेको कोठा अझै बन्द छ । जिल्लामा तालिमप्राप्त चिकित्सक नभएको र पूर्वाधार नबनेसम्म सञ्चालन गर्न नसकिने अस्पतालले जनाएको छ । तर, टेलिमेडिसिनको डिभाइसबाट गरिने सेवाहरू नयाँ प्रविधिबाट बिरामीलाई दिइरहेको अस्पतालका निमित्त प्रमुख शिवराज सुनारले बताए । ‘टेलिमेडिसिन प्रविधिबाट गरिने काम फेसबुक लाइभ, भाइबर, स्काइपबाट उपलब्ध गराइरहेका छौं,’ उनले भने, ‘टेलिमेडिसिन पुन: सञ्चालनका लागि आपूर्ति महाशाखालाई अनुरोध गरिएको छ ।’

सुनारका अनुसार जिल्लामा अहिले एक विशेषज्ञ डाक्टरसहित ५ दक्ष जनशक्ति छ । केही उपकरण २/३ पटक यताउता सार्दा काम नलाग्ने बनेका छन् ।

बाढीका बेला हतारमा उपकरणहरू सार्दा केही बिग्रिए भने केही बाढीले बगाएको अस्पतालको भनाइ छ । स्वास्थ्य विभागले दुर्गम जिल्लामा विशेषज्ञ डाक्टरबाट चिकित्सक र बिरामीलाई परामर्श दिन ०६८/६९ मा यो सेवा सञ्चालन गरेको थियो । बन्द भएको ४ वर्ष पुग्दा पनि सेवा अझै अलपत्र छ ।