पाँच दिनको अस्पताल बसाइपछि प्रधानमन्त्री निवास फर्के
काठमाडौँ — प्रधानमन्त्री केपी ओली पाँच दिन अस्पताल बसाइपछि शुक्रबार राति निवास फर्केका छन् । उनी शुक्रबार साँझ ७ बजेर ३५ मिनेटमा अस्पतालबाट डिस्चार्ज भएका हुन् ।
प्रधानमन्त्रीलाई गत सोमबार राति फोक्सोको संक्रमणले गर्दा सास फेर्न असजिलो भएपछि मनमोहन कार्डियोथारासिक भास्कुलर तथा ट्रान्सप्लान्ट सेन्टरमा भर्ना भएका थिए । उनलाई सोमबार बिहान ४ बजेर ३० मिनेटमा सेन्टरको कोरोनरी केयर युनिट (सीसीयु) भित्र रहेको विशेष क्याविनमा भर्ना गरिएको थियो ।
‘प्रधानमन्त्रीज्यु स्वास्थ्यलाभ गरेर शुक्रबार राति डिस्चार्ज हुनु भयो’, सेन्टरका कार्यकारी निर्देशक प्रा.डा.उत्तम कृष्ण श्रेष्ठले भने–‘उहाँको परीक्षण प्रतिवेदनहरु सामान्य छ ।’ चिकित्सकहरुका अनुसार प्रधानमन्त्री आइतबार वा सोमबारदेखि आफ्नो नियमित काममा फर्किनेछन् ।
६७ वर्षीय प्रधानमन्त्रीको सन् २००७ मा दिल्लीस्थित इन्द्रप्रस्थ अपोलो अस्पतालमा मृगौला प्रत्यारोपण भएको थियो ।
प्रकाशित : कार्तिक १६, २०७५ १८:१३