समृद्धिको नयाँ यात्रातिर जानुपर्छ : दाहाल

नेपाली कांग्रेसले शुक्रबार पार्टी कार्यालय सानेपामा गरेको शुभकामना आदानप्रदान तथा चियापान कार्यक्रममा सम्बोधन गर्दै दाहालले राजनीतिक दल, बुद्धिजीवी र नागरिकहरुका बीचमा एकता नभईकन राजनीतिक स्थिरता र विकास जनताको भावना र आवश्यकता परिपूर्ति नहुने बताए । दाहालले मिलेरै शान्ति प्रक्रियालाई एउटा टुंगोमा पुर्‍याउने, संघीय लोकतान्त्रिक गणतन्त्रको संविधान बनाउने, निर्वाचन सम्पन्न गरेको भन्दै जनताको चाहनाअनुसार विकास र समृद्धिको नयाँ यात्रातिर जानुपर्नेमा जोड दिए । उनले राष्ट्रिय एकताका आधारमा मात्रै देशमा ठूल्ठूला राजनीतिक परिवर्तन भएको उल्लेख गरे ।

विश्वेश्वरप्रसाद कोइरालाको राष्ट्रिय एकता र मेलमिलापको नीतिको सन्दर्भ स्मरण गर्दै अध्यक्ष दाहालले सात दलको तर्फबाट गिरिजाप्रसाद कोइराला र तत्कालीन नेकपा (माओवादी)का तर्फबाट आफूले हस्ताक्षर गर्दा पनि राष्ट्रिय एकताकै आधार मानिएको बताए । तर, परिवर्तन अझै राम्रोसँग संस्थागत भइनसकेको दाहालको भनाइ थियो ।