दिक्तेल आगलागीमा तीन करोडबराबरको क्षति, पीडितलाई राहत [अपडेट]

डम्बरसिंह राई

दिक्तेल (खोटाङ) — खोटाङको दिक्तेलमा शुक्रबार बिहान आगलागीमा झण्डै तीन करोड क्षति भएको प्रहरीले जनाएको छ । बिहान करिब साढे तीन बजेबाट सुरु भएको आगोले दिक्तेल बजारको रत्नपार्कस्थित अम्बिका बुढाथोकी र कृष्ण श्रेष्ठको घर पूर्ण रुपमा क्षति पुगेको थियो । आगलागीबाट करिब  दुई करोड ९० लाख ९२ हजा बराबरको क्षति भएको अनुमान गरिएको हो ।

प्रहरीका अनुसार अम्बिका बुढाथोकीको एक करोड २५ लाख, कृष्णकुमार श्रेष्ठको एक करोड २४ लाख, अम्बिका बुढाथोकीको घरमा होटल तथा कपडा पसल सञ्चालन गर्ने रमेश खत्रीको ३५ लाख ३० हजार र डेरामै बस्ने अब्दुल अहिम रायमको ६२ लाख बराबरको क्षति भएको प्रहरीले जनाएको छ । आगो नियन्त्रणका क्रममा भत्काइएका राजु श्रेष्ठको तीन लाख र नवीन गुरुङको तीन लाख बराबरको क्षति भएको प्रहरी नायव उपरीक्षक राजकुमार केसीले बताए ।

Yamaha

नेपाल प्रहरी, सशस्त्र, सेना तथा स्थानीयले आगो निकाएका थिए । दिक्तेल रुपाकोट मझुवागढी नगरपालिकाको दमकल सञ्चालन नहुदा स्थानीय आक्रोशित बनेका छन् । दिक्तेल रुपाकोट मझुवागढी नगरपालिकाका प्रमुख दीपनारायण रिजालले भने दमकल चालक दिक्तेलमा नभएकाले अग्नि नियन्त्रणमा प्रयोग हुन नसकेको बताए । आगलागीको कारण अझै खुल्न नसकेको प्रमुख जिल्ला अधिकारी सुरेन्द्रराज पौडेलले बताए ।

पीडितलाई राहत
आगलागी पीडित कृष्णकुमार श्रेष्ठ र अम्बिका बुढाथोकीलाई दिक्तेल रुपाकोट मझुवागढी नगरपालिकाले ५०/५० हजार राहत दिएको छ । जिल्ला विपद् उद्धार तथा व्यवस्थापन समितिले आगलागी पीडितद्वयलाई १५/१५ हजार नगद प्रदान गरेको छ । त्यस्तै दिक्तेल रुपाकोट मझुवागढी नगरपालिका वडा नं–१ ले दस/दस हजार र खोटाङ उद्योग वाणिज्य संघले पनि दस/दस हजार नगद उपलब्ध गराएको छ ।

रेडक्रसले भाँडाकुँडा, पाल, कम्बल लगायतका लत्ता कपडा उपलब्ध गराएको छ । दिक्तेल बजार सामाजिक गुढीले अग्नि पीडित कृष्णकुमार श्रेष्ठलाई २५ हजार नगद उपलब्ध गराएको छ ।

‍..............................................

खोटाङको दिक्तेलमा शुक्रबार बिहान आगलागी भएको छ । करिब साढे तीन बजेबाट सुरु भएको आगोले दिक्तेल बजारको रत्नपार्कस्थित अम्बिका बुढाथोकी र कृष्ण श्रेष्ठको घर नष्ट भएको छ ।

आगो नियन्त्रण गर्ने क्रममा अन्य तीन घर भत्काइएको छ। आगो नियन्त्रणका लागि नवीन गुरुङ, रविध्वज राई र राजु श्रेष्ठको घर भत्काइएको छ।

आगो पूर्णरुपमा नियन्त्रणमा आइसकेको छ। आगो नियन्त्रणमा लिन प्रहरी, सशस्त्र, सेना तथा स्थानीय खटिएका थिए। आगलागीबाट भएको क्षति विवरण आइनसकेको प्रहरी नायब उपरीक्षक राजकुमार केसीले बताए।

नगरपालिकाको दमकल नहुँदा आगो नियन्त्रणमा ढिलाई भएको थियो। दिक्तेल रुपाकोट नगरपालिकाको दमकल भने थन्किएरको छ।

प्रकाशित : कार्तिक २३, २०७५ ०८:०२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

नेपालीमुलका अमेरिकी सांसद ह्यारीको गाउँमा खुसीयाली

अगन्धर तिवारी

पर्वत — अमेरिकी सांसद बन्ने पहिलो नेपालीमूलका नागरिक हिरबहादुर भण्डारी (ह्यारी) एक साहित्यिक कार्यक्रममा भाग लिन १३ वर्षअघि अमेरिका प्रवेश गरेका थिए । पर्वतको फलेवास नगरपालिका २ (साविकको) थापाठाना ९ खनारका हिरबहादुर उतिबेला अमेरिका प्रवेश गर्ने गाउँका बिरलैमध्येका एक हुन् ।

पर्वतको फलेवास नगरपालिका थापाठानाको खनारस्थित हिरबहादुर भण्डारीको गाउँ र उनी जन्मिएको सुनसान घर । तस्बिर : कान्तिपुर ।

२००५ अर्थात् २०६२ कात्तिक १४ गते उनी लक्ष्मीपूजाको दिन नेपालबाट अमेरिका प्रवेश गरेको उनका माइला भाइ कोसिस भण्डारीले बताए ।

हिरबहादुर ३ भाइमध्येका जेठा हुन् । ‘२०६२ सालको कात्तिक १४ गते लक्ष्मीपूजाको साँझ दाइले म अमेरिका आइपुगें भनेर खबर गर्नुभएको थियो,’ काठमाडौं बस्दैआएका कोसिसले कान्तिपुरसित भने, ‘संयोगले लक्ष्मीपूजाकै दिनमा दाइले चुनाव जितेको खबर आयो ।’ नेपाली समय अनुसार बुधबार बिहान उनले चुनाव जितेको खबर काठमाडौंमा भएका भाइले जानकारी पाएका थिए । २००५ मा एक साहित्यिक कार्यक्रमको सिलसिलामा अमेरिका प्रवेश गरेका उनी त्यहाँ पुगेको १३ वर्षमै नेपालीमुलका आप्रवासीमध्येबाट पहिलो सांसद् बने ।

मंगलबारको निर्वाचनमा भण्डारी मेरिल्याण्ड राज्यको ड्रिस्ट्रिक ८ बाट निर्वाचित हुन सफल भए । अमेरिकी मुलधारको राजनीतिमा प्रत्यक्ष निर्वाचनबाट चुनिने भण्डारी,पहिलो नेपालीमुलका अमेरिकी बन्न सफल भएका छन् । मेरिल्याण्ड राज्यमा रहेका ४७ ड्रिस्ट्रिकबाट हाउस अफ डेलिगेटमा एक सय ४१ जनाले प्रतिनिधित्व गर्दछन् । त्यसमध्ये उनी पहिलो नेपाली बनेका हुन् ।
गत जुनमा भण्डारीले मेरिल्याण्ड हाउस अफ डेलिगेट्स ड्रिस्ट्रिक ८ को प्रारम्भिक चुनावमा जितेपछि फाइनल चुनावमा भाग लिएका थिए । मंगलबारको अन्तिम प्रतिस्पर्धामा भण्डारी दोस्रो स्थान हात पार्दै हाउस डेलिगेटमा चुनिएका हुन् । सन् २०१४ मा पनि पहिलोपटक निर्वाचनमा भाग लिएका भण्डारी त्यतिबेला पराजित भएका थिए ।

गाउँभर खुसीयाली

उनको वास्तविक नाम हिरबहादुर भण्डारी भए पनि गाउँमा उनका दवाली र सहपाठीले हिरे भनेर बोलाउँथे । पर्वतको साविक थापाठाना गाविस ९ (हालको फलेवास नगरपालिका २) खनारमा २०३५ मा जन्मिएका हिरबहादुर भण्डारी (ह्यारी) अमेरिकाको सांसद् बनेका छन् । फलेबास नगरपालिका २ थापाठानास्थित खनारका ४१ वर्षीय हिरे भण्डारी सानैदेखि पढ्नमा अब्बल थिए । स्थानीय भूमे निमाबिमा जहिल्यै स्कुल फस्ट हुने गरेका उनले २००१ अर्थात् २०५८ मा कास्कीस्थित पृथ्वीनारायण क्याम्पसबाट अंग्रेजी साहित्यमा स्नातकोत्तर गरेका थिए । स्नातकोत्तरपछि केही समय उनले छिमेकी गाउँ शंकरपोखरीस्थित त्रिभुवन मावि, काठमाडौंको डनबस्को एकेडेमीलगायतका विद्यालयमा अध्यापन गरेको उनका भाइ कोसिस भण्डारीले बताए । ‘दाइको क्षमताको मूल्याङ्कन गरेरै उतिबेला (२००५) मा अमेरिकामा बस्ने एकजना दाइले किताब बिमोचनमा बोलाउनुभएर जानुभएको हो,’ कोसिसले भने, ‘अहिले यहाँसम्म पुग्नुहोला भन्ने त कसैले सोचेकै थिएनौं ।’

अमेरिका पुगेको ५ वर्षपछि त्यहींको नागरिकता लिएका हिरबहादुरको अमेरिकी टोन (लवज) मा बोलाउन सजिलोका लागि ह्यारी नाम राखेको परिवार बताउँछ । ह्यारी हाल अमेरिकाकै विश्वविद्यालय र स्कुलहरुमा स्थायी शिक्षकका रुपमा अध्यापन गर्छन् । उनीसँगै बाबु अम्मरबहादुर भण्डारी, आमा शान्तिकुमारी भण्डारी, श्रीमती र छोराछोरी अमेरिकामै बस्छन् । ह्यारी ३ भाइमध्येका जेठा हुन् । उनका माइला भाइ कोसिस काठमाडौंस्थित एक गैरसरकारी संस्थामा कार्यरत छन् । कान्छाभाइ अमेरिकामै छन् ।

उनको बिजयसंगै गाउँमा खुशीयाली छाएको छ । ‘मेरो सहपाठी यो स्थानमा पुग्ला भन्ने लागेकै थिएन,’ कक्षा १ देखि १० सम्म सँगै अध्ययन गरेका राजेन्द्र क्षेत्रीले भने, ‘मलाई निकै खुशी लागेको छ ।’ स्थानीय भूमे आधारभूत विद्यालय र त्रिभूवन माविका पूर्व विद्यार्थी रहेका भण्डारी अमेरिकाका हाउस अफ डेलिगेटमा निर्वाचित भएकोमा थापाठाना र शंकरपोखरीका बासिन्दा र गुरुहरु पनि औधी खुशी छन् । ‘आंफैले पढाएको र यही विद्यालयमा शिक्षकसमेत रहेको एक बिद्यार्थीले इतिहांस रच्दा खुशीको सिमै छैन,’ त्रिभूवन माविका प्रअ टेकनारायण अधिकारीले भने, ‘दुर्गम गाउँको छोराले अहिले अमेरिकामा नेपाल चिनाउनु चानचुने कुरा होइन ।’

थापाठानाका बलबहादुर थापाले सानो छंदा संगै खेलेका साथी अमेरिकाको सांसद बनेको खबरले खुशीको सिमा नरहेको बताए । ‘संगै डण्ढीबियो खेल्दा हिरे त हिरै हो नि भनेर जिस्क्याउंथ्यौं,’ उनले भने, ‘अहिले साँच्चिकै हिरो बनेको खबरले हर्षित छु ।’ सामान्य किसान परिवारमा जन्मिएका भण्डारी सानैदेखि राजनीतिमा रुची राख्ने छिमेकी स्मरण गर्छन् ।

यो पनि पढ्नुहोस्

प्रकाशित : कार्तिक २२, २०७५ २१:५५
पूरा पढ्नुहोस्
ADVERTISEMENT
प्रतिक्रिया
पठाउनुहोस्