विश्व महिला सांसद सम्मेलनमा उपसभामुखद्वारा सम्बोधन

महिलाहरुलाई पनि मताधिकार प्रदान गरिएको १ सय वर्ष पुगेको सन्दर्भमा लन्डनमा भएको सम्मेलनमा उपसभामुख डा तुम्बाहाम्फेले बालिका शिक्षाबारे प्रवचन दिएकी छन् ।

उनले कम विकसित मुलुकहरुमा सामाजिक साँस्कृतिक प्रचलन, धार्मिक विश्वास, शिक्षाको उपयोगिताप्रतिको अज्ञानता, लैंगिक विभेद र विद्यालयमा कमजोर भौतिक सुविधा बालिका शिक्षाका अवरोधहरु रहेको उल्लेख गरिन् ।

उपसभामुख तुम्बाहाम्फेले नेपालमा बालिका शिक्षालाई प्रवर्द्धन गर्न संवैधानिक र नीतिगत व्यवस्थाहरु मिलाइएको उल्लेख गरिन् । अनिवार्य र निःशुल्क शिक्षालाई मौलिक हकमा नै राखिएको बताउँदै उनले यसले विद्यालय जानबाट रोकिएका कयौं बालबालिकाले शिक्षाको उज्यालो पाएको बताइन् ।

सबै तहका जनप्रतिनिधिहरुले कम्तिमा एकजना गरिब, पिछडिएको, दलित र बाहिष्करणमा परेका बालबालिकालाई आधारभूत तहसम्म शिक्षाको दायित्व बहन गर्ने अभियानले धेरै बालबालिका विद्यालयसम्म पुगेको उपसभामुखको भनाइ थियो ।

उनले महिला सांसदहरुको विश्व सम्मेलनले पनि विश्वभरका बालिकाहरुको शिक्षाका अवरोधकको निर्क्यौल गर्दै साझा धारणा ल्याउनुपर्नेमा जोड दिएकी छन् ।