पौडेल र सिटौला पक्षको असहमतिबीच नेविसंघको कार्यकाल थपियो, माघ २ भित्र अधिवेशन गराइसक्नुपर्ने

कुलचन्द्र न्यौपाने

काठमाडौँ — कांग्रेस केन्द्रीय कार्यसमितिको बहुमतबाट नेविसंघको कार्यकाल दुई महिना बढाउने निर्णय गरेको छ । पार्टी कार्यालय सानेपामा बसेको बैठकमा नेविसंघ अधिवेशनका लागि समय थप्ने कि विघटन गरेर तदर्थ समिति बनाउने भन्ने विवाद नेताहरुबीच कायम रहेपछि बहुमतबाट निर्णय लिइएको हो । 

वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौला पक्षले असहमति जनाएका कारण निर्णयमा सर्वसम्मत भएन । संघको वर्तमान कार्यसमितिको कार्यकाल आइतबारदेखि नै सकिँदै थियो । आइतबार समय नबढाएको भए वर्तमान कार्यसमिति विधानत: स्वत: विघटन हुने अवस्था थियो । सहमतिबाटै निर्णय लिन शनिबार बैठक रोकिएको थियो । सर्वसम्मत निर्णयका लागि आइतबार पनि दिनभर प्रयास भए । नमिलेपछि दुई बजे बोलाइएको बैठक ६ बजेमात्रै बसेको थियो ।

पौडेल पक्षले वर्तमान संघको नेतृत्वबाट अधिवेशन हुन नसक्ने भन्दै तदर्थ समिति गठन गर्न माग गरेका थिए । तर, पूर्वमहामन्त्री सिटौलाले भने अधिवेशनका लागि दुई महिनाको समय नपुग्ने भन्दै न्यूनतम ६ महिनाको समय थप्नुपर्ने अडान राखे । विद्यार्थी मुद्दामा संस्थापनइतर पक्षीय नेताहरु समेत आपसमा विभाजित भएका थिए ।

संघका अध्यक्ष नैनसिंह महर र महामन्त्री कुन्दन काफ्लेलगायत वर्तमान पदाधिकारीहरुले पार्टी नेतृत्वलाई अधिवेशन गराउन दुई महिनामा नसकिने भन्दै ६ महिनाकै समय दिन आग्रह गरेका थिए । तर, सभापति देउवा दुई महिनाभन्दा बढी समय थप्न तयार देखिएनन् ।

कांग्रेस केन्द्रीय सदस्य अर्जुननरसिंह केसीले महासमिति बैठक छल्नका लागि मात्रै दुई महिनाको समय थप्ने काम नेतृत्वबाट भएको बताए । ‘एक महिनापछि हुने महासमिति बैठकमा आलोचना खेप्नुपर्ने डरले मात्रै दुई महिनाको समय बढाइएको हो । अधिवेशन गराउनका लागि होइन’ केसीले भने, ‘महासमिति छलेपछि आफूखुसी तदर्थ समिति बनाउने रणनीतिक योजनाअन्तर्गत यो निर्णय भएको हो । यसमा हाम्रो सहमति छैन ।’

बैठकमा उनले मध्यमार्गी प्रस्ताव पनि राखेका थिए । अधिवेशन गराउने सुनिश्चित आधारसहित ६ महिना थप्ने नभए विघटन गरेर विकल्पमा तदर्थ समिति बनाउने । संघको महाधिवेशन गराउने सुनिश्चित आधारका लागि प्रजातान्त्रिक कानुन व्यवसायी संघ, प्रजातान्त्रिक प्राध्यापक र शिक्षक संघको प्रतिनिधित्वसहितको समिति बनाएर अधिवेशनका लागि त्यसैलाई जिम्मा दिने प्रस्ताव थियो ।

बैठकमा वरिष्ठ नेता पौडेलले जति समय दिए पनि वर्तमान नेतृत्वबाट महाधिवेशन हुन नसक्ने भन्दै सहमतिबाट तदर्थ समिति बनाउन बारम्बार प्रस्ताव गरेका थिए । स्रोतका अनुसार उनले विद्यार्थी नेता मनोजमणि आचार्यलाई अध्यक्ष तोकेर सानो आकारको समिति बनाउने र त्यसैले अधिवेशन गराउन प्रस्ताव गरेका थिए । तर, त्यसलाई संस्थापन पक्षले स्वीकार नगरेपछि सिटौला, केन्द्रीय सदस्य रामशरण महत, केन्द्रीय सदस्य केसी, केन्द्रीय सदस्य गगन थापालगायतले अधिवेशनका लागि न्यूनतम ६ महिना आवश्यक रहेको भन्दै त्यति समय दिन आग्रह गरेका थिए ।

‘अधिवेशन गराउने नेविसंघले हो, कांग्रेसले होइन’ बैठकमा थापाको भनाइ थियो, ‘बास्तविक धरातल नेविसंघका पदाधिकारीहरुलाई नै थाहा हुन्छ । संघका पदाधिकारीहरुले अधिवेशनका लागि ६ महिनाको समय मागीरहेका बेला २ महिना थप्नुको कुनै औचित्व छैन ।’

विधानत: संघको कार्यकाल दुई वर्षको हो । दुई वर्षको कार्यकाल भने भदौ २ मै सकिएको हो । अधिवेशन गराउन ३ महिना थप्न सकिने विधानको प्रावधानअनुरुप मंसिर २ गतेसम्मका लागि यसअघि नै केन्द्रीय कार्यसमितिले समय बढाएको थियो । विधानको ३ महिना थप्न सकिने प्रावधानलाई बैठकले संशोधन गरी ५ महिना पुर्‍याएको छ । तीन महिना यसअघि नै बितिसकेका कारण अब संघले माघ २ भित्र अधिवेशन गराइसक्नु पर्ने छ । अन्यथा स्वत: विघटन हुनेछ ।

‘भदौ २३ गते दिएको विधान आइतबार बल्ल पारित भयो भने दुई महिनामा अधिवेशन हुन्छ भनेर कल्पना पनि गर्न सकिन्न’ केन्द्रीय सदस्य प्रदीप पौडेलले भने,‘अधिवेशन जसले गर्ने हो उसैले ६ महिनायता संभव छैन भन्दै आएको छ । तर, पार्टी नेतृत्वले धरातल नबुझीकनै दुई महिनाको समय थपेर पार्टीमा विवादको दूरी झनै बढाउने काम गरेको छ ।’

यो पनि पढ्नुहोस्

नेविसंघले कांग्रेसमा विवाद

गुटबन्दीले धकेलिँदै नेविसंघ महाधिवेशन

‘नेविसंघ नेतृत्व अक्षम’



प्रकाशित : मंसिर २, २०७५ २१:३६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

खसोग्गी हत्या प्रकरण : ‘सीआइए रिपोर्ट अपरिपक्व’

एएफपी

वासिङटन/क्यालिफोर्निया — अमेरिकी राष्ट्रपति डोनाल्ड ट्रम्पले साउदी पत्रकार जमाल खसोग्गी हत्याबारे गुप्तचर संस्था सीआईएको रिपोर्ट ‘निकै अपरिपक्व’ भएको प्रतिक्रिया दिएका छन् ।

पत्रकार जमाल खसोग्गीको टर्कीस्थित साउदी कन्सुलेट कार्यालयमा गरिएको हत्याको विरोधमा बेलायतको लन्डनस्थित साउदी दूतावासअगाडि गरिएको विरोध प्रदर्शन । तस्बिर : रोयटर्स

अमेरिकी गुप्तचर संस्था सीआईएले शनिबार खसोग्गी हत्या साउदी युवराज मोहम्मद बिन सलमानको निर्देशन बमोजिम भएको उल्लेख गरेको थियो । ट्रम्पले उक्त घटनाबारे मंगलबारसम्म पूर्ण रिपोर्ट सार्वजनिक भइसक्ने जनाए ।

आगलागीले ध्वस्त क्यालिफोर्निया राज्यको प्याराडाइज सहरको भ्रमणका क्रममा ट्रम्पले अमेरिकी सरकारले मंगलबार खसोग्गी हत्यामा को संलग्न छ भन्ने प्रस्ट पार्ने दाबी गरे । यद्यपि उनले सीआईए रिपोर्टअनुसार हत्यामा ‘सलमान जिम्मेवार रहेको पनि हुनसक्ने’ जनाए ।

यसअघि अमेरिकी विदेश मन्त्रालयले खसोग्गी हत्याबारे निष्कर्षमा पुग्ने कार्य गरिरहेको जनाएको थियो । मन्त्रलायका प्रवक्ता हिथर नुएर्टद्वारा जारी विज्ञप्तिमा उल्लेख छ, ‘खसोग्गी हत्याबारे अझै केही प्रश्न अनुत्तरित छन् ।’

अमेरिकी सञ्चारमाध्यमले शनिबार सीआईएले घटनासँग निकट व्यक्तिहरूले दिएको जानकारीअनुसार आफूहरू घटनामा सलमानको संलग्नता रहेको निक्र्योलमा पुगेको जनाएको समाचार प्रकाशन गरेका थिए । सीआईए अधिकारीले यसबारे थप तथ्यहरूको अध्ययन गरिरहेको समेत जनाइएको थियो ।

अमेरिकी समाचार संस्था वासिङटन पोस्टले सीआईएलाई उद्धृत गर्दै खसोग्गीको हत्या गर्न १५ जना साउदी एजेन्टहरू टर्कीको इस्तानबुलस्थित कन्सुलेट कार्यालय पुगेको जनाएको थियो ।

पोस्टले उक्त रिपोर्ट आंशिक रूपमा मोहम्मद बिन सलमानका भाइ राजकुमार खालिद बिन सलमानले गरेको टेलिफोनमा आधारित भएको जनाएको थियो ।

तर साउदीले सीआईएको दाबी पूर्ण रूपमा गलत रहेको प्रतिक्रिया दिएको छ । उसले ‘खसोग्गी हत्यासम्बन्धी योजनाबारे युवराज सलमानलाई केही थाहा नभएको’ दाबी गरेको छ ।

खसोग्गीको गत अक्टुबर २ मा टर्कीस्थित साउदीको कन्सुलेट कार्यालयमा हत्या गरिएको थियो । हत्यापछि प्रमाण नष्ट गर्न उनको शव एसिडमा घोलिएको टर्कीका अधिकारीको दाबी छ । खसोग्गी युवराज सलमानका कतिपय नीतिका कट्टर आलोचक थिए । टर्कीका राष्ट्रपति रेसेप तैयप इर्दोगानले उनको हत्यामा साउदी अरबको उच्च तहको संलग्नता रहेको दाबी गर्दै आएका छन् ।

प्रकाशित : मंसिर २, २०७५ २१:२२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT