निर्मला हत्या प्रकरण : धर्नामा विभिन्न निकायको ऐक्यबद्धता
कञ्चनपुर — निर्मला पन्तका बुबा यज्ञराज र आमा दुर्गादेवीले न्याय माग्दै सुरु गरेको अनिश्चितकालीन धर्ना लाई नयाँ शक्ति पार्टीले ऐक्यबद्धता जनाएको छ ।
प्रदेश इन्चार्ज कृष्णकुमार चौधरीको संयोजकत्मा आइतबार महेन्द्रनगरमा बसेको बैठकले न्यायका लागि धर्ना बसेका पीडित परिवारले थालेको धर्नामा ऐक्यबद्धता जनाउनुका साथै सरकार समक्ष तत्काल अपराधी सार्वजनिक गर्न माग गरेको छ । ‘निर्मला घटना अनुसन्धानमा सुरुदेखि नै नाटक मञ्चन भइरहेको छ,’ पूर्वसभासदसमेत रहेका चौधरीले भने, ‘नक्कली बलात्कारीदेखि डीएनएसम्म सबै नाटक नै हो ।’
उनले सुरुदेखि नै घटना अनुसन्धानमा लापरबाही गरेको र अहिले पनि सरकारले गम्भीर रूपमा नलिएको भन्दै अपत्ति जनाए । बैठकपछि प्रदेश इन्चार्जसहति ९२ सदस्य धर्नास्थल पुगेरै ऐक्यबद्धता जनाएका थिए । ‘अपराधी सार्वजनिक नभए नयाँ शक्ति जुनसुकै आन्दोलन गर्न तयार छ,’ उनले भने ।
हत्यारा सार्वजनिक गरिनुपर्ने माग गर्दै निर्मलाका आमाबुबा गत आइतबारदेखि अनिश्चितकालीन धर्नामा बसेका हुन् । धर्नामा बसेका यज्ञराज र दुर्गादेवीको स्वास्थ्य बिग्रँदै गएको छ । साढे ३ महिनाअघि बलात्कारपछि हत्या गरिएकी निर्मला घटनाको अनुसन्धान अहिले पनि सही तवरले हुन नसकेको पीडित परिवारको गुनासो छ ।
प्रहरीले भने तीव्र गतिमा अनुसन्धान भइरहेको जनाएको छ । शंकास्पद व्यक्तिलाई निगरानीमा राख्नुका साथै विभिन्न चरणबाट अनुसन्धान भइरहेको डीएसपी कृष्णराज ओझाले बताए ।
प्रकाशित : मंसिर ३, २०७५ ०८:५७