सुनसरी — नक्कली आमा, बाबु, दाजु र दिदी बहिनी बनेर वंशजको नागरिकता दिलाउने र नागरिकताको सिफारिस गर्ने वडासदस्यलाई सुनसरी जिल्ला प्रशासन कार्यालयले पक्राउ गरेको छ ।
गैरनेपाली नागरिक भएर वंशजको नागरिकता लिने गणेश हरिजन र उनलाई नागरिकता दिलाउन नक्कली बाबु बन्ने मुर्ती हरिजन, आमा बन्ने सितादेवी हरिजन, आफन्त बनेका श्यामु मोची, दाइ बन्ने बासुदेव हरिजन, दिदि बन्ने सिता चमार र जितनी देवी मोचीलाई पक्राउ गरिएको छ । उनीहरू सातै जनालाई जिल्ला प्रहरी कार्यालयको सोमबार हिरासतमा राखिएको प्रमुख जिल्ला अधिकारी प्रेमप्रकाश उप्रेतीले बताए ।
उनले भने, ‘नक्कली आमा, दाजु दिदि बनेर वडा कार्यालय मार्फत नागरिकताको सिफारिस लिएको आधारमा वंशजको नागरिकता गणेश हरिजनले लिएको उजुरी परेपछि अनुसन्धान गरियो । थप अनुसन्धानका लागि उनीहरूलाई पक्राउ गरी जिल्ला प्रहरी कार्यालयमा पठाको छु ।’ नागरिकताको सिफारिस दिने कार्यवाहक वडाध्यक्ष बुधनारायण चौधरी पनि अनुसन्धानको घेरामा छन् ।
गणेशले गत कार्तिक ७ गते इटहरी ८ को वडा कार्यालयबाट सिफारिस लिएर जिल्ला प्रशासनबाट वंशजको नागकिता लिएको देखिएको छ । वडाध्यक्ष रोहित चौधरीका अनुसार नागरिकता लिने गणेशले नक्कली मान्छे तयार गरी नागरिकता लिएका थिए ।
उनले भने, ‘त्यसबेला मैले वडासदस्य बुधनारायण चौधरीलाई कार्यवाहक वडाध्यक्ष दिएर एकसाता बिदामा बसेको थिए । एकसाता पछि आउँदा नक्कली मान्छे तयार गरी नागरिकताको सिफारिस दिएको चर्चा चल्यो । मैले पनि आफै खोजी निति गर्दा कार्यवाहक वडाध्यक्षले नक्कली मान्छेको रोहवरमा सिफरिस दिएछन् ।’
उनका अनुसार गणेशको ठेगाना इटहरी ८ नभएर सुनसरीको छिटाहा चिमडी भएपनि नेपाली नागरिकता नभएको पाइएको छ । तर उनी लामो समयदेखि सुनसरीमै बसेको र स्थानीय नेपाली महिलासँग विवाह गरेको र विवाह दर्ता समेत गरेको पाइएको छ । तर वंशजको नागरिकताको लागि निवेदन दिने सबै नक्कली भएकाले उनीहरूलाई पक्राउ गरेको वडाध्यक्ष चौधरीले बताए ।
गणेशलाई नागरिकता दिलाउन बासुदेवले वडाले दिएको सिफारिस लिएर सर्जमिनका लागि इलाका प्रहरी कार्यालय इटहरीमा पुगेका थिए । प्रहरीले बासुदेवको निवेदन सरजमिनलाई आधार मानेर वडालाई पुनः सिफारिस दिएको थियो ।
वडाले गणेशलाई नागरिकता दिनका लागि जिल्ला प्रशासन कार्यालयमा सिफारिस दिएको थियो । सोही सिफारिसका आधारमा जिल्ला प्रसासनले गणेशलाई वंशजको नागरिकता दिएको थियो ।
प्रकाशित : मंसिर ४, २०७५ १८:३४