विकासका लागि हुने जैविक विविधता विनाशप्रति चिन्ता व्यक्त
शाम एल शेख, इजिप्ट — जैविक विविधता सम्बन्धि पक्ष मुलुकहरुको जारी १४ औँ राष्टसंघीय सम्मेलन (कोप १४) मा विकासका निम्ति हुने विनाशबारे गम्भीर बहस भएको छ ।
वन तथा वातावरण मन्त्रालयको तर्फबाट सम्मेलनमा सहभागी वन तथा भू–संरक्षण विभागका उपमहानिर्देशक राजेन्द्र केसीले विकासका लागि विश्वभर हुने जैविक विविधता, वन क्षेत्र, वन्यजन्तुको बासस्थानको क्षतिबारे गम्भीर बहस भइरहेको बताए ।
विकासका लागि विनाश अपरिहार्य जस्तै भए पनि दिगो विकासका लागि कम क्षति गरी विकासका गतिविधि सञ्चालन गर्नुपर्नेमा विभिन्न देशका सरकारी अधिकारीले धारणा राखेका छन् ।
‘द्रुतततर विकासका लागि वन र अन्य महत्वपूर्ण जैविक विविधताको क्षति भइरहेकामा सबैले चिन्ता व्यक्त गरेका छन्’केसीले भने,‘त्यस्तो विनाशलाई कसरी कम गर्न सकिन्छ र विकासलाई अघि बढाउन सकिन्छ भन्नेमा गम्भीर बहस भएको छ ।’
अफ्रिकी मुलुकहरु सहित विकासोन्मुख मुलुकहरुमा सडक, विद्युत, सिंचाई, विमानस्थल जस्ता ठूला संरचना लगायत सहर विस्तारका लागि वन क्षेत्रको विनाश हुने गरेको छ । त्यस्ता विकासका लागि हुने विनाशले जैविक विविधता सहित दुर्लभ वन्यजन्तु र तिनको बासस्थानका साथै स्थानीय समुदायले वन क्षेत्रबाट पाइरहेको लाभांश समेत कटौती हुने भएकाले त्यसअघि सचेत हुनुपर्नेमा सरोकारवालाले ध्यानाकर्षण गराएका छन् ।
जैविक विविधता सम्बन्धी पक्ष मुलुकहरुको महासन्धि (सीबीडी) को मुख्यालयका अनुसार यो सम्मेलनले जैविक विविधता, प्रकृति, मानवको विकास र सहकार्यका लागि शाम एल शेखबदेखि बेइजिङ नामको कार्ययोजना तयार गरिनेछ । अर्को सम्मेलन सन् २०२० मा चीनको आयोजनामा बेइजिङमा हुनेछ ।
१३ मंसिरसम्म चल्ने सम्मेलनमा नेपालसहित १ सय ९६ मुलुकका सरकारी अघिकारीहरु, अनुसन्धानकर्ता र पर्यवेक्षक सहभागी छन् । नेपालले सन् १९९४ मा उक्त महासन्धिमा हस्ताक्षर गरेर पक्ष मुलुक (सदस्य) भएको हो ।
प्रकाशित : मंसिर ५, २०७५ १५:२३