भिसा नवीकरण गर्नै सास्ती : बंगलादेशमा नेपाली विद्यार्थी

अतुल मिश्र

ढाका/बंगलादेश — चिकित्सालगायत विभिन्न विधामा बंगलादेशमा अध्ययनरत करिब ५ हजार नेपाली विद्यार्थी बर्सेनि भिसा नवीकरण गराउनुपर्ने समस्याले पिरोलिएका छन् ।

नवीकरण क्रममा आफैं उपस्थित हुनुपर्ने र प्रहरी रिपोर्ट बनाउनुपर्नेलगायत झन्झटिला व्यवस्थाका कारण नेपाली विद्यार्थी आजित छन् । त्यसका लागि बर्सेनि अनावश्यक रूपमा समय र नाजायज पैसासमेत खर्चनुपर्ने स्थिति रहेको विद्यार्थी बताउँछन् ।

Yamaha


डेल्टा मेडिकल कलेज, ढाकाका एमबीबीएस अन्तिम वर्षमा अध्ययनरत मनीष रेग्मी भन्छन्, ‘सबै थोक सहज रूपमै भए पनि एकपटक भिसा नवीकरण गर्दा केही जायज, नाजायज रकमसहित कम्तीमा ३ दिन खर्चनुपर्छ ।’ एकै पटक ५ वर्षका लागि भिसा नपाउँदा विद्यार्थी मारमा परेका हुन् । ढाकास्थित नेपाली दूतावासका अनुसार बंगलादेशमा हाल सबै विधामा अध्ययनरत विद्यार्थीमध्ये करिब ९५ प्रतिशतजति चिकित्सा क्षेत्रमा अध्ययन गरिरहेका छन् ।

विद्यार्थीहरूका अनुसार विगतमा अध्ययन अवधिभरका लागि एकैपटक भिसा दिने गरिएको थियो । दूतावासका अधिकारीले समेत ‘बंगलादेशी सरकारी निकाय’ सँग कुरा गर्दा पुष्टि नगरे पनि धेरैअगाडि ५ वर्षकै लागि समेत भिसा दिने गरिएको उल्लेख गरे । बंगलादेशको सम्बद्घ निकायले भिसा अवधिबारे स्पष्ट रूपमा बोल्ने गरेको छैन । केहीलाई अहिले पनि २ वर्षे भिसा दिन गरिएको दाबीसमेत दूतावास स्रोतले गर्‍यो ।

‘हामीले एक पटक भिसा लिएपछि बर्सेनि नवीकरण गर्नुपरेको थिएन,’ बंगलादेशबाटै चिकित्साशास्त्र अध्ययन गरेका वरिष्ठ स्त्री तथा प्रसूति रोग विशेषज्ञ डा. भोला रिजालले भने । उनले सन् १९६६ देखि १९७२ सम्म बंगलादेशमै अध्ययन गरेका थिए ।

प्रहरी ‘भेरिफिकेसन’ मा अवैध रकम दिन नचाहने विद्यार्थीले भिसाका लागि महिनौं कुर्नुपर्ने स्थितिसमेत रहेको विद्यार्थीहरूको दुखेसो छ ।

सामान्य रूपमा भिसा नवीकरणका लागि कलेजबाट कागतपत्र लिएर आवेदन गर्न आफू रहेको क्षेत्रमा पर्ने ‘डिपार्टमेन्ट अफ इमिग्रेसन एन्ड पासपोर्ट अफिस’ जाँदा एक दिन लाग्छ । त्यहाँ २ महिनापछि आउन ‘स्लिप’ दिइन्छ ।

करिब दुई सातापछि प्रहरीले फोन गरेर प्रमाणीकरण (भेरिफिकेसन) गर्न बोलाउँछ । यो प्रक्रियामा समेत सबै कुरा सामान्य भए एक दिन लाग्छ । प्रहरीको काम सकेपछि २ महिनापछि बोलाइएको समयमै गएर भिसा लिन समेत एक दिन लाग्ने नेपाली विद्यार्थी बताउँछन् ।

बंगलादेशमै रहेका डा. जोगानन्द साह आफना साथीभाइको अनुभव औंल्याउँदै भन्छन्, ‘नवीकरण गर्न झमेला नभए ३/४ दिन र झमेला भए ३/४ साता वा अझ बढीसम्म लाग्ने स्थिति देखिएको छ ।’ डाइबिटिक एसोसिएसन मेडिकल कलेज, फरिदपुरमा एमबीबीएस चौथो वर्षमा अध्ययनरत निराकार श्रेष्ठ र उनका थुप्रै साथीको भिसा नवीकरण अनुभव दु:खद छ ।

उक्त कलेजमा पढ्ने २५ नेपालीमध्ये १० जनाले एकै पटक भिसा नवीकरणका लागि आवेदन गरेकामा ६ महिनामा बल्ल पाए । अझै १ जनाको नवीकरण भएको छैन । श्रेष्ठ भन्छन्, ‘यो प्रक्रियामा करिब दुई/तीन हजार रुपैयाँ खर्च हुनेमा २३ हजारजति नेपाली रुपैयाँ र त्यतिकै समय खर्च भयो ।

बंगलादेशका नेपाली राजदूत डा. चोपलाल भुसालले समेत बर्सेनि भिसा नवीकरण नेपाली विद्यार्थीका लागि ठुलै समस्या रहेको बताए । ५ वर्षका लागि भिसा दिँदा विद्यार्थीलाई राहत हुने जनाउँदै उनले भने, ‘भिसा नवीकरण ठुलै समस्या हो, बर्सेनि गर्दा आफैं प्रत्यक्ष जानुपर्ने र केही समय दिनुपर्ने हुनाले विद्यार्थीको पठनपाठन प्रभावित भइरहेको हुन्छ ।’ यसका लागि बंगलादेश सरकारसँग वार्ता गरिरहेको उनले जनाए । हाल नेपाली दूतावासले भिसा प्रकरणमा कूटनीतिक ‘लबिइङ’ गरिरहे पनि त्यहाँको संसद्बाटै यो नियम परिवर्तन गर्नुपर्ने हुन्छ ।

संसद्बाट नियम परिवर्तनबारे सकारात्मक आश्वासन पाएको औंल्याउँदै डा. भुसालले भने, ‘यो विषयमा बंगलादेशका प्रधानमन्त्री शेख हसिना, परराष्ट्रमन्त्री अबुल असन महमुद अलि र स्वास्थ्यमन्त्री मोहम्मद नासिमसँग हाम्रो कुराकानी भएको छ ।’ उनका अनुसार बंगलादेशका राजनीतिज्ञहरू संसद्मा यो प्रस्ताव लैजाने प्रक्रियामा छन् ।

प्रकाशित : मंसिर २१, २०७५ ०७:३२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

निजगढ विमानस्थल निर्माणमा बाधक बनेका टाँगिया बस्तीवासी भन्छन्, ‘व्यवस्थापन गर, हामी छाड्छौं’

पवन यादव

सिमरा — प्रस्तावित निजगढ अन्तर्राष्ट्रिय विमानस्थल निर्माणमा प्रमुख बाधक बनेका टाँगिया बस्तीका बासिन्दाले आफूलाई चाँडै सार्न सरकारसँग आग्रह गरेका छन् । आफूहरू विकासको बाधक नभएको भन्दै उपयुक्त स्थानमा सारेर चाँडो विमानस्थल निर्माणका लागि गति दिन आग्रह गरेका हुन् । 


उपयुक्त स्थानमा सारिए आफूहरू जान तयार रहेको जितपुर सिमरा उपमहानगरपालिका १६, टाँगिया बस्तीकी देवीकुमारी आलेमगर बताउँछिन् । ‘बस्ती सर्छ सबैले भन्ने गरेका छन् तर कहाँ सर्ने, कसैलाई कुनै जानकारी छैन,’ उनले भनिन्, ‘पटक–पटक गाउँमा आएका ठूला नेताहरूको टोलीले बस्ती सार्ने भनेका छन्, कहाँ सार्ने हो, अहिलेसम्म कसैले भनेको छैन ।’ संसदीय टोलीको नेतृत्व गर्दै पूर्वप्रधानमन्त्री माधवकुमार नेपाल स्थलगत निरीक्षणका लागि बिहीबार टाँगिया बस्तीमा आएका थिए । उनले पनि बस्ती कहाँ सार्ने हो, स्पष्ट पार्न सकेनन् । वन मासेर आलेमगरको परिवारले १० कट्ठामा खेती गर्दै आएको छ । घर स्थानान्तरण भएपछि परिवारको भरणपोषण कसरी गर्ने चिन्ताले पूरै बस्तीलाई सताइरहेको उनले बताइन् ।
यहाँका बासिन्दाले प्रतिपरिवार २ बिघा ६ कट्ठा जग्गा पाउनुपर्ने, बस्तीमा रहेको घरको मुआब्जा पाउनुपर्ने माग अघि सारेका छन् । नेपाल नेतृत्वको ७ सदस्यीय टोलीले कुरा सुनेर मात्र फर्केको स्थानीय प्रेमबहादुर गोलेले बताए । ‘नेपालको भाषण सुन्दा बस्ती स्थानान्तरण गर्ने आश्वासन मात्र दिएको अनुभव भयो,’ उनले भने ।
बस्ती उठाउनुअघि प्रत्येक घरधनीलाई स्थानान्तरण हुने जग्गाको लालपुर्जा उपलब्ध गराउनुपर्ने उनको भनाइ छ । ‘हाम्रो गोठ, गाईबस्तु पनि राज्यले नै ढुवानी गरिदिनुपर्छ,’ उनले भने । ‘अहिलेसम्म कहाँ जाने हो, सरकारी पक्षले टुंगो लगाउन सकेको छैन,’ टाँगिया बस्ती संघर्ष समिति अध्यक्ष रमेश सापकोटाले भने । बस्तीमा रहेका गुम्बा, मन्दिर पनि स्थानान्तरणको व्यवस्था मिलाउनुपर्नेमा उनले जोड दिए । टाँगिया बस्तीमा १४ सय ७६ परिवारको बसोबास छ ।
नेता नेपालले विमानस्थल निर्माणमा सहयोग पुर्‍याउन स्थानीयसँग आग्रह गरे । ‘टाँगिया बस्तीवासीले सहयोग नगरे विमानस्थल अन्यत्र जान सक्ने सम्भावना छ,’ उनले भने, ‘अन्यत्र सार्न धेरै चलखेल भएका छन् । हामीले यहीं विमानस्थल बनाउनुपर्नेमा सुरुदेखि नै जोड दिइरहेका छौं ।’ विमानस्थलकै लागि फास्ट ट्रयाक निर्माण भइरहेको उनले बताए ।
विमानस्थल निर्माण आयोजना कार्यालय सिमराका प्रमुख ओमनारायण शर्माले सकेसम्म कम रूख काटेर निर्माण गरिने दाबी गरे । विमानस्थलको डीपीआर निर्माणका लागि अध्ययन कार्य अहिलेसम्म जारी रहेको उनले जानकारी दिए ।

प्रकाशित : मंसिर २१, २०७५ ०७:३०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT