निर्मलाको बलात्कार र हत्याका पछिल्ला आरोपीहरू घट्ना भएकै दिन पनि पक्राउ परेको खुलासा

मेरो छोरालाई लागूऔषध दिएर अपराध कबुल गर्न लगाउने काम भइरहेको छ – वीरबहादुर चौधरी (विशालका बुबा) 
चित्रांग थापा, भवानी भट्ट

कञ्चनपुर — निर्मला पन्तको बलात्कारपछि हत्या प्रकरणमा अनुसन्धानको दायरामा रहेका दुई जना घटना भएकै दिन पक्राउ परेको खुलेको छ ।




अनुसन्धानका लागि काठमाडौं पुर्‍याइएका विशाल चौधरी र काठमाडौंमै पक्राउ परेका प्रदीप रावल कुखुरा चोरीको आरोपमा घटना भएकै दिन साउन १० गते पक्राउ परेको जिल्ला प्रहरी कार्यालयले जनाएको छ ।

प्रहरीका अनुसार साउन ९ गते राति भीमदत्त नगरपालिका १८ भगतपुरको एक पसलबाट कुखुरा चोरी भएको थियो । पसल मालिक पुनित चौधरीेले प्रदीपमाथि शंका गरेर सालघारीस्थित प्रहरी बिटमा जाहेरी दिएका थिए ।

त्यसैका आधारमा साउन १० गते बिहान १० बजेतिर प्रदीपलाई पक्राउ गरिएको जानकारी प्राप्त भएको जिल्ला प्रहरी कञ्चनपुरका एसपी कुवेर कडायतले बताए । ‘प्रदीपले आफूले कुखुरा नचोरेको भनेपछि सामान्य सोधपुछ गरी आधा/एक घण्टामै छाडिएको हो,’ कडायतले भने, ‘प्रदीपले दिएको जानकारीका आधारमा १० गते नै सांँझ साढे ५ बजेतिर विशाललाई पक्राउ गरिएको देखिन्छ ।’

एसपी कडायतका अनुसार सालघारी पोस्टले पक्राउ गरी विशाललाई वडा प्रहरी कार्यालयमा राखेकामा साउन ११ गते दिउँसोसम्म उजुरीकर्ता नआएपछि अभिभावकको जिम्मा लगाएर छाडिएको हो ।

कुखुरा र ३ सय रुपैयाँ चोरी आरोपमा उनीहरू पक्राउ परेका कडायतले बताए । प्रदीपलाई सामान्य सोधपुछ गरी छाडिएकाले कुनै रेकर्ड नदेखिएको र विशाललाई दोस्रो दिन उनकै बुबा वीरबहादुरको जिम्मा लगाएर छाडिएको एसपी कडायतले बताए ।

वीरबहादुरले भने विशाललाई १० गते ४ बजेको आसपास घरबाटै पक्राउ गरिएको बताए । साउन १० गते साथीको घरमा गएकी निर्मला दोस्रो दिन भीमदत्त नगरपालिका १८ निम्बुखेडाको उखुबारीमा मृत भेटिएकी थिइन् ।

पोस्टमार्टम रिपोर्टअनुसार निर्मलाको हत्या साउन १० गते २ देखि ३ बजेको बीचमा भएको यसअघि नै प्रहरीले सार्वजनिक गरिसकेको छ । प्रहरीले सोही घट्नामा शंकास्पद भन्दै विशाल र प्रदीपलाई अनुसन्धान गरिरहेको छ ।

कञ्चनपुर प्रहरी प्रमुख एसपी कडायतका अनुसार काठमाडौंमा अनुसन्धानका क्रममा प्रहरी नियन्त्रणमा रहेका प्रदीपले प्रारम्भिक बयानमा आफूहरूले निर्मलाको बलात्कारपछि हत्या गरेको सकारेका छन् ।
उनले विशालसँग बयान लिने र थप छानबिन गर्ने काम भइरहेको बताए । ‘सबै कुरा टुंगो लागिसकेको छैन,’ एसपी कडायतले भने, ‘प्रदीपसँगै विशालले पनि अपराध सकारेका छन्, तर अपराध प्रमाणित गर्ने ठोस प्रमाण र आधार अझै पुगेको छैन ।’

उनले दुवै जनाको बयानका आधारमा थप शंकास्पद व्यक्तिहरूको डीएनए परीक्षण तयारी भइरहेको उल्लेख गर्दै त्यो मात्रै अपराधको प्रमाण हुन नसक्ने दाबी गरे । ‘सय प्रतिशत नमिल्न पनि सक्छ, क्यारेक्टर नमिल्न पनि सक्छ, डीएनए अपराध पत्ता लगाउन सहयोगी माध्यम मात्र भएको हुँदा अन्य प्रमाण र आधार पनि चाहिने हुन्छ ।’

प्रदीप र विशाललाई सार्वजनिक अपराध ऐनअन्तर्गत थुनामा राखी बयान लिने र अनुसन्धान भइरहेको एसपी कडायत बताउँछन् । ‘उनीहरू दुवै जना कञ्चनपुरमा सुरु भएको मुद्दाको दायरामा आएका छैनन्, त्यसैले अनुसन्धानका क्रममा थुनछेक गर्दा सार्वजनिक अपराधअन्तर्गत म्याद थप गरिएको हो,’ उनले भने ।

प्रदीपलाई काठमाडाैंमा पक्राउ गरिएपछि उनकै बयानका आधारमा प्रहरीले विशाल र दिनेश चौधरीलाई काठमाडौं झिकाएको जिल्ला प्रहरी कार्यालयले जानकारी दिएको छ ।

दुवै जनालाई बिहीबार अभिभावकसंँगै काठमाडौं पठाइएको थियो । ‘प्रहरीले सँंगै पठाए पनि छोरासँग भेट हुनै दिएन,’ विशालका बुबा वीरबहादुरले भने, ‘महेन्द्रनगरबाटै फरक–फरक गाडीमा लगियो, प्लेनमा पनि सिट फरक–फरक थियो ।’

बिहीबार ६ बजे सोधपुछ गर्ने ठाउँमा पुगे पनि १२ बजे मात्रै छोरासँग भेट्न दिएको उनले बताए । ‘तपाईंहरू टीभी हेर्न‘ भनेर छोरालाई भित्र लगियो, कहांँ हो भन्ने पनि थाहा छैन,’ उनले भने, ‘६ घण्टापछि ल आउनुस् भनेर भित्र (सोधपुछ गरिरहेको ठाउँमा) लगेका थिए ।’

‘लागूऔषध खुवाएर बयान लिएजस्तो देखिन्छ’
‘विशाललाई भेटेपछि मेरै सामुन्ने सोधियो, उसले मैले नै अपराध गरेको भनेर बयान दियो,’ वीरबहादुरले भने, ‘तर उसको अनुहार निकै रातो थियो, लागूऔषध खुवाएर बयान लिएजस्तो देखिन्थ्यो ।’ उनले भोलिपल्ट पनि ३ बजे भेट्न दिएको र त्यतिबेला पनि फ्रेस नदेखिएको उनले बताए ।

फर्कने बेला प्रहरीले डीएनएको रिपोर्ट नआउँदासम्म केही भन्न नसकिने बताएको उनले जानकारी दिए । ‘छोरालाई लागूऔषध दिएर अपराध कबुल गर्न लगाउने काम भइरहेको छ,’ उनले दाबी गरे ‘मेरो छोरा लागूऔषध सेवन गरेर कुखुरा तथा पैसा चोरीमा लागे पनि बलात्कार र हत्याजस्तो अपराधमा संलग्न हुन सक्दैन ।’

शनिबार विशालका बुबा वीरबहादुर र सोधपुछकै लागि काठमाडौं बोलाइएका अर्का युवक दिनेश र उनका बुबा पवन महेन्द्रनगर फर्किएका हुन् । दिनेश र विशालको घर भीमदत्त नगरपालिका १८ भगतपुर उल्टाखाम रोडमा पर्छ ।

प्रदीपको घर भीमदत्त भगतपुरकै नेपाली सेनाको ब्यारेक पछाडि छ । उनीहरू १७/१८ वर्षका भएको आफन्तले जनाएका छन् ।

प्रकाशित : मंसिर २४, २०७५ ०७:२८
प्रतिक्रिया
पठाउनुहोस्

'न्याय हराएकैै हो ?'

चित्रांग थापा, भवानी भट्ट

महेन्द्रनगर — ‘छोरीको हत्यारा पत्ता लाग्ने र न्याय पाउने आस मर्दै गएको छ,’ बलात्कारपछि हत्या गरिएकी १३ वर्षीया निर्मला पन्तकी आमा दुर्गादेवीले कञ्चनपुरका तत्कालीन प्रहरी प्रमुख एसपी दिल्लीराज विष्ट र इन्स्पेक्टर जगदीशप्रसाद भट्ट बर्खास्त भएको जानकारी पाएपछि भनिन् ।

‘दुईजनालाई बर्खास्त गरेर हामीलाई भुलाउन खोजिएको त होइन?’ उनले भनिन्, ‘कसैलाई निलम्बित गरियोस् वा बर्खास्त, हामीलाई त हत्यारा चाहियो।’ निर्मलाका बुबा यज्ञराजले एसपी र इन्स्पेक्टरलाई बर्खास्त गरेर वास्तविक अपराधी जोगाउने षड्यन्त्र गरिएको बताए। ‘अब छोरीको हत्यारा पत्ता लाग्ने आस छैन,’ उनले भने, ‘न्याय पाउनै कठिन भयो।’

भीमदत्त नगरपालिका २, उल्टाखामकी निर्मलाको बलात्कारपछि हत्या भएको ३ महिना पुग्यो। अपराधी पत्ता लाग्ने आस र भरोसामा रहेका पीडित परिवार अब निराश हुन थालेको छ। निर्मलाका आमाबुबासँगै उनलाई न्यायको आन्दोलनमा साथ दिने अधिकारकर्मी र सर्वसाधारणसमेत न्याय पाउनेमा विश्वस्त छैनन्। ‘सुरुबाटै अपराधी जोगाउने काम भइरहेको थियो,’ यज्ञराजले भने, ‘दुई प्रहरीलाई बर्खास्त गरेपछि अब मुख्य दोषी खोज्नै पर्दैनजस्तो गरिँदै छ।’

अनुसन्धानमा लापरबाही गर्ने प्रहरीमाथि विभागीय मात्र नभई कानुनी कारबाही गरिनुपर्ने दुर्गादेवीको माग छ। ‘गरिब र विपन्नले न्याय पाउँदैनन् भन्ने सुनेकी थिएँ,’ उनले भनिन्, ‘अहिले भोगिरहेकी छु।’ उनले छोरीका लागि न्याय माग्दै भएका आन्दोलन र आफूहरूलाई न्याय दिलाउने आश्वासन दिनेको भनाइ झूटो सावित भएको बताइन्।

‘छोरीका लागि न्याय माग्दै देशभरि आन्दोलन चर्कियो, नेता, सांसद, मन्त्री घरमै पुगेर अपराधी पत्ता लगाउने आश्वासन दिए,’ उनले भनिन्, ‘तर पहुँच र पैसाका भरमा अपराधी जोगाउन यतिसम्म खेल हुने रहेछ भन्ने कल्पना गरेका थिएनौं।’ निर्मला प्रकरणले पूरै देश तरंगित बनायो। संसदेखि सडकसम्म ततायो। महेन्द्रनगरको आन्दोलनमा प्रहरीको गोली लागेर सन्नी खुनाको मृत्युसमेत भयो।

साउन ११ मा निर्मलाको शव भेटिएयता आधा दर्जन टोलीले घटना अनुसन्धान गरे तर केही प्रगति हात लागेन। अहिले पनि प्रहरीको एउटै जवाफ आउँछ, ‘हामी अनुसन्धानमै छौं, केही भन्न सकिन्नँ।’ प्रहरीले न्यारो डाउन प्रविधिबाट अनुसन्धान गरिरहेको भने पनि अझै घटनानजिक पुग्न सकेको छैन। ‘सबै टोली अनुसन्धानमै खटिएका छन्,’ कञ्चनपुरका डीएसपी कृष्णराज ओझाले भने, ‘तर केही भन्न सकिने अवस्था छैन, नयाँ तथ्यमा पुग्न सकेका छैनौं।’

निर्मलाका आमाबुबासँगै राजधानी गएका अधिकारकर्मी भने सुरुबाटै अनुसन्धानमा त्रुटि भएको आरोप लगाउँछन्। उनीहरू बम दिदीबहिनीदेखि अन्य शंकास्पद व्यक्तिमाथि प्रहरीले कारबाहीमा चासो नदेखाएको बताउँछन्।

सरकारले विष्ट र भट्टलाई बर्खास्त गरेपछि यहाँका अधिकारकर्मीले बर्खास्त मात्रै नभई कानुनअनुसार कारबाही हुनुपर्ने माग गरेका छन्। उनीहरूले अपराधी लुकाउने र प्रमाण नष्ट गर्नेलाई नयाँ कानुनी व्यवस्थाअनुसार कारबाही गर्नुपर्ने बताए। ‘सरकारले कञ्चनपुरवासीलाई भुलाउने काम गरेको छ,’ नागरिक संघर्ष समितिकी संयोजक मीना भण्डारीले भनिन्, ‘प्रमाण नष्ट गर्नेलाई कानुनअनुसार कारबाही होस् र अपराधी पत्ता लगाइयोस्।’

नयाँ प्रहरी नेतृत्व फेरिएर काम सुरु गरेको पनि २ महिना पूरा भइसक्यो। तर, अनुसन्धानप्रति स्थानीय सन्तुष्ट छैनन्। प्रहरीकै संलग्नतामा प्रमाण मेटाइएको घटना पहिलो भएको अधिकारकर्मी अधिवक्ता पुनम चन्द बताउँछिन्। ‘जघन्य अपराधमा प्रहरीले सिलसिलेवार ढंगले प्रमाण मेटाएको पहिलो घटना हो,’ १७ वर्षदेखि वकालत गरिरहेकी उनले भनिन्।

प्रकाशित : कार्तिक ९, २०७५ २१:३३
पूरा पढ्नुहोस्
प्रतिक्रिया
पठाउनुहोस्