पानी नपाएर स्कुल छुट्छ (फोटो फिचर) 

बर्षात छिटो सुरु भयो भने असार मध्यतिर गाउँ नजिकैका मुहान रसाउन थाल्छन् । तीन महिना जति यो गाउँका मानिसहरूलाई खानेपानी गाउँ नजिकै उपलब्ध हुन्छ । जब बर्खा सकिन्छ । यहाँका मानिसहरूले ढुक्कले निदाउने दिन पनि सकिन्छ । 

कुवामा पानी भर्नेको सङ्ख्या बढी भयो भने पानी सकिन्छ । अर्को गाग्रो पानी जम्मा हुन १५/२० मिनेट कुर्न पर्छ । ‘कहिले त बिहान ४ बजे कुवामा पुगे पनि ९/१० बजे तिर मात्र पानी भर्ने पालो आउँछ’ स्थानीय पुनी गुर्धामीले भनिन् । पानी लिएर फर्किदा ढिला भएको दिन खाना पकाउन ढिला हुन्छ । केटाकेटीको स्कुल पनि छुट्छ । पानी भर्नका लागि अधिकांश विद्यार्थीहरूको हप्तामा ३/४ दिन स्कुल छुट्ने गरेको पुनी बताउँछिन् ।  

पानीको अभावका कारण यहाँ सरसरफाईमा पनि समस्या छ । नुहाउन, लुगा धुनका लागि झन्डै एक घण्टा टाढाको खोलामा जानुपर्ने भएकोले समयमै सरसरफाई गर्न नपाइने गरेको अन्जना बोहराको भनाई छ । 

खानेपानीको समस्याको बारेमा वर्षौँदेखि विभिन्न निकायमा धाउँदा पनि सुनुवाइ नभएको यहाँका स्थानीयको गुनासो छ । गाउँमा पानी सहजरुपमा उपलब्ध भइदिए आफूहरूले वर्षौँदेखिको दुखबाट मुक्ति पाउने उनीहरूको भनाई छ । 

यहाँको खानेपानीको समस्या समाधानको लागि नगरपालिकाले प्रयास गरिरहेको बुङ्गल नगरपालिका ग्रामीण जलश्रोत व्यवस्थापन परियोजनाका प्राविधिक शिव विष्टले बताए । उनले गाउँ भन्दामाथि मुहान नभएकाले खानेपानी योजना निर्माणमा समस्या भएको बताए । गाउँ भन्दा ४५ मिनेट तल रहेको मुहानको पानीलाई सोलार लिफ्टिङ्ग गरेर यहाँको समस्या समाधान गर्न पहल भइरहेको उनको भनाई छ ।