राजविराज — सप्तरीको तिलाठी कोइलाडी गाउँपालिका ७ स्थित बभनगामामा शुक्रबार साँझ आगलागी हुँदा ७ परिवारका १३ वटा घर जलेरको छ । आगलागीबाट ४० लाख रुपैयाँबरावरको क्षति भएको प्रारम्भिक अनुमान गरिएको छ । आगलागीमा केही पशुसमेत परेको छ ।
तिलाठी कोइलाडी ७ का बिन्देश्वर साफीको घरबाट अचानक सल्केको आगोले उनको तीनवटा घरसहित छिमेकीहरु सिकी साफी, प्रसाद साफी, प्रयाग साफी र हनुमानी रजकको दुई–दुईवटा घर जलेर नष्ट भएको छ । यस्तै मजे साफी र छोटे साफीको एक–एकवटा घर जलेर नष्ट भएको तिलाठी कोईलाडी गाउँपालिकाका अध्यक्ष सतिशकुमार सिंहले जानकारी दिए । आगलागीमा बिन्देश्वर यादवको घरमा रहेको एकलाख रुपैयाँसमेत जलेर नष्ट भएको छ । बैदेशिक रोजगारीमा रहेका छोराले केही दिन अघि घर बनाउन उक्त पैसा पठाएका थिए ।
यस्तै आगलागीमा गरगहना, लत्ताकपडा, खाद्यान्नलगायत सामग्री जल्दा ४० लाख रुपैयाँ बराबरको क्षति भएको प्रारम्भिक अनुमान गरिएको छ । धान भित्र्याउन परिवारका सबै सदस्य खेतमा रहेका बेला आगलागी हुँदा घरका कुनै पनि सरसामान पीडितहरुले निकाल्न पाएनन् । राजविराज र हनुमाननगर कंकालिनी नगरपालिकाको बारुणयन्त्र, सशस्त्र र नेपाल प्रहरी तथा स्थानीय बासिन्दाको सहयोगमा २ घण्टापछि मात्र आगो निभाइएको थियो ।
प्रकाशित : मंसिर २८, २०७५ १८:५५