अभियन्ताले भत्काए श्लेष्मान्तकको कंक्रिट, ६ जना पक्राउ

सम्पदा रोक्न श्लेष्मान्तक पुगेका ६ अभियन्तालाई प्रहरीले नियन्त्रणमा लिएको छ । सम्पदा बचाउ अभियान संघर्ष समिति संयोजक गणपतिलाल श्रेष्ठ, अभियन्ता सञ्जय अधिकारी, लालिमा श्रेष्ठ, सुनिता गौतम, अर्जुन राना, पूर्णविक्रम खाणलाई महानगरीय प्रहरी प्रभाग गौशालामा राखिएको छ ।

कंक्रिट भत्काउनुअघि अभियन्ताले कोषको कार्यालयमा ज्ञापन बुझाएका थिए । अभियन्ता आउने थाहा पाएपछि कोषका सदस्य सचिव प्रदीप ढकाल, कोषाध्यक्ष मिलनकुमार थापालगायत पदाधिकारी र कार्यकारी अधिकृत रमेश उप्रेती कार्यालय छाडेर हिँडेको अभियन्ताले आरोप लगाए ।

पदाधिकारी र कार्यकारी अधिकृत नभएपछि वरिष्ठ निर्देशक श्यामशेखर झालाई झापन बुझाएका थिए । अभियन्ताले अदालतको आदेश र पुरातत्व विभागको निर्देशनसमेत विपरीत निर्माण भएकाले यसलाई रोक्न माग गरेका थिए । झा ले रोक्न नसकिने बताएपछि अभियन्ता श्लेषमान्तक गएका थिए । अभियन्ता रघुराज भण्डारीले आस्थाको धरोहर पशुपति क्षेत्र नियोजित रुपमा कुरुप बनाउन लागेको बताए । ‘अहिले बनाइरहेको संरचना तुरुन्त रोक्नु पर्छ,’ उनले भने, ‘यसलाई भत्काएर सम्पदामैत्री बनाउनु पर्छ ।’

...........................

यो पनि पढ्नुहोस्

• श्लेष्मान्तकमा फेरि कंक्रिट

• श्लेष्मान्तकमा कंक्रिट: निर्माण रोक्न पुरातत्त्वको निर्देशन

  ......................................

पशुपति क्षेत्रको वनसम्पदा श्लेषमान्तकमा परिपथ बनजाउने भन्दै तीन महिना पहिला कंक्रिट राख्न लागेपछि तीव्र विरोध भएको थियो । सम्पदा संरक्षण अभियन्ता, संस्कृतिविद्, प्रकृतिविद्, संरक्षविद्का तीव्र विरोधपछि कोषले कंक्रिट बिछ्याउने काम रोकेको थियो । पुरातत्व विभागले समेत काम रोक्न आदेश दिएको थियो । फेरि कंक्रिट राखेरै काम सुरु गरेपछि त्यसलाई रोक्न माग गर्दै अभियन्ता श्लेष्मान्तक पुगेका थिए ।

श्लेषमान्तक जंगलको बीचमा रहेको विश्वरुपा मन्दिरको अगाडि बालुवा, गिटी, सिमेन्टजस्ता आधुनिक निर्माण सामग्री प्रयोग गरेर ‘वाक वे’ बनाइरहेको छ । त्यही पुरातत्वले सहमति नदिएको भन्दै रोक्न पत्राचार गरेको थियो । ‘हामीले फेरि काम सुरु गर्न अनुमति दिएका छैनां,’ पुरातत्व विभागका प्रवक्ता रामबहादुर कुँवर भन्छन् । पुरातत्व विश्व सम्पदा शाखाका अनुसार कंक्रिट रोक्न निर्देशन दिएको ठाउँ फेरि किन कंक्रिट राखेको भनेर अध्ययन गर्न टोली पठाइएको छ । टोलीले प्रतिवेदन दिएको छैन । पुरातात्विक क्षेत्रमा जथाभावी खन्ने कार्यको अभियन्ताले विरोध गरेका छन् । पशुपतिका मुख्य भण्डारी केदारमान भण्डारी भन्छन्, ‘केही गर्नै नपर्ने ठाउँमा चाहिं कंक्रिट राखेको छ । वन आफैंमा वन रहोस् । यसलाई बिगार्न पाइँदैन ।’

मृगस्थली क्षेत्र घुम्न सजिलो होस भनेर पर्यटक घुम्ने बाटो बनाउन लागेको दाबी कोषले गर्दै आएको छ । कोषका अनुसार २ करोड ९९ लाख रुपैयाँ खर्च गरेर ‘वाक वे’ बनाइँदै छ । दर्शनार्थी चिप्लिएर लड्ने समस्या भएकाले बाटो बनाएको कोषको दाबी छ ।