सुत्केरी पशुलाई भत्ता

किसानलाई सुत्केरी पशुको भत्ता दिन निवेदन संकलन गरेर वैशाख मसान्तसम्ममा ३ सय ३९ वटा सुत्केरी पशुलाई सुत्केरी भत्ता वितरण गरेको पशु शाखा प्रमुख लामिछानेले भने । सुत्केरी पशुलाई एक हजार रुपैयाँका दरले ३ लाख ३९ हजार रुपैयाँ सुत्केरी भत्ता वितरण गरेको छ ।

पशु शाखा प्रमुख लामिछानेका अनुसार सुत्केरी भत्ता वितरण गरिएको पशुमध्ये ६० प्रतिशत सुत्केरी गाई र ४० प्रतिशत भैंसी छन् । पशु सुत्केरी भत्ता लिनेमा नगरपालिकाको वडा नम्बर ४, ५, ६, ७ र ११ का किसान छन् ।

पशुपालक कृषकलाई प्रोत्साहनस्वरूप नगर क्षेत्रभित्र पालिएका गाई भैंसीलाई सुत्केरी भत्तास्वरूप एक हजार रुपैयाँ दिने गरिएको छ । सुत्केरी भएका गाई भैंसीलाई पौष्टिक आहारा खुवाई दुग्ध उत्पादन बढाउने उद्देश्यले रकम दिएको हो । नगरले चालु आर्थिक वर्ष २०७५/०७६ मा सुत्केरी भत्ताका लागि ५ लाख रुपैयाँ विनियोजन गरेको भन्दै लक्ष्यअनुसार भत्ता वितरण गरिने उनले बताए ।

कृषकले पशुको सुत्केरी भत्ता लिन वडा कार्यालयको सिफारिस, पशुधनी र ब्याएको गाई/भैंसीको बच्चासहितको फोटो र नागरिकताको प्रतिलिपि संलग्न गरी निवेदन नगरपालिकामा दर्ता गर्नुपर्ने लामिछानेले बताए । यसरी उपलब्ध भत्ताबाट कृषकले ब्याएको पशुलाई पौष्टिक आहार र खाद्यान्न किनेर खुवाउनुपर्नेछ ।

कमलामाई नगरपालिका पशु पालनका लागि उपयुक्त क्षेत्र मानिन्छ । पशु पालनबाटै यहाँका किसान जीविकोपार्जन गर्दै आएका छन् । नगरको भद्रकाली, जलकन्या, रानीचुरी, रानीवास, डाँडीगुराँसे लगायतका वडामा किसानले व्यावसायिक भैंसीपालन गर्दै आएका छन् ।

नगरपालिकाले उक्त क्षेत्रलाई भैंसी पकेट क्षेत्र बनाउने तयारी गरेको छ । नगरको ढकाल गाउँ, गैयाटार, पातीपरणलगायतका ठाउँमा भने गाईपालनका लागि उपयुक्त क्षेत्र मानिन्छ ।