गलत समाचार लेखेको अभियोगमा पत्रकार पक्राउ
बझाङ — दर्ता नभएको अनाधिकृत अनलाइनमा प्रहरी विरुद्ध भ्रामक समाचार लेखेको भन्दै एक जनालाई पक्राउ गरिएको छ । साइपाल पोस्ट नामक अनलाइनमा प्रहरीको मिलेमतोमा बझाङमा चरेसको कारोबार भइरहेको विषयमा समाचार लेखेको भन्दै प्रहरीले पत्रकार गणेश विकलाई पक्राउ गरेको हो ।
बझाङको जयपृथ्वी नगरपालिका–३ घर भएका विकले साइपाल पोस्ट नामको अनलाइनमा ‘बझाङमा घुमुवा प्रहरीको मिलापत्रमा लागूऔषध चरेस विक्री वितरण’ शिर्षको समाचार बिहीबार दिउँसो पोस्ट गरेका थिए । प्रहरी सङ्गठनको मर्यादामाथि आँच पुर्याएको भन्दै प्रहरीले बिहीबार नै विकलाई पक्राउ गरेको थियो ।
‘पहिला पनि यस्तै खालका झूटा समाचार अनलाइनमा पोस्ट गरेर विभिन्न व्यक्तिको चरित्र हत्या गर्ने काम गर्ने गरेको रहेछ’ बझाङका डिएसपी प्रविण धितालले पक्राउ गर्नुको कारणबारे भने ‘अहिले त प्रहरीकै बारेमा हुँदै नभएको आरोप लगाएर समाचार लेखेको पाइयो । धेरै पटक सम्झाई बुझाई गर्दा नमानेपछि कारबाही गर्नु परेको हो’ उनले यस विषयमा उपल्लो निकायसँग पनि सल्लाह गरिएको र उनलाई साइबर अपराध सम्बन्धी मुद्दा चलाउनका लागि काठमाडौं पठाइएको बताए ।
यता पत्रकारका विभिन्न संगठनहरुले विकको पक्राउको विरोध गरेका छन् । नेपाल पत्रकार महासङ्घ बझाङ शाखाले विकको पक्राउप्रति आपत्ति जनाउँदै रिहाईको माग गरेको छ । यस्तै क्रान्किारी पत्रकार सङ्गठन नेपालले पनि विकको पक्राउको विरोध गर्दै विज्ञप्ति जारी गरेको छ ।
सङ्गठनका महासचिव बाबुराम भुसालद्वारा जारी विज्ञप्तिमा विकको पक्राउले राज्य नै प्रेस तथा अभिव्यक्ति स्वतन्त्रताको खिलाफमा उत्रिएको उल्लेख गरिएको छ । आफ्नो करतुत बाहिर ल्याएको रिस फेर्नका लागि विकलाई बन्दी बनाएको भन्दै तत्काल रिहाइको माग समेत विज्ञप्तिमा उल्लेख गरिएको छ ।
प्रकाशित : पुस २०, २०७५ १५:३१