चितवनमा दाहालले भावुक हुँदै भने, 'अब १० वर्ष सम्वृद्धिको काम गरेर माथि जाने विचार छ'
चितवन — सत्तारुढ नेपाल कम्युनिस्ट पार्टी (नेकपा)का अध्यक्ष तथा पूर्व प्रधानमन्त्री पुष्पकमल दाहालले आफ्नो मृत्युअघि देश सम्वृद्ध बनाउने भावनात्मक भाषण गरेका छन् ।
नारायणगढ नारायणी नदी किनारमा आयोजित १२ औँ चितवन महोत्सवको बुधवार उद्घाटन गर्दै दाहालले भने ‘१० वर्ष सम्वृद्धिको काम गरेर माथि जाने विचार छ । सम्वृद्धि जसले गरे पनि हुन्छ । निजी क्षेत्रले गरे पनि हुन्छ । लिबरल ईकोनोमिबाट गरे पनि हुन्छ ।’
माओवादको नाममा १० वर्ष सशस्त्र सङ्घर्षको नेतृत्व गरेका नेता दाहालले विकासको लागि चिनियाँ नेता माओको नभएर देङस्याओ पिङको नीति उपयुक्त भएको बताए । ‘क्रान्तिपछि विकासको सन्दर्भमा चीनमा पहिला माओत्सेतुङले अगाडी सारेको एउटा मोडेल थियो । त्यसको ठाउँमा अर्का नेता देङले बिरालोको मुख्य काम मुसा मार्ने हो कालो सेतो जे भए पनि केही फरक पर्दैन भनेर विश्वमै चर्चा कमाएको त सबैलाई थाहा नै छ ।’
चीनमा देङकै मोडलले विकास चरम गतिमा भएको हुँदा नेपालमा पनि आफूहरू त्यही नीतिमा रहेको दाहालले बताए । ‘बिरालो जस्तो भए पनि हुन्छ तर मुसा मार्नु पर्यो भन्नुको तात्पर्य विकास हुनु पर्यो, जनताको जीवनस्तर उठ्नु पर्यो र देश सम्बृद्ध हुनु पर्यो भन्ने थियो । जसले गरे पनि हुन्छ भन्ने थियो । देश र जनतालाई धनी र सम्बृद्ध बनाउन नसके कम्युनिस्ट पार्टीको काम पनि छैन भनेर यो अवधारणा आएको थियो’ दाहालले भने ।
आफूहरूलाई पनि अहिले बिरालो सेतो र कालो जे भए पनि केही मतलब नभएको दाहालले बताए । ‘हुनु पर्यो विकास । यदि विकास निर्माण र सम्वृद्धिको जनचाहनालाई र इतिहासको आवश्यकतालाई हामीले पूर्ति गर्न नसक्ने हो भने नेपालमा पनि कम्युनिस्ट पार्टीको केही पनि काम छैन’ दाहालले भने । निजी क्षेत्रको आवश्यकतालाई आफूहरूले अपरिहार्य देखेको हुँदा निजी क्षेत्र पनि विकासमा अग्रसर बन्न उनले अपिल गरे ।
माघ ४ गतेसम्म सञ्चालन हुने चितवन महोत्सव चितवन उद्योग वाणिज्य सङ्घले चितवन जिल्ला समन्वय समिति र भरतपुर महानगरपालिकासँग सहकार्य गरेर आयोजना गरेको हो ।
महोत्सव मूल समितिका संयोजक सहनलाल प्रधानका अनुसार ५७० स्टल रहेको महत्वसवको मुख्य उद्देश्य चितवनको पर्यटन प्रवर्द्धनलाई टेवा दिनु रहेको छ । जिल्लाका सातै स्थानीय तहका ५० पर्यटकीय स्थल समेटेर पर्यटक गाइड पनि प्रकाशन भएको छ ।
प्रकाशित : पुस २५, २०७५ १७:१२