'काठमाडौं भ्यू टावर' निर्माणले गति लिएन
काठमाडौँ — करिब चार वर्षदेखि सुरु भएको काठमाडौँ भ्यू टावर (दृश्यावलोकन स्तम्भ) निर्माणको कामले अझै गति लिन सकेको छैन ।
निर्माण कार्य सुरु भएको चार वर्ष बित्नै लाग्दासम्म पनि मुस्किलले १५ प्रतिशत मात्रै काम भएको काठमाडौँ महानगरपालिकाले नै स्वीकार गरेको छ ।
महानगरका निजी साझेदारी एकाइ प्रमुख ध्रुव काफ्लेका अनुसार सम्झौता भए अनुसार काम हुने हो भने अहिले त कम्तीमा पनि ७५ प्रतिशत काम सकिसक्नुपर्ने हो, त्यो अवस्था भने छैन ।
अहिलेसम्ममा जमिन मुनि ८० प्रतिशत काम भएको छ भनेमाथि नगण्य मात्रामा मात्रै काम भएको छ, समग्रमा १५ प्रतिशत भन्दाबढी काम भएको छैन ।
स्तम्भ निर्माणका लागि महानगरपालिका र जलेश्वर, स्वच्छन्द र बिकोइ कम्पनीबिच २०७१ फागुन २२ मा सम्झौता भएको थियो । सम्झौता अनुसार सम्झौता भएको पाँच वर्षभित्र ती कम्पनीले आफ्नो लगानीमा भवन बनाएर ३० वर्षसम्म चलाउन पाउनेछन् ।
काफ्लेका अनुसार उक्त स्तम्भ निर्माणको योजना भूकम्प अघि नै आएको र भूकम्पपछि निर्माण सम्बन्धी फरक निर्णय हुँदा केही समय काम गर्ने वातावरण थिएन ।
'पछि काम गर्ने वातावरण हुँदा पनि काम गरेको पाइँदैन, अर्को कम्पनीलाई दिइहाल्ने अवस्था पनि छैन । कम्पनीले कामपालाई सुरुको समयदेखि नियमित रूपमा बुझाउनुपर्ने सम्झौता अनुरूपको कर दिइरहेको छ', प्रमुख काफ्लेले भने ।
प्रकाशित : पुस २६, २०७५ १५:००