नेपालीको आत्मसम्मानको श्रेय पृथ्वीनारायण शाहलाई: प्रधानमन्त्री

कान्तिपुर संवाददाता

काठमाडौँ — प्रधानमन्त्री केपी शर्मा ओलीले नेपालीले पाएको स्वतन्त्र, सार्वभौम राष्ट्रको गौरवशाली नागरिकको आत्मसम्मानको श्रेय पृथ्वीनारायण शाहलाई जाने बताएका छन् ।  

२९७ औं पृथ्वी जयन्तिका अवसरमा शुभकामना सन्देश दिंदै प्रधानमन्त्री ओलीले पृथ्वीनारायण शाहको योगदानको कदर गर्नुपर्ने बताए । ‘उहाँको एकीकरण अभियान अत्यन्त समयानुकूल थियो । पृथ्वीनारायणले सुरु नगरेको भए वा सुरु गरिसकेपछि पनि एकीकरण अभियान सफल नभएको भए स्वाधीन, सार्वभौम, आधुनिक राष्ट्रका रुपमा विश्व मानचित्रमा नेपाल उभ्भिनै सक्ने थिएन,’ प्रधानमन्त्रीले भनेका छन्, ‘राष्ट्र एकीकरणको त्यो महाअभियान सफल नभएको भए त्यसबेला विश्वव्यापी रुपमा छाएको उपनिवेशवादको प्रभावबाट हाम्रो देश जोगिने पनि थिएन ।’

प्रधानमन्त्री ओलीले नेपाली जातिको गौरवशाली इतिहासको अत्यन्त महत्वपूर्ण घटनाक्रमका नायक पृथ्वीनारायणको योगदानको कदर गर्दै शाहप्रति श्रद्धाञ्जली अर्पण गरेका छन् । ‘उहााले नेपालको भौगोलिक एकीकरण गरी भाषिक, जातीय, साास्कृतिक लगायतका अनेक विविधताका बीच मजबूत एकताको आधार तयार गर्नुभयो,’ शुभकामना सन्देशमा भनिएको छ, ‘अनेकताबीचको एकताको गौरवमय परम्पराको विजारोपण पृथ्वीनारायणकै अगुवाइमा भएको थियो । आज अनेकता बीचको एकता नेपालको पहिचान बनेको छ ।’

संसारका अधिकांश देश उपनिवेशवादको चंगुलमा परेकाबेला पनि स्वतन्त्र र सार्वभौम राष्ट्रका रुपमा नेपालको उदय गराउने पृथ्वीनारायण शाहको योगदान बिर्सन नसकिने प्रधानमन्त्रीको सन्देशमा उल्लेख छ ।

मुलुक संघीय लोकतान्त्रिक गणतन्त्रलाई संस्थागत गर्दै समाजवादतर्फ उन्मुख भएको उल्लेख गर्दै प्रधानमन्त्री ओलीले हरेक नागरिकका लागि संविधानले नै समान अधिकार, सुरक्षा र सम्मान सहितको समतामूलक समाज सुनिश्चित गरेको बताए । ‘हामी राज्य सञ्चालनका आधुनिक लोकतान्त्रिक विधि अनुरुप अघि बढिरहेका छौं । आजको युगमा अधिकार सम्पन्न, समृद्ध र सुखी नागरिक नै राष्ट्रिय स्वाभिमानका आधार हुन्,’ प्रधानमन्त्रीको शुभकामना सन्देशमा लेखिएको छ ।

प्रकाशित : पुस २७, २०७५ ०९:२२
प्रतिक्रिया
पठाउनुहोस्

रुपाकोट क्षेत्रको जग्गा व्यक्तिका नाममा

दिक्तेलका लेखनाथ आचार्य र गोविन्दराज आचार्यको नाममा पानीको मुहानसहित ८० रोपनीभन्दा बढी जग्गा दर्ता 
कान्तिपुर संवाददाता

खोटाङ — दिक्तेल रुपाकोट मझुवागढी नगरपालिकाको पर्यापर्यटन क्षेत्र रुपाकोट क्षेत्रको जग्गा व्यक्तिको नाममा भएको खुलेको छ । नगरपालिकाले पर्यापर्यटन विकासका लागि योजना निर्माणको पूर्वसन्ध्यामा व्यक्तिको नाममा जग्गा भएको खुलेको हो ।

खोटाङको रुपाकोट क्षेत्रको जग्गा नापजाँप गर्दै प्राविधिक तथा सरोकारवाला । तस्बिर : डम्बरसिं राई/कान्तिपुर

नगरपालिकाले खटाएको नापी विभागका कर्मचारीको विवरणअनुसार रुपाकोटको केन्द्र आसपास व्यक्तिले जग्गा दर्ता गरेको पाइएको छ । हालै गरिएको सर्वेक्षणमा दिक्तेलस्थित लेखनाथ आचार्य र गोविन्दराज आचार्यको नाममा पानीको मुहानसहित ८० रोपनीभन्दा बढी जग्गा दर्ता भएको पाइएको छ ।

उनीहरूको नाममा भएको कित्ता नं ४४९ मा २५ रोपनी छ आना, कित्ता नं ४५० मा २४ रोपनी पाँच आचा र कित्ता नं ४५१ मा २८ रोपनी १३ आना जग्गा दर्ता भएको पाइएको छ । उक्त जगगा २०६६ साल साउन २ मा व्यक्तिको नाममा आएको देखिन्छ । दिक्तेल रुपाकोट मझुवागढी नगरपालिकाले रुपाकोट क्षेत्रको पर्यापर्यटन विकासका लागि गुरुयोजना निर्माणको तयारी गरेको छ । यसका लागि गत नगरपरिषदले नीतिगत योजना समेत पारित गरेको छ ।

उक्त जग्गाबाहेक अन्य पनि दर्ताका लागि कित्ता काट गरेको पाइएको छ । यद्यपि दर्ता भने नदेखिएको नगरपालिकाले जनाएको छ । यसका लागि अझ विस्तृत अध्ययन आवश्यक रहेको दिक्तेल रुपाकोट मझुवागढी नगरपालिकाका प्रमुख दीपनारायण रिजालले बताए । उक्त जग्गा कसरी दर्ता भयो भन्ने बारे समेत अध्ययन गरिने नगर प्रमुख रिजालले सुनाए । ‘वैधानिक वा अवैधानिक भन्नेबारे अध्ययन गरिन्छ,’ नगरप्रमुख रिजाले भने, ‘त्यसपछि के गर्ने भन्ने निर्णय हुन्छ ।’ पर्यापर्यटनका लागि गुरुयोजना बनाइने भएकाले जग्गाबारे कुनै निर्णय हुन सक्ने बताए ।

प्रकाशित : पुस २७, २०७५ ०९:१८
पूरा पढ्नुहोस्
प्रतिक्रिया
पठाउनुहोस्