‘नेपाली सबैभन्दा मिहिनेती’

घनश्याम खडका, नारायण खड्का

(अस्ट्रेलिया) — अस्ट्रेलियाको नेपाल मामिलासम्बन्धी जानकार एक मन्त्रीले आप्रवासीमध्ये नेपाली सबैभन्दा मिहिनेती रहेको बताएकी छन् ।

‘मिहिनेत र मिजासका हिसाबले नेपाली आदर्श आप्रवासी हुन्,’ दक्षिण अस्ट्रेलियाको प्रिमियरका लागि सहायकमन्त्री जिङ लीले कान्तिपुरसँगको कुराकानीमा भनिन्, ‘रोजगारीको प्रतिशत र अंग्रेजी भाषामाथिको पकड पनि अन्य देशका आप्रवासीको तुलनामा नेपालीको उच्च छ ।’

हालैको तथ्यांकअनुसार आप्रवासीमध्ये अस्ट्रेलियामा चिनियाँ र भारतीयपछि ठूलो संख्यामा नेपाली छन् । आँकडाअनुसार नेपालीले सामाजिक सुरक्षा भत्ताको कम उपयोग गरेको लीले बताइन् । मुख्य मन्त्रीपछिको शक्तिशाली पदमा पुगेकी ली दक्षिण अस्ट्रेलिया राज्यको प्रभावशाली नेत्री हुन् । आप्रवासीमा उनको राम्रो पकड छ । नेपाली समुदायप्रति उनको विशेष झुकाव देखिन्छ ।

‘मलाई नेपालीहरू मन पर्छन्, नेपालको सुन्दरताको म कदर गर्छु,’ दक्षिण अस्ट्रेलियाको संसद् भवनस्थित बैठक कक्षमा उनले भनिन्, ‘पछिल्लो समय क्रिकेटसँग पनि दुई देश जोडिन पुगेकामा खुसी लागेको छ ।’ सार्वजनिक रूपमा आफ्नो कलासंस्कृति मनाउने नेपाली शैलीको समेत उनी प्रशंसक हुन् । ‘हामी अस्ट्रेलियालाई बहुसांस्कृतिक देश भनेर संसारमा चिनाउन चाहन्छौं,’ उनी भन्छिन्, ‘यो अभियानमा हामीलाई नेपाली मित्रहरूले राम्रोसँग सघाउनुभएको छ ।’

पछिल्लो समय उनी अस्ट्रेलियाका व्यवसायीलाई नेपालमा लगानी गर्ने वातावरण मिलाउन लागिपरेकी छन् । उनी डेढ वर्षअघि व्यापारी र राजनीतिज्ञको १५ सदस्यीय टोलीको नेतृत्व गर्दै काठमाडौं आएकी थिइन् । त्यतिबेला प्रधानमन्त्री पुष्पकमल दाहालसँग औपचारिक भेट वार्ता गरी अस्ट्रेलिया र नेपालका दुई सहरबीच भगिनी सम्बन्ध स्थापित गर्ने सहमति भएको थियो । ‘म त्यही प्रयासमा छु,’ उनले भनिन्, ‘हामी दुई सहरको पहिचान गर्न र एकअर्काबीच प्राविधिक, सांस्कृतिक, पर्यटकीय सम्बन्धको आदानप्रदान गर्न सक्छौं ।’

उनी अस्ट्रेलियास्थित नेपाली क्रिकेट एसोसिएसन (एन्का) को सदभावना दूत बनेकी छन् । उक्त संस्थाले आयोजना गर्ने हरेक कार्यक्रममा पुग्छिन् । त्यति मात्र नभएर नेपालबाट आएका अभिभावकलाई समय निकालेर भेटछिन्, संसद् भवनको भ्रमण गराउँछिन् र यहाँको राजनीतिक पद्धतिबारे जानकारीसमेत दिन्छिन् ।

प्रकाशित : पुस २७, २०७५ २१:१६
ADVERTISEMENT
प्रतिक्रिया
पठाउनुहोस्

खप्तड गोल्डकप : संकटा क्वाटरफाइनलमा

कान्तिपुर संवाददाता

धनगढी — सीएमजी क्लब संकटा तेस्रो नेपाल आइस अन्तर्राष्ट्रिय सुदूरपश्चिम खप्तड गोल्डकप फुटबलको क्वाटरफाइनल पुगेको छ । शुक्रबार संकटाले गोर्खा ब्वाइज रूपन्देहीलाई २–० ले पराजित गरेको थियो ।

धनगढी रंगशालामा पहिलो हाफको इन्ज्युरी समयमा संकटाले अग्रता लिएको थियो । जय गुरुङको पासमा रवि सिलवालले पेनाल्टी क्षेत्रभित्र बल नियन्त्रणमा लिँदै प्रहार गरेको बललाई गोलरक्षक सोजित गुरुङले रोक्न सकेनन् । त्यसअघि ३८ औं मिनेटमा गौतम श्रेष्ठको क्रसमा कजिमको शक्तिशाली प्रहारलाई राजाबाबुले उत्कृष्ट डाइभ दिँदै बचाएका थिए । संकटाका लागि सातौं मिनेटमा लक्ष्मण रुचालको फ्रिकिकमा सरोज दाहालले फ्लिक गरेको बल पोस्टभन्दा थोरै माथिबाट बाहिरियो । १८ औं मिनेटमा गोर्खा ब्वाइजका शिव श्रेष्ठले झन्डै २५ यार्ड टाढाबाट गरेको प्रहार संकटाका गोलरक्षक राजाबाबु थापाले पन्च गरेर बचाए ।

दोस्रो हाफको ६६ औं मिनेटमा संकटाका लक्ष्मण रुचालको पासमा गोलरक्षक बिट भएपछि एलोन म्याक्सवेलले गरेको प्रहार कुलदीप कार्कीले गोललाइनबाट बचाए । ८३ औं मिनेटमा फोफाना इब्राहिमको लो क्रसमा म्याक्सवेलले गोल गर्दै संकटाको जित पक्का गरेका हुन् । इन्ज्युरी समयको दोस्रो मिनेटमा कुलदीपको पासमा मसुदले वान भर्सेस वानको स्थितिमा प्रहार गरेको बल पोस्टमाथि बाहिरिएपछि गोर्खा ब्वाइजको गोल फर्काउने सम्भावना सकिएको थियो ।

संकटाका प्रशिक्षक सल्यान खड्गीले जित दर्ता गरे पनि मैदानको अवस्थाका कारण प्रदर्शन सोचेअनुरुप हुन नसकेको बताए । गोर्खा ब्वाइजका प्रशिक्षक दयाराम श्रेष्ठले पाएको अवसर सदुपयोग गर्न नसक्दा हार बेहोरेको प्रतिक्रिया दिए । संकटाको भेट माघ १ मा क्यामरुनको धाउफिन्स एफसीसँग हुनेछ ।
शनिबार पहिलो क्वाटरफाइनलमा एपीएफले मेची नेत्रालय काँकडभिट्टा ट्रेनिङ सेन्टरसँग खेल्नेछ ।

प्रकाशित : पुस २७, २०७५ २१:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT