रुपन्देहीमा आधारातमा तस्कर र प्रहरीबीच गोली हानाहान, एक तस्करको मृत्यु, एक प्रहरी घाइते
बुटवल — प्रहरीले चलाएको गोलीबाट रुपन्देहीमा एकजनाको मृत्यु भएको छ । गए राति सिद्धार्थनगर नगरपालिका–१०, शंकरपुरमा गस्तीमा खटिएको प्रहरी टोलीमाथि अकस्मात गोली प्रहार भएपछि जवाफी कारबाहीमा गोली चलाउँदा तस्करको मृत्यु भएको रुपन्देही प्रहरी प्रमुख प्रहरी उपरीक्षक एसपी हृदय थापाले जानकारी दिएका छन् ।
भारतीय नम्बर प्लेटको मोटरसाइकलमा आएका करिब ३५ वर्षका तस्करको समूहले राति करिब १२ बजे प्रहरीमाथि गोली चलाएपछि तत्कालै जवाफी कारबाही गरिएको प्रहरीको भनाइ छ । मृतकको परिचय खुलेको छैन । करिब ३५ वर्षीय मृतक भारतीय नागरिक हुनसक्ने प्रहरीको अनुमान छ ।
घटनास्थलबाट प्रहरीले अटोमेटिक लोडेड पेस्तोल तथा उनले प्रयोग गरेको युपी ५३ एच २०२८ नम्बरको भारतीय मोटरसाइकल बरामद गरेको छ । प्रहरीको जवाफी कारवाहीमा घाइते भएका उनलाई अस्पताल लैजाँदै गर्दा बाटोमै मृत्यु भएको थियो । तस्करको गोली लागेर एकजना प्रहरी जवान कृष्ण श्रेष्ठ पनि घाइते भएका छन् ।