राज्यले गरेको सम्झौता इमान्दारीसाथ कार्यान्वयन गर्नुपर्छ: उपप्रधानमन्त्री यादव
काठमाडौँ — उपप्रधान तथा स्वास्थ्य मन्त्री उपेन्द्र यादवले राज्यले गरेको सम्झौतालाई इमान्दारीसाथ कार्यान्वयन गर्नुपर्ने बताएका छन्।उपप्रधानमन्त्री यादवले स्वास्थ्य मन्त्रालयमा आयोजित पत्रकार अन्तर्क्रिया कार्यक्रममा प्रा.डा. गोविन्द केसीको १६ औं सत्याग्रहबारे गरिएको एक प्रश्नको उत्तर दिँदै उक्त कुरा बताएका हुन्।
'म आफैं आन्दोलन गरेर आएको मान्छे,' उपप्रधानमन्त्रीले अगाडि भने, 'राज्यले गरेको सम्झौतालाई इमान्दारीसाथ कार्यान्वयन गर्नुपर्छ।' यादवले मुलुकको चिकित्सा शिक्षा गुणस्तरीय हुनु पर्ने समेत बताए।
उक्त कार्यक्रममै स्वास्थ्य राज्यमन्त्री डा. सुरेन्द्र कुमार यादवले डा केसीको एउटा विश्वविद्यालयले ५ वटा भन्दा बढी स्वास्थ्य संस्थालाई सम्बन्धन दिन नमिल्ने मागमा मात्र कुरा अड्केको बताए। उनले यो विन्दू बाहेक अन्य मागमा सरकार सकारात्मक रहेको औंल्याए।
प्रकाशित : माघ ९, २०७५ १४:१६