साढे ३ वर्षीया बालिका बलात्कार गर्ने पक्राउ
रुकुम पूर्व — साढे ३ वर्षीया बालिकालाई बलात्कार गर्ने एक व्यक्तिलाई प्रहरीले पक्राउ गरेको छ । बालिका बलात्कार गर्ने सिस्ने गाउँपालिका-५, का ३१ वर्षीय मदन भनिने भरत गौतमलाई प्रहरीले पक्रेको हो ।
सोमबार दिउँसो १ बजे बालिकालाई बलात्कार गर्ने क्रममा स्थानीयले देखेपछि प्रहरीलाई खबर गरेका थिए । अन्य साथीभाइसँगै बसिरहेका गौतम पिसाव गर्न भन्दै हिँडेका थिए ।
गौतम हिँडेकै ठाउँतिर बालिका रोएको सुनेपछि उनीहरु हेर्न जाँदा आपत्तिजनक अवस्थामा भेटाएको जिल्ला प्रहरी कार्यालयका प्रहरी निरीक्षक ऐनबहादुर मल्लले बताए । अभियुक्त गौतम र बालिकालाई स्वास्थ्य परीक्षणका लागि रुकुम पश्चिमको जिल्ला अस्पताल सल्ले पठाइएको मल्लले बताए ।
बालिकाको अवस्था सामान्य जस्तो देखिएको भएपनि अस्पतालको रिपोर्ट नआएसम्म केही भन्न नमिल्ने प्रहरीले जनाएको छ । घटनाको थप अनुसन्धान भइरहेको प्रहरीले जनाएको छ । गौतम यसअघि पनि जबरजस्तीकरणी मुद्दामै ५ वर्ष कैद सजाय भुक्तान गरिसकेका व्यक्ति हुन् ।
प्रकाशित : माघ २१, २०७५ १७:१३