१ लाख ५१ हजार नक्कली नोटसहित पक्राउ

प्रहरी स्रोतका अनुसार विशेष सूचनाका आधारमा प्रभागको टोलीले गोंगबुको गणेशथानस्थित ह्याप्पी होम टोलस्थित ओमबहादुरको कोठामा रहेको दराजबाट हजार दरका १ सय ४१ वटा नक्कली नोट भेटिएका थिए । नजिकै रहेको हिक्मत कुँवरको कोठामा डसनामुनि थप १० थान नक्कली नोट भेटिएको थियो ।

हिक्मत भने फरार छन् । उनको खोजी भइरहेको प्रहरीले जनाएको छ । ओमबहादुर र हिक्मतको कोठाबाट ५० थान पासपोर्टसमेत बरामद भएको जानकारी प्रहरीले दिएको छ । प्रहरीले ती पासपोर्टलाई आवश्यक कारबाहीका लागि वैदेशिक रोजगार विभागमा पठाएको छ ।

प्रारम्भिक अनुसन्धानबाट प्रहरीले उनीहरू दुवै जना म्यानपावर एजेन्ट भएको अनुमान गरेको छ । उनीहरूले ती नोट कलर प्रिन्टरबाट फोटोकपी गरेजस्तो देखिन्छ । यसअघि काठमाडौं प्रहरी परिसरले कात्तिक अन्तिम साता साढे दुई करोड रुपैयाँ बराबरको नक्कली नोट बरामद गरेको थियो ।