नेविसंघ अध्यक्ष महरले राजीनामा दिए

कान्तिपुर संवाददाता

काठमाडौँ — नेपाल विद्यार्थी सङ्घ(नेविसंघ) का अध्यक्ष नैनसिंह महरले राजीनामा दिएका छन् । पार्टीको केन्द्रीय कार्यसमितिबाट सङ्घको वर्तमान कार्यसमिति विघटन गर्ने तयारी भइरहेका बेला सोमबार महरले राजीनामा दिएका हुन् । पार्टी सभापति शेरबहादुर देउवालाई सम्बोधन गर्दै उनले राजीनामा बुझाएका छन् ।

सभापति देउवाले महरको राजीनामा स्वीकृत भइसकेको जानकारी सोमबारको केन्द्रीय कार्यसमितिको बैठकमा जानकारी दिएका थिए । महरको कार्यकाल भदौ २ मै सकिएको हो । महाधिवेशन गराउन पार्टीले उनलाई पहिलोपटक तीन र दोस्रो पटक दुई महिनाको समय दिएको थियो ।

तोकिएको समयभित्र महाधिवेशन गराउन नसकेपछि विधानत:कार्यसमिति नै विघटन गर्ने तयारी पार्टीको थियो । पूर्व महामन्त्री कृष्णप्रसाद सिटौलासहित केही नेताहरूले भने वर्तमान नेतृत्वलाई महाधिवेशन गराउन दिनुपर्ने बताउँदै आएका थिए । सभापति देउवा र वरिष्ठ नेता पौडेल भने महर नेतृत्वको कार्यसमिति भङ्ग गरेर महाधिवेशनका निम्ति तदर्थ समिति बनाउन सहमत भएका छन् ।

महरले आफूलाई पार्टी केन्द्रीय कार्यसमितिबाटै असहयोग भएपछि राजीनामा दिएको बताएका छन् । तोकिएको समयमा महाधिवेशन गराउन नसक्नुमा समयमै सङ्घको विधान नहुनुलाई मुख्य कारण ठानेका छन् । ‘महाधिवेशनको प्रक्रिया अघि बढिरहेको थियो/छ, पार्टीले थपेको समयभित्र महाधिवेशन गराउन विधान समयमै नआउँदा समस्या भयो’ उनले भने ।

महर नेतृत्वको कार्यसमितिका पदाधिकारी तथा सदस्य गरी ५१ जनाले राजीनामा दिएपछि उनी थप दबाबमा परेका थिए । महरले राजीनामा दिइसकेकाले पार्टी केन्द्रीय कार्यसमितिको बैठकमा नेविसंघका बारे सभापति देउवाले सदस्यहरूलाई बोल्न दिएका थिएनन् ।

प्रकाशित : माघ २८, २०७५ १६:३२
ADVERTISEMENT
प्रतिक्रिया
पठाउनुहोस्
ADVERTISEMENT

जलेर एकको मृत्यु

प्रतीक्षा काफ्ले

स्याङ्जा — स्याङ्जाको अर्जुनचौपारी-१ गाडखानीमा आगलागी हुँदा एक जनाको जलेर मृत्यु भएको छ । स्थानीय २८ वर्षीय कृष्ण कामीको मृत्यु भएको जिल्ला प्रहरी कार्यालयले जनाएको छ ।  

स्थानीय बलबहादुर थापामगरको २ तले टिनले छाएको कच्ची घरमा सोमबार बिहान साढे ४ बजे आगलागी हुँदा भुईँ तलामा सुतिरहेका कृष्ण जलिसकेर मृत्त अवस्थामा भेटिएको प्रहरी उपरीक्षक राजकुमार लम्सालले जानकारी दिए।

आगलागीबाट घर तथा घरभित्र रहेको अन्नपात र सामान गरी करिब १४ लाख ८० हजार बराबरको क्षति भएको प्रहरीले जनाएको छ।

प्रकाशित : माघ २८, २०७५ १५:५२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT