छात्राको कोठामा ‘सुसाइड नोट’

‘सुसाइडको कारण पत्ता लगाउनुपर्छ, हामी पनि आश्चर्यचकित छौँ, एक्लै रक्सौल नजाने उनीहरू कसरी त्यो रेल्वे ढालासम्म पुगे ?’
भूषण यादव

वीरगन्ज — भारतीय रेलसँग किचिएर ज्यान गुमाएका दुई नेपाली छात्राको कोठामा ‘सुसाइड नोट’ फेला परेको छ । घटनास्थल र भारतीय समकक्षीलाई भेटेर आएको पर्सा प्रहरीले वीरगन्ज रानीघाटमा छात्राहरू बस्ने कोठा फोरेर खनतलाशी गर्दा सुसाइड नोट फेला परेको हो । प्रहरी उपरीक्षक रेवती ढकालका अनुसार प्रहरीभित्र प्रेवश गर्दा देख्ने ठाउँमा नै सुसाइड नोट राखिएको थियो । 

Citizen

पर्साको कालिकामाई गाउँपालिका– २ भेडिआरीकी निभा कुमारी र सोही गाउँपालिका– ३ हरिहरपुरकी किरण चौरसियाको शव आइतबार विहान सीमावर्ती रक्सौल–सुगौली रेल्वेखण्डको कनना रेल्वे ढाला नजिकै क्षतविक्षत अवस्थामा फेला परेको थियो । एक जनाको घाँटी र अर्कोको दुबै घुँडा माथिको भाग छिनिएको थियो । उनीहरूको पकेटमा भेटिएको परिचय पत्रबाट सनाखत भएको थियो ।

रातो पेनले लेखिएको सुसाइड नोटमाथि रातो गुलाब र घडी राखिएको थियो । एसपी ढकालका अनुसार सुसाइड नोटमा कसैमाथि आरोप लगाइएको छैन । ‘हामी पूरै होसमा यो चिठ्ठी लेख्दैँ छौँ, हामी यो संसारमा बाच्न सक्दैनौँ, हाम्रो यो निर्णयको पछाडि कसैको हात छैन, हामी दुबै खुशीका साथ यो निर्णय लिएका हौँ,’ सुसाइड नोट उद्धृत गर्दौ एसपी ढकालले अगाडि थपे, ‘मम्मी पापा हामीलाई माफ गर्नुहोला, हामीले तपाईहरूको सपना पूरा गर्न सकेनौँ । आई लभ यु पापा ममी ।’

नोटको अन्त्यमा निभा र किरण लेखिएको छ । सुसाइड नोट फेला परेपछि प्रहरीले आत्महत्या नै भएको बताएको छ । घरबेटीलाई पूजा गर्न जान्छु भनेर दुबै जना आइतबार विहान करिब साढे ६ बजे नै निस्केका थिए । छात्राका परिवारजन गाउँमा बस्ने गरेका छन् ।

पारिवारिक स्रोतका अनुसार कक्षा ११ मा अध्ययनरत किरण चौरसियाको केही दिन पहिले इन्गेजमेन्ट भएको थियो । सुसाइड नोटमाथि राखिएको घडी इन्गेजमेन्टकै बेला किरणले पाएको हुनसक्ने प्रहरीले जनाएको छ ।

प्रहरीका अनुसार वीरगन्जको एक स्कुलमा कक्षा ११ मा अध्ययनरत निभा र किरण वाहेक अन्य दुई छात्रापनि त्यही कोठामा सँगै बस्ने गरेका थिए । घटनाको दिन बाँकी दुई छात्रा गाउँ गएका थिए । भारतीय प्रहरीले समेत प्रत्यक्षदर्शीको बयानको आधारमा दुबै छात्राले आत्महत्या नै गरेको दाबी गरेको छन् ।

रक्सौलका डीएसपी सन्जय झा र रेल्वे सुरक्षा बलका अधिकारीहरू घटनास्थल अवलोकन गरी प्रत्यक्षदर्शीसँग बयान लिएका थिए । छात्रा बस्ने डेराबाट सुसाइड नोट फेलापरेपछि पर्सा प्रहरीले थप अनुसन्धान अगाडि बढाएको छैन । परिवारजन भने यो घटना शंकास्पद रहेको दाबी गरेका छन् ।

‘एक जनाको मात्र विवाह तय भएको अवस्थामा दुबै छात्राले किन सुसाइड गरे ?’ एक छात्राका काका भन्छन्, ‘सुसाइडको कारण पत्ता लगाउनुपर्छ, हामी पनि आश्चर्यचकित छौँ, एक्लै रक्सौल नजाने उनीहरू कसरी त्यो रेल्वे ढालासम्म पुगे ?’ भारतीय प्रहरीकै भनाई अनुसार एक छात्रालाई बचाउने क्रममा दुबै ट्रेनले किचिएका थिए ।

जबकि सुसाइड नोटमा दुबैको नाम उल्लेख गरिएको छ । आइतबार सामाजिक सञ्जालमा छात्राहरूको शव र परिचयपत्र सहितको विवरण भाइरल बनेपछि पर्सा प्रहरी घटनास्थलतर्फ गएको थियो । कानुनी प्रक्रिया पूरा गरी शव आफन्तलाई बुझाइने भारतीय प्रहरीले जनाएको छ ।

यो पनि पढ्नुहोस्ः
प्रतिक्रिया
पठाउनुहोस्
ADVERTISEMENT

५ वर्षभित्र सबै करिडोरमा सडक

दीपेन्द्र विष्ट

काठमाडौँ — सरकारले ५ वर्षभित्र उपत्यकाका सबै नदी करिडोरमा सडक विस्तार सम्पन्न गर्ने जनाएको छ । यसका लागि ढल, सडक, हरियाली उद्यान विकास, नदी नियन्त्रण तथा बहाव कायमलगायत कामका लागि विभिन्न निकायलाई जिम्मा दिइएको अधिकारसम्पन्न एकीकृत विकास समितिका आयोजना उपप्रमुख योगेन्द्र चित्रकारले बताए । 

उनका अनुसार उपत्यकाको वाग्मती, नख्खु, हनुमन्ते र विष्णुमतीमा अधिकारसम्पन्न वाग्मती आयोजनाले काम गरिराखेको छ । ‘ढल तथा नदी नियन्त्रण गरी सडक खोल्ने काम भइरहेको छ,’ उनले भने, ‘यसले गर्दा उपत्यका सौन्दर्य पनि बढ्नेछ ।’

मनोहरा करिडोरमा सडक डिभिजन कार्यालय काठमाडौं र मेलम्ची खानेपानी आयोजनाअन्तर्गतको आयोजना कार्यान्वयन निर्देशनालयले सडक विस्तार तथा ढल बिछ्याउने काम गरिरहेका छन् । त्यसैगरी धोबीखोलामा उपत्यका विकास प्राधिकरणले काम अघि बढाएको छ ।

सडक डिजिभन कार्यालय काठमाडौंका प्रमुख कैलाश श्रेष्ठले खानेपानी आयोजना निर्देशनालयले मनोहरा करिडोरको विभिन्न भागमा ढल बिछ्याउने काम गरिरहेको बताए । ‘केही स्थानमा रोलिङ र ग्रेडिङ गर्ने काम भइहरको छ,’ उनले भने, ‘बालकुमारीदेखि मनोहरासम्म काम गरिराखेका छौं ।’

मनोहरा करिडोरको अन्य स्थानमा पनि सडक विस्तार अघि बढेको र बाँकी काम सम्पन्न गर्न पनि छलफल भइरहेको बताए । २०७२ मा सडक डिभिजन कार्यालयले विभिन्न खण्ड विभाजन गरी करिब १८ करोड रुपैयाँमा करिडोर निर्माणका लागि बजेट विनियोजन गरेको थियो ।

३० मिटर खोलाको बहाव छाडी किनारबाट २०–२० मिटर दायाँबायाँ छाड्नुपर्ने छ । त्यसमध्येको ११ मिटरमा सडक र ९ मिटरमा ग्रिनबेल्ट निर्माण गरिनेछ । बालकुमारी पुलदेखि साँखु (ब्रह्मखेल) सम्मको करिब ९ किमि लामो उक्त करिडोरको निर्माण गरिने छ । वाग्मती, विष्णुमती, मनोहरा, नख्खु, बल्खु, कर्मनासा, कोडकु, साङ्ले र महादेव खोला धोबीलगायतमा करिडोर निर्माणका लागि सरकारले पहिले नै निर्धारण गरिसकेको छ ।

वाग्मती, विष्णुमती र मनोहराका दायाँबायाँ २०/२० मिटर कायम गरिएको छ । वाग्मती नदीको बहाव क्षेत्र र स्थान हेरी फरक निर्धारण गरिएको छ । सुन्दरीजलदेखि गोकर्णसम्म २० मिटर, गोकर्णदेखि जोरपाटी पुलसम्म ३५ मिटर, जोरपाटी पुलदेखि गुहयेश्वरीसम्म ४० मिटर, तिलगंगादेखि शंखमूल खण्डमा न्यूनतम ३० मिटर, शंखमूलदेखि विष्णुमती दोभानसम्म न्यूनतम ६० मिटर बहाव क्षेत्र निर्धारण गरिएको छ । विष्णुमती दोभान र त्यसको तल्लो तटीय क्षेत्रमा न्यूनतम ८० मिटर बहाव क्षेत्र कायम गरिएको छ ।

अधिकारसम्पन्न वाग्मती एकीकृत विकास समितिले नख्खु–भैंसेपाटी दुवैतर्फ गरी ६ किमि करिडोर विस्तार गर्ने काम भइराखेको समितिका उपआयोजना प्रमुख योगेन्द्र चित्रकारले बताए । त्यसैगरी हनुमन्ते–ठिमि दोबाटो चोकसम्मको दुवैतर्फ गरी करिब ४ किमि सडक निर्माण भइरहेको उनले बताए । विष्णुमती नदी किनारको दुवैतर्फ गरी करिब २२ सय मिटर सडक विस्तार कार्य भइरहेको उनले बताए । ‘त्यहाँ बाटो पहिले नै खुलिसकेको छ,’ उनले भने, ‘त्यसलाई व्यवस्थित बनाउने काम मात्र भइराखेको छ ।’

नदीको बहावलाई नघटाई सडक विस्तार तथा ढल हाल्ने काम भइरहेको उनले बताए । ‘कही वर्षभित्रै उपत्यका सबै नदी व्यवस्थित र र सफा हुन्छन्,’ उनले भने, ‘विभिन्न स्थानमा ढल प्रशोधन केन्द्र पनि निर्माण भइरहेका छन् ।’ करिडोर निर्माण हुँदा सहर व्यस्थित र सुन्दर हुने उनले बताए ।

पछिल्लो पटक सवारी साधनको चाप बढदै गएपछि करिडोरमा सडक विस्तार गर्दा ट्राफिक जाम नियन्त्रण गर्न सजिलो भएको छ । अधिकारसम्पन्न वाग्मती आयोजनामार्फत मात्र झन्डै डेढ अर्ब रुपैयाँ नदी नियन्त्रण तथा करिडोर निर्माणका लागि छुट्याएको उनले बताए ।

पहिलो चरणमा राम मन्दिरबाट खसाङखुसुङ खोला दोभानको दायाँबायाँको २ दशमलव ७ किमि करिडोर निर्माण गरिने उनले बताए । ‘नदीको दायाँबायाँ मनोहरा दोभानसम्मको १२ किमिमा करिडोर निर्माण गरिनेछ,’ उनले भने ।

उनका अनुसार दायाँबायाँ ८/८ मिटर कालोपत्रे सडक, फुटपाथसहित बगैंचा निर्माण गरिनेछ । २ दशमलव ७ किमि हनुमन्ते करिडोर निर्माणका लागि ६९ करोड ७० लाख रुपैयाँमा छुट्याएको उनले बताए । उपत्यका ट्राफिक महाशाखा प्रमुख वसन्त पन्तले करिडोर विस्तार भए ट्राफिक जाममा कमी आउने बताए । ‘करिडोरलाई वैकल्पिक बाटोका रूपमा प्रयोग गर्न सकिन्छ,’ उनले भने, ‘यसले ट्राफिक जाम कम हुन्छ ।’

प्रकाशित : माघ २८, २०७५ १८:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT